Read anuak 1 Piter 2 Bible Online

1 Piter 2 - anuak bible

1 Piter 2

¹Kiper manøgønø, weyu keec cwïny bäre, ki cwøk bëët, ka atade, ki gwön, ki wac nyeŋ bëët.

²Ni tïmu kaamar obwöre mo marr, nou manynya caak, ni beeye caak mana näk luum Jwøk na näk bäŋ gïn mo raac yie, nou døøŋŋu ki gø ki ri pïëm mana piem uuni ki gø,

³ni näk met yi Wuuö you belø møn.

⁴Ööu baŋe, eni na kïdi mo kwøw, na kwier jiyi, 'ba ki jï Jwøk ee jierø ni pere leth døc.

⁵Ni tïmu nou caala kïte mo kwøw, ni uuno geerø ni uuna øt Jwøk, nou tïmu ni uuna dïlämme moa en kur keerge, nou cïpa cwïnynyu na en køør Jwøk jï Jwøk no olämme mo wø jïëc Jwøki ki køør Jecu Krictø.

⁶Kiper ogöörö yi wëël Jwøk, ni «Neennu, aani, a kïtha yi Dhayan ki kïdi, na näk mo ojierø na pere leth na näk kïn gøøt, 'ba ŋat wø jïëy ki eni ni ŋääth gø, wïïe ba doo lääö.»

⁷'Ba ki jïïu, u no ojïëy ni ŋäädhu, pere letha jïïu. 'Ba ki jï jøø ni kär jïëy yøø, «Beeye kïnnögø ki dëëre na kwier dïgëëte, na tïmö ni beeye pïëmi mar gøøt,»

⁸na «Kïdi mano cwany tiet jiy, na kïnno wëëk ge päänhnhö.» Ni tietge cwanyge kaper na dhalge luubö, kaawat mana kwøŋ geni mëëŋ gø.

⁹'Ba uuni, uuna jiy mo ojierø, ni nägu dïlämme mo tuuŋ kwär, na jiy mo ena kur keerge, na jic Jwøk kiree, kiper nee moa beyø na tïïc ŋata cwöl uuni wøk ki yi muudhö ni kïth uuni yi taye na beer døc, nee køpu.

¹⁰'Ba dïkwøŋ u patha jiy mo nyeŋŋu ŋäc, 'ba kawaane uuna tïmö ni uuna jic Jwøk. Ni dïkwøŋ bäŋ køny mo you joodø, 'ba kawaane uuna jïtö ki køny.

¹¹U na mëëra ki uuni, a kwaya uuni, kiper mana näk uuna wëëlle nou path yi pinyi en, bëëdu ni karu bäär ki gïïa reyø wø many dëëlli ni wø këëdi ki jwïëyu.

¹²Bëëdu ki bëëtö ma wøp dï juurre, kiper manøgønø, këël ge doo cäänö dëëtu ki gïï mo reyø ni uuna jø raay, nee tïïe moa beyø ni wø tïïyu nee neenge ni jiemge Jwøk dïcäŋo lïïmme.

¹³'Ba ki køør nyeŋ Wuuö, bëëdu nou leŋa luup jøø ni teek ocïp ceŋge yøø bëët, noo näk mo kwääy paac bäre,

¹⁴wala noo näk kwääri mo atude mo ööi ka dwøre kuna jäälge jøøa näk obääyö, ni pwøcge jø wø tïïc gïï mo beyø.

¹⁵Kiper beeye mana many Jwøki ni døøyu jøøa bäŋ wïdhi na näk bäŋ gïn mo ŋäcge mo lïŋö ki køør tïïe moa beyø ni wø tïïyu.

¹⁶Bëëdu ni uuna jiy mo opädö. 'Ba bëëtö maru ni uuno pädö, kär nou døøya gø jöö man tïïu ki raay ki gø. 'Ba bëëdu ni uuna jiy mo tïnynya Jwøk.

¹⁷Wøørru jiy bëët. Ni mëërru ki nyïïmëëe. Lwäärru Jwøk. Ni wøørru nyeya mana dwøŋ.

¹⁸'Ba u na laaŋe, leŋŋu luup kwääri mou nou lwäär, ni manøgø ba tïïyu jï jø wø mwöl keerge na cwïnyge bäth, 'ba këël jø wø wïnni thuwø.

¹⁹Kiper met yi Jwøk wø ena bäät ŋat wø jïëny gïï mo leth kiper mana lääŋ Jwøk, këël na bäŋe gïn mo ee baaø.

²⁰?'Ba agïnaŋø noo pwøc uuni kipere, ni näk mo uuno bääyö ni pwöt u kipere, këël na bëëdu ni cwïnynyu you cïp piny? 'Ba ni näk mou tïïya gïn mo beer ni jwørru gïï mo leth kipere ni cwïnynyu you cïp piny, pwøc Jwøk ena bäätu.

²¹'Ba beeye gïnögø na cwøl uuni kipere, kiper Krictø thuwø gïï mo leth ajwøre kiperu, ni nyuth uuni jöö, nee jööre caathu.

²²'Ba eni bäŋ raay mo ee tïïö, ni bäŋ cwøk mo owïnynyö dhee.

²³'Ba kanya janynyi bäŋ ajaany mo ee dwøgø. 'Ba kanya jwør gïï mo leth, eni kär ŋuuö. 'Ba mare awëëk ŋat wø ŋøl luup na karge.

²⁴'Ba eni ki dëëre raay 'moø akääre ki rïŋ dëëre bäät jaath nee ø ba bëënnø raay, 'ba nee ø bëënnø moa beyø. Ni beeye ŋwiili moe na wëëk dëëtø jöönnö.

²⁵Kiper uuna kwøŋ bëëdö kaamar rööm mo orwäänyö, 'ba kawaane uuna duu baŋ Dïkwääy na näk Dïkuri mar jwïëyu.