Read anuak Ibaru 8 Bible Online

Ibaru 8 - anuak bible

Ibaru 8

¹'Ba tier gïn cäänwa kipere, beeye en. Ni teeŋ Kwääy Lam Mana Dwøŋ manøgø ena jïïø, ŋata pï bäät cwïïc buut wäl Ŋata Dwøŋ ni en maal,

²na ŋat wø tïïö yi kanya en kur keere yo oduŋkaanynya näk adïëri na näk ba geera dhaanhe, 'ba geera Wuuö.

³Kiper kwääc laam mo wø døøŋŋø bëët wø di jierø nee cïpge ki muuce ko olämme. Kiper manøgønø, kwääy lamøgø manynya gïn mo cïbe cïbö thuwø.

⁴'Ba kawaane onää eni ena piny, ba doo tïmö na dïlämi na bäre. Kiper dïlämme nutö mo wø cïpi ko olämme kaawat mana caan yïth ciik Modhe.

⁵Ni ge tïïö yi kar lam man wø nyooth kanya en kur keere ni en maal na näk mar Jwøk, ni beeye nyuudhi mar gø. Kiper kanya ö Modhe na tïme ni manynya man tïïc oduŋkaany lam, ena kööm Jwøki, na kööe, ni «Wär ŋäyï ki man tïïyï jammi bëët na karge ki køør nyuudhi mana nyooth jïrï bäät kïdi.»

⁶'Ba kawaane Krictø awëëk tïïc mana beerra eni ki tïïa näk oruuö, kaawat luubö mana tuut na käle, na beerra eni døc ki mana dïkwøŋ, kiper mana tïme no ogöök ri luupa buuk moa beyø geni.

⁷'Ba onää luubö mana kwøŋ tuut dïkwøŋ, bäŋ gïn mo ogwäyö ree, doo bäŋ riet luubö këët mo cäŋ tuutö.

⁸'Ba Wuuö Jwøk gïna näk ogwäyö ri luummögø ajoode, ni kööe, ni «Da nïne mo öö, maa tudö ki luubö mo nyään ki tuuŋ Icriel, ki dhi øt Juuda.

⁹Ni ba caal luubö mana tuuda ki kwäcge, dïcäŋa maa ceŋge naa bwødha ge wøk ki yi ŋööm Ijep, kiper ge kär put bëëtö ri luumma tuuda ki geni, ni beeye na kära marge wïnynyö. Luummögø caana Wuuö Jwøki.»

¹⁰Ni cäŋ Wuuö Jwøki köö, ni «Man beeye luubö mano tuuda ki tuuŋ Icriel køør nïrögøøni. Ciik 'moa okïtha wïthge, ni gööra ge cwïnyge, ni tïma ni aana Jwøk marge, ni tïmge na jiya;

¹¹ni bäŋ ŋat mo pwöny wati wala coki, mo köö, ni ‹Beerra man ŋäyï Wuuö Jwøk,› kiper aano ŋäcge bëët, ni tägi ka jiy moa kwörge therø këël moa kwörge døøŋŋø.

¹²Kiper gïïa baacge wiia wiiø, ni ba para wïïa ki raay moge këët.»

¹³'Ba kanya cääne kiper luubö mør mo nyään man cäŋ tuutö, mana näk oruuö atïïe keda gïn mo kare onø pöödhö. Kiper gïn wø many man tïme ni kare onø pöödhö ni manynya man jøøle, kar rwäänyö mare ocäännö.