Read anuak Ibaru 5 Bible Online

Ibaru 5 - anuak bible

Ibaru 5

¹'Ba kwääc laam moa døøŋŋø bëët mo wø kwany dï jiy, wø jier kaper nee luup mo jiy caange nyïm Jwøk, ni cïpge ki muuce ko olämme kiper raay.

²Ni ŋatøca løny jïre ki man cääne mëëth ki jø wø bäŋ gïn ŋäcge ki jø wø bääyi, kiper eni ki dëëre e jääk thuwø.

³Kiper manøgønø, eni wø cïpö ko olämme kiper raay moe ki dëëre, ki mo jiy møga bëët.

⁴Kiper dhaanhø, dëëre ba røønye keere, 'ba eni wø cwøla Jwøki, kaamar Aran na cwøl.

⁵Kaawat manøgø thuwø, Krictø dëëre käre thïïŋö e keere nee tïme na Kwääy Lam Mana Dwøŋ. 'Ba eni jiera Jwøki, na luum gø, ni «Ïïna Wääda; dïcäŋi aana tïmö na Wuuö jïrï.»

⁶Kaawat mana caan gø thuwø kanymør yi Wëël Jwøk, ni «Ï bëëdö ni ïïna dïlämi këël na bäre bäre, niï caala Melkidhedek.» [1]

⁷'Ba yïth nïne moa bëët Jecu bäät piny, Jecu alämö ni kwac Jwøk, ni jwöŋe ki pï nyeŋ ki dwøl mo päl, ni jwönna ŋata näk løny jïre ki man piem gø nee ba thøøe, ni wïny mare kiper mana leŋ luup mo Jwøk.

⁸'Ba këël na näk ena O Jwøk, ena kwänynyö ki man leŋ luup ki køør gïïa leth na jwøre.

⁹'Ba ki køør mana tïïi no othur kare, ena tïmö na tier pïëm man piem jiy ki gø mana näk adïëri na bäŋ cuŋŋe jï jø wø leŋ dwøre bëët,

¹⁰ni puti ya Jwøki nyooth ni ena Kwääy Lam Mana Dwøŋ ni caala Melkidhedek.

¹¹'Ba ennø, da luup mo thööth jïwa mo dewa caanø kiper gïnögø, mo tietge teek ki par, kiper mana tïm ïthu ni bääö ki man wïnynyu gø.

¹²Uuni, doo naa uuna dïpööye ennø, 'ba u poot manynya ŋat mør mo cäŋ u pwönynyö ki luup mo wø kwøŋ tägö ki geni ri luup Jwøk. Uuni, u manynya caak, ni paa kwön mo teek.

¹³Kiper jø wø bëën caak bëët, ge poot kär kwänynyö ki luum bëënynyö, kiper mana näk geno obwöre.

¹⁴Kiper kwön mo teek rømi ka jiy mo døøŋŋø, jøøa näk onø kwänynyö ki man ŋecge gïïa beyø ki gïïa reyø, kiper man wø pwönyge rege ki gø.