Read anuak Jeemeth 2 Bible Online

Jeemeth 2 - anuak bible

Jeemeth 2

¹'Ba nyïïmera, kär dee ŋat jeenynyu kaawat man bëëdu nou ŋäätha Kwääyø ma Jecu Krictø enø, eni na Kwääy ajiem.

²Kiper ni näk da ŋat mo ööa kar acooŋa maru no oruyö ka abïïe mo beyø, ni cere da ogut warkey, ni ö ŋat mo canni thuwø, ni ööe ni käära abïïe ma nywate,

³ni tïmu nou cega ïthu ki luup ŋata røc abïïga beyø, ni kööu, ni «Pï kany, nyawat,» ni kööu jï ŋata can, ni «Cuŋŋï kaagø,» wala «Ö pï piny yïth ŋøøm buut tieta,»

⁴?aŋø, manøgø u ba tïïya apääk yïthakiyu, ni tïmu ni uuna dïŋut luup mo caara gïï mo reyø?

⁵'Ba wïnynyu nø, nyïïmera, u na mëëra ki uuni. ?Aŋø, Jwøk ba jier jø pinyi moa can na bëëde, nee kwärge ri ŋäädhe, ni ge tïmge na lwiidhi mo bura mana näk ee buuö jï jø wø mëër ki eni?

⁶'Ba ŋata can wïïe alääu. ?Aŋø, paa jøøa no okwär ni wø caan uuni? ?Paa geni ni wø pee uuni kwör løøe?

⁷?Aŋø, patha geni ni wø jany nyeŋŋa mïërö ki wøør, na caa u ree?

⁸'Ba ni näk mou tïïya ciik Jwøk møn na caal ciik nyeya keda man en yi wëël Jwøk, «Mëërï ki ŋat mør kaawat man wø mëërï ki dëërï,» nou tïïyu gø na enøgønø, u tïïya gïna beer na doo tïïö.

⁹'Ba noo tïïyu ajeeny, uuna bääyö, ni uuno nyooth ciik Jwøki ni uuna jø adhala.

¹⁰Kiper ŋat wø gwøk ciik Jwøk bëët ni baaya aciel dïge, ena tïmö ni baaya ge bëët.

¹¹Kiper eni na köö, ni «Kärï kännö ki luk,» aköö thuwø, ni «Kärï nägö ki dhaanhø.» 'Ba ni näk mo ï ba kännï ki luk, 'ba ï 'näga dhaanhø, ïïna tïmö niï dhala ciik Jwøk.

¹²Kiper manøgønø, beerra man cäänu ni tïïu ni uuna jiy mo luupge ŋøl piny ka ri luum jöör pät jiy.

¹³Kiper ŋat wø ba køny can dhaanhø mør, wø ŋøla wøk ni bäŋ køny kipere. 'Ba ŋat wø kunyö, bäŋ kany mo ŋøli wøk ki gø.

¹⁴?Nyïïmera, agïnaŋø ni beer ni näk mo dhaanhø köö, ni cwïnye da ŋäädhe, 'ba bäŋ tïïe mo tïïe? ?Aŋø, eni maar ŋääthe ka piem?

¹⁵'Ba ni näk cöögu ma dïcwøø wala nyakøø cäädhi ka dëëre ni bäŋ abïïe ni manynya cam,

¹⁶ni kö dhaanhe acielli dïïu, ni «Beer, ciï ki met ec, ïïno jäŋ ni lëënh dëërï,» ni cam ki gïïa many dëëre käre cïbö jï gø, ?agïnaŋø ni beer ri gø?

¹⁷Kiper ŋäädhe ni näk ma eni keere ni bäŋ tïïe ree, caala gïn mo othøw.

¹⁸'Ba kanymør da ŋat mo köö, ni «Ïïni cwïnyï da ŋäädhe, 'ba aani mara beeye tïïe.» Beer, nyuth a ŋäädhe marï na näk bäŋ tïïe ree, 'ba ŋäädhe mara onyoodha jïrï ki ri tïïe 'moa.

¹⁹Ïïno jïëy ni Jwøk aciel. Marï wøp. Këël anäge wø jïëy ni dëëtge miel ki lwär.

²⁰?Aŋø, ï manynya gø nee nyooth jïrï, ï ni bäŋ wïc en, ki man näk mo ŋäädhe ni näk bäŋ tïïe ree, bäŋ gïn duue?

²¹?A kwarø ma Eeberam ba jïëc ni mare beer ka køør tïïe na bëëde, kanya cïp wääde ma Aydhak no olämi bäät gïn wø cïp olämme bääte?

²²?Aŋø, kärï joodø ni ŋäädhe mare cäädhi ka tïïe moe na aciel, ni thur ŋäädhe mare kare ki køør gïna tïïe?

²³Ni ö wëël Jwøki ni thur kare, ni wø caan, ni «Eeberam Jwøk aŋäädhe, ni ö Wuuö Jwøki ni jïëc Eeberam ni ena dhaanhø mo beer ki køør ŋäädhe mare.» Ni cwøli ni ena nyawat Jwøki.

²⁴?Aŋø, käru joodø ni dhaanhø wø jïëc ni mare beer ka køør tïïe, ni patha ki køør ŋäädhe keere?

²⁵?Aŋø, këël Reeyap thuwø na näk kääbi, ba jïëc ni mare beer ka køør tïïe, kanya pänh nyïïatwieli na kwal ge wøk ki jöö mør?

²⁶Kiper manøgønø, ŋäädhe ni näk bäŋ tïïe ree, caala gïn mo othøw, kaawat man bëët dëëlli en, ni näk mo jwïëy tøør ree, othøw.