Read anuak Ibaru 7 Bible Online

Ibaru 7 - anuak bible

Ibaru 7

¹'Ba Melkidhedek manøgø, nyeny pääny Calem, na näk dïlämi mar Jwøa dwøŋ na en maal, arøømmø ki Eeberam, kanya duu Eeberammi ki kuna 'näk nyeye,[2] ni gwïëth gø.

²Ni ö Eeberammi ni cïpe jï gø ki paac wïth jammi ri gïïa kääre bëët. 'Ba eni, tier nyeŋŋe beeye «Nyeny bëënynyö,» ni näk nyeny Calem thuwø, na näk tiere beeye ni «Nyeny bëët-mëër.»

³Ni bäŋ gïn mo ŋäc kiper wänni ki menni, wala tier tuuŋ mar kwäye, ni bäŋ kany mo eno tägö yie, wala kany cuŋ kwøwe yie, 'ba eni caala O Jwøk, ni bëëdö ni ena kwääy lam këël na bäre bäre.

⁴Neennu dööŋŋe mø! Eeberam na näk kwarø, acïpö jï gø ki paac wïth jammi ri gïïa twiere bëët.

⁵'Ba nyïïkwaac Libay na tïïc na dïlämme, jïge da teek ki køør ciik Jwøk ki man lwötge ki paac wïth jammi bëët baŋ jiy, ni manøce tïïcge dëët nyïïmëëkge, këël na näk jøøgø gena nyïïkwaac Eeberam thuwø.

⁶'Ba Melkidhedek na näk ba en ri kwar jøøgø, ajïtö ki paac wïth jammi baŋ Eeberam, ni gwïëth eni, ŋata ci buuki jïre.

⁷'Ba ŋääø bëët ni bäŋ ŋat mo piem gø, ni ŋata thiinh wø gwïëtha ŋata dwøŋŋi.

⁸'Ba kany en, paac wïth jammi wø lwøra jiyi mo wø thøw. 'Ba kaace, paac wïth jammi lwøra ŋat wø gïre caan, ni kwøw.

⁹Ni dhaanhø doo köö ni Libay ki dëëre ni wø lwør paac wïth jammi, acïpö ki paac wïth jammi ki ri Eeberam,

¹⁰kiper eni poot kär nywølø kanya røøm kwari ki Melkidhedek.

¹¹?'Ba onää mo løny ki mana di jiyi thur karge ki køør kwäc-lam mar dhi øt Libay, aperŋø nø, na di jøwi määnyö ki dïlämi mør këët mo caala Melkidhedek, ni wec ŋata caath køør Aran? Kiper ciik Jwøk ajoot jiyi ri kwääc lam mar dhi øt Libay.

¹²Kiper kany wø wiil kwääy lam, ciik wø di wiilø thuwø.

¹³'Ba ŋata caan japi ii kipere, ena nyï tuuŋ mør, tuuŋa näk bäŋ dhaanhø aciel rege mo otïïö kar gïn wø cïp olämme bääte.

¹⁴Kiper ŋäc ni Kwääyø käla dhi øt Juuda. 'Ba kur tuuŋøce bäŋ gïn mo ocaan Modhe kiper dïlämme.

¹⁵Manøgø atïmö ni ŋäc døc kanya ö kwääy lammi mør na thïïŋi ni caala Melkidhedek,

¹⁶ni tïme na kwääy lam ki køør teek kwøwe na ba maar ränynyö, ni paa ki køør man wø caan yïth ciik kiper nyïïkwaac dhaanhø mo ööi ki dëël.

¹⁷Kiper da gïn mo ocaanø kipere, na køp, ni «Ï bëëdö ni ïïna kwääy lam këël na bäre bäre, niï caala Melkidhedek.»

¹⁸'Ba ki løøk aciel, luubö mana kwøŋ cem adaak, kiper mana näk mo jääk ni bäŋ gïn mo kønye.

¹⁹Kiper bäŋ gïn mo otïïc ciik Modhe no othur kare. 'Ba ki løøk maya, ŋäädhe mar yi nyïm mana beerra eni, apïï, ni beeye gïn wø nyiigø buut Jwøk ki køøre.

²⁰Ni gïnögøøni paa gïn mo bäŋ kööŋ ree. 'Ba jøøa kwøŋ tïmö na dïlämme, tïïc marge alwørge ni bäŋ kööŋ.

²¹'Ba ŋati, mare acaan jïre ki kööŋ, ni «Wuuö Jwøk anø kööŋ, ni mana caane ba wiile këët, na kööe, ni ‹Ï bëëdö ni ïïna dïlämi këël na bäre bäre.› »

²²Ni beeye gïn na tïïc Jecu na waaci mar luubö mana beerra eni na tuut Jwøki ki jiy.

²³'Ba dïlämme moa dïkwøŋ ge thöönhnhi kaper mana mäni ya thøøe ki man bëëtge bäät tïïc.

²⁴'Ba eni kwäc-lam mare ba daak kiper eni puta bëëtö këël na bäre bäre.

²⁵Kiper manøgønø, løny jïre ki man køny jø wø nyänh buut Jwøk ki køøre na bäre bäre, kiper mana bëëde ni kwøw cooth, ni kwaaya Jwøk kiperge.

²⁶Kiper teeŋ Kwääy Lam Mo Dwøŋ ma enøgønø, orømø ki can marø, ŋata en kur keere, ni bäŋ ajäla dëëre, ni bäŋ gïn mo jøøŋŋi ree, ni ba en dï jø raay, no orøønyø ni dwøŋŋa eni maalø bäre.

²⁷'Ba eni bäŋ gïn manynye kaamar kwääc laam moa døøŋŋø moøke, ki man cïpe ko olämme cooth, ni dïkwøŋ cïpö kiper raay moe, køøre cïpö kiper raac jiy. Kiper gïnögø atïïe yie aciel keere na bäre bäre, kanya cïp dëëre kiree no olämi.

²⁸'Ba adïëri møn, ciik Modhe wø jiera jiy mo wø jägö na kwääc laam moa døøŋŋø. 'Ba luumma kööŋe ki gø na öö køør ciigøgø, jiera ŋata näk Wäädö, ŋata tïïc no othur kare këël na bäre bäre.