Read anuak Jeemeth 3 Bible Online

Jeemeth 3 - anuak bible

Jeemeth 3

¹Nyïïmera, kär jiy mo thööth tïmö na dïpööye dïïu. Kiper ŋäyu ni waani ni pöö en, ajäla marwa tïmö ni dwøŋŋa eni.

²Kiper ø bëët, ø wø bääö ki gïï mo thööth. 'Ba nee da dhaanhø mo ba bääyi ri gïï wø care, ena dhaanhø mo bäŋ gïn mo gwäyi jïre, ni maara lønyø jïre ki man män dëëre bäre ki raay thuwø.

³'Ba ni näk mo oguudi yøø kïth dhøk okwëënyi nee luupø leŋge, ø weya dëëtge bäre.

⁴Raŋŋu jïëth naam mø, këël na døøŋge ni ge kiiwa jame mo teek, ge wø weya ogeelle mo thenh thenh, kun wø many ŋato kiiw gø.

⁵Kaawat manøgønø, leep a thääŋ dëël mo thiinh, 'ba eni töödö ka gïï mo døøŋŋø. Neennu, paap bäre wø waaŋa maaci mo thiinh.

⁶'Ba leep caala maac, ni leep caala pinyi ni raac en, ni ena thäk dëëtø, ni raanynya dëël bäre, ni waaŋa kwøw bäre, na acaare moøgø bëët käla bäŋ anägö.

⁷Kiper teeŋ lääy bëët ki weny ki lääy mo wø muuli ki piny, ki gïï wø bëëdö yïth näm, løny ki man pwönynyi ni möölge, ni møøk onø pwöny dhaanhe.

⁸'Ba bäŋ dhaanhø mo maar lønyø jïre ki man pwöny leep nee möölle, 'ba beeye gïn mo raac mo wïïrö, ni dëëre päŋ ki jaath thøø.

⁹Ni beeye eni wø pwøø Kwäärö na näk Wääø ki gø, ni cäŋø jiy ciennø ki gø, jøøa näk ocwääö ni kïtge rööma kït Jwøk.

¹⁰Ni beeye dhøøgø na aciel enø ni wø pwöö ni cïëne. 'Ba, nyïïmera, manøgø ba doo naa enønø.

¹¹?Aŋø, jøøro wø kwönnö ki pïï mo met, ni kwönne ki pïï mo keec ki dhøøgø na aciel enø?

¹²?Nyïïmera, olaam doo nywøl ki nyïïjwiel, wala leemuun doo nywøl ki nyïïolaam? Kaawat manøgø thuwø, pï acäbö ba maar bänhnhö ni tïmge ni met.

¹³?Aŋa dïïu ni wïïe leer ni ŋäc luup? Beerra man ööe ni nyooth tïïe moe ki möölle mana öö ki ra acaara ki køør bëëtö mare na beer.

¹⁴'Ba ni näk mo cwïnynyu keec, ni ŋati man nø ŋäya dëëre keere, käru töödö ni tïmu nou kwiera adïëri mana dou ŋääö.

¹⁵'Ba acaayøgøøni patha teeŋ man wø ööi ki maal, 'ba beeye mar piny na ba en jöör Jwøk, 'ba beeye mar anägö.

¹⁶Kiper kany wø näk yie da keec, ni ŋati man nø ŋäya ree keere, kanyøca jïtö ko okiera ki teeŋ tïïe moa reyø bëët.

¹⁷'Ba acaara man wø ööi ki maal, bäŋ gïn mo raac dëëre, 'ba bëët-mëër ena ree, ki mööl, ki leŋ luup, ki køny mo päl, ki tïïe mo beyø, ni bäŋ dööti ariiø, wala atade.

¹⁸'Ba jø wø many bëët-mëër, köödhi mo wø piithge ki mëër wø kännö ki bëënynyö.