Read anuak Ibaru 9 Bible Online

Ibaru 9 - anuak bible

Ibaru 9

¹'Ba këël luubö mana kwøŋ tuut, yie da luup kiper yi jöö man käär lam ki gø, ki luup kiper kar lam mar pinyi en.

²Kiper da oduŋkaara mo otïïö, ni thääŋŋe mana en wøk beeye mana wara bëët lamba, ki tharabëëta, ki møga näk nyuudhi yie. Ni kaace cwøl ni kanya en kur keere na mar Jwøk.

³'Ba ŋää abïï maya mana näk ogëëŋö, da thääŋö mør mo cwøl ni kanya en kur keere na mar Jwøk na pere letha eni,

⁴ni beeye mana näk yie da gïn wø waaŋ gïï wø jïcge ŋwääi ni met bääte na näk tïïc ki warkey, ka acanduk mar luumma tuut Jwøki ki jiy, mo dëëre orømø ki warkey bäre, na näk yie da daa warkey mana bëët møga näk meena yie, ka athøny Aran na løth, ko opäp kïte moa göör luumma tuut bäätge.

⁵'Ba bäät acanduk da gïï mo ocwääö ni caala nyïïatwiet maal mo cwøl ni kirubëlli, mo nyootha ajiem Jwøk, ni bwöpge ege määö bäät rëëbi mar kany wø ö Jwøki wø køny jiy yie. 'Ba kawaane atïmö ni bäŋ kany caanwa tiet japøgø yie këët.

⁶'Ba moøgø beege gïïa jiiŋŋi kiper lam. Ni dïlämme wø cäädhö yi thääŋ oduŋkaanynya en wøk, ni ge tïïya jap wø lämge ki ge.

⁷'Ba Kwääy Lam Mana Dwøŋ keere beeye wø ci yi thääŋ oduŋkaara maya, 'ba eni wø ci yie ka yie aciel keere ki yi cwiir bäre, ni ba cii jaak ni cere bäŋ remø mo kääre, man wø cïbe kiper dëëre ki moa bac jiyi ni kucge.

⁸Ni beeye gïn wø ö Jwïëc Jwøki na en kur keere wø nyooth gø, ni jöö mano døny jiyi yi kanya en kur keere na pere letha eni, poot kär jabø, kany poode no oduŋkaara mana en wøgø poot cuŋŋö kare.

⁹Ni manøgø beeye nyuudhi mo nyootha nïne moi. Ni nyootha gøøni ni muuce ko olämme mo wø cïp, ba løny ki man tïïcge cwïny ŋat wø lämö ni waany,

¹⁰kiper mana tïme ni ge caana luup caammi, ki maath, ki luup lwøk na nyuudhi ma teeŋi keerge, ni beege jap dëël moa cem gøøc kanya di luumma nyään na wäŋŋi cööp kare.

¹¹'Ba Krictø kanya ööe na Kwääy Lam Mana Dwøŋ, ni ena kwääy lam mar gïïa beyø na öö, ena öö ki ro oduŋkaanynya dwøŋŋa eni na beerra eni døc na näk kär tïïö ki ceŋ, ni ba joota ri moa cwääc.

¹²Ni eni kär öö ki rem dïëk ki mo røøe, 'ba ena døny yi kanya en kur keere na pere letha eni yie aciel keere ni käära remme kiree, ni wïïl øøni wøk na enønø, këël na bäre bäre.

¹³'Ba ni näk mo rem dïëk ki mo rwädhe ki bur mar dhieŋ ma nyakøø mo wø jør dëët jø wø näk ba waany wø døøya geni mo ena kur keerge ni døøc dëëtge mo waany,

¹⁴a teeŋ lwøk mo nyïëdi nø noo lwøk øøni ki rem Krictø, ŋata cïp dëëre jï Jwøk ni bäŋ gïn mo jøøŋŋi ree, ni cïbe ka ri Jwïëc Jwøk ni wø bëëdö na bäre bäre, noo døøc cwïnynyø mo waany ni wiiø tïïe mo thøø ni tïnynyø Jwøa kwøw.

¹⁵Kiper manøgønø, ena nyïjöö mar luumma tuut na nyään, kiper nee olaaw mana näk adïëri na bäŋ cuŋŋe na buuk nee ci jï jøøa cwøl, kiper mana tïme ni da ŋat mo othøw man wø wïïl geni wøk yïth moa dhalge ri luumma kwøŋ tuut na bëënge.

¹⁶'Ba kany wø näk yie da dhøk mo di caanø, wär ŋäc ni ŋata dhee caan, othøw møn.

¹⁷Kiper dhøk wø caanna køør thøø, ni kïth luup moa caan bäät tïïc køør thøø, ni bäŋ gïn mo doo kïtha bäät tïïc ni näk ŋata caan gø poot kwøw.

¹⁸Kaawat manøgønø, këël luumma kwøŋ tuut kär jïëö ni bäŋ remø dëëre.

¹⁹'Ba kanya ö Modhe na caan luupa cem bëët yïth ciik Jwøk jï jiy bëët, ena lwötö ki rem nyïïrøøe, ki rem dïëk, ki pïï ciel, ki jïëc røømmø mo kwaar, ki lïïpa, ni jør wëël ciik kiree, ki jiy bëët ki gø,

²⁰ni kööe, ni «Remmi en beeye rem luumma tuut mana ö Jwøki na cem uuni ki gø.»

²¹Ni ö eni ni jør oduŋkaara thuwø ki remø manøgø na enøgønø, ki jammi bëët moa wara tïïge ki ge kar lam.

²²'Ba jammi moa wara bëën ciik Modhe, thööthge bëët bëënynyi ka remø møn. Ni raay ba wëënni ni näk baŋ remø mo ogwier piny.

²³Kiper manøgønø, gïïa wara nyooth jap maal manynya man bëënyge ki køør olämme moøgø. 'Ba jap maal ki dëëtge manynya olämme moa beyø geni ki moøgø.

²⁴Kiper Krictø kär døny yi kanya en kur keere mana näk tïïc ka ceŋ, man wø nyooth kanya en kur keere mana näk adïëri. 'Ba ena ci maalø kiree, ni eni cuŋŋö nyïm Jwøk ennø kiperø.

²⁵'Ba eni kär dønyø ki man cïp ree cooth kaamar Kwääy Lam Mana Dwøŋ ni wø døny yi kanya en kur keere na pere leth ki yïth cwiiri bëët, ni cii ka remø mo patha remme.

²⁶Kiper onää enøgønø, gïïa leth dee jøøyø cøøn, ki kanya täk pinynyi. 'Ba atïmö ni eni ööi ka yie aciel keere ya aŋuun piny man en, ni ba nwøe këët, kiper nee raay wëënne ki køør dëëre na cïbe;

²⁷keda man bëëde no onyoodhø jï jiy, ni dhaanhø thøw yie aciel, ni køøre beeye ŋøl luup.

²⁸Kaawat manøgø thuwø Krictø na cïp yie aciel keere nee raac jiy mo thööth kääre, ocäŋ duuö, ni ba ööi kaper raay nee kääre, 'ba oööi ni piema jø wø koor eni.