Read anuak 1 Piter 3 Bible Online

1 Piter 3 - anuak bible

1 Piter 3

¹Kaawat manøgø thuwø, u na mään, leŋŋu luup cwøw mou, kiper këël na bëët møøki ni luum Jwøk ba leŋge, nee ge jïëcge ki køør bëët määrge na beer ni bäŋ luubö mo caange,

²kiper mana neenge bëëtö maru ni beer nou lwäär.

³'Ba wøp maru kär näk wøp dwøc wïc, ki käär warkey, ki røc abïïe, gïï wø en wøk dëër dhaanhø.

⁴'Ba wøp maru wär tïme na mööl ki lïŋŋe ni en cwïnynyu ni wø ba ränynyi, ni beege ni mïërö ki waŋ Jwøk.

⁵Kiper ya acääŋŋe määra en kur keerge na wara ŋääth Jwøk, dëëtge atïïcge ni mïërö na enøgønø, ni leŋge luup cwøwge,

⁶kaamar Ceera na lwäär Eeberam ni cwøl gø ni kwäärö. 'Ba kawaane uuna nyïïe, ni näk mou tïïya gïn mo beer, ni bäŋ gïn lwäärru mou bwøk ki gø.

⁷Kaawat manøgøøni, u na cwøw, bëëdu ki määru nou cädu kiperge, ni wøørru geni kiper geno cwääö ni jääk, kiper mana tïme ni kwøw mana cïp Jwøki ki met ec omëëk u riet, nee bäŋe gïn gëëŋ lam maru.

⁸'Ba luubö mana dööŋ keere nø, uuni bëët, beerra man dwallu cwïnynyu na aciel, ni bëëdu ni cwïnynyu jööt, ni mëërru ki nyïïmëëe, ni cwïnynyu lïëth ki køny, nou bëëdö nou mwöl.

⁹Kär nou dwøga raay jï ŋato tïïc raay dëëtu, wala ajaany jï ŋato jany uuni, 'ba mana dou tïïö, u doo gwïëtha eni. Ni beeye gïnögøøni na cwøl uuni kipere, nou gwïëth.

¹⁰'Ba «Ŋat wø mëër ki kwøw ni manynya man neen cääŋŋe moa beyø, wär leebe gwøe ki raay, ni män dhee ki luup cwøk.

¹¹Kare wär tïïe ni bäär ki raay, ni tïïc gïn wø beer, ni many bëët-mëër ni caath køør gø døøc.

¹²Kiper nyeŋ Wuuö ena bäät jø wø beyø, ni ïthe ee ciiø ki lamge. 'Ba täärnyïm Wuuö cøl ka jø wø tïïc raay.»

¹³?'Ba kawaane aŋa noo tïmmi ki gïn mo raac dëëtu, ni näk mo cwïnynyu you cïp køør gïn mo beer?

¹⁴'Ba këël gïï mo leth dou jwørø kiper moa beyø, uuno gwïëdhö. Käru lwäyö ki geni, ni ba wëëgu cwïnynyu ränynyö.

¹⁵'Ba wøørru Krictø ki cwïnynyu, ni beeye Kwäärö. 'Ba cooth bëëdu ni dëëtu you jiiø ki man dwøgu luubö jï ŋat wäro pëëny uuni kiper ŋäädhe manø ni en cwïnynyu enø. 'Ba wär dwøgu jïre nou mwöl ni you wøørø.

¹⁶Weyu cwïnynyu ni leer, kiper kany wø jany uuni, nee jø wø jany bëëtö maru na beer ki ri Krictø, nee wïthge lääge.

¹⁷Kiper doo beerra eni ki man jwør gïï mo leth kiper tïïc mo beer ni näk mo beeye mana many Jwøki, ni kaala man jwør gïï mo leth kiper tïïc mo raac.

¹⁸Kiper Krictø thuwø athøw kiper raay yie aciel na bäre bäre, ŋata beer na thuunh jøøa reyø, kiper nee ø kïth baŋ Jwøk, ki køør mana 'näk dëëre ni cäŋi wëëk kwøw ki ri jwïëy.

¹⁹Ni beeye kanya aae na pwöny jwïëy moa en kar tööc,

²⁰jøøa dhal luubö dïkwøŋ kanya bëët Jwøki ni cwïnye ee cïp piny ni kurö yïth nïr Nöa, kanya tïïc jääy, jääna piem jøøa nøk keerge na näk abära ki thøw pïï.

²¹'Ba lwøk na nyuudhi ni caal gïnögø, piema uuni kawaane, ni paa kiper man wø käl cïlö wøk dëël, 'ba beeye kwac nyïm Jwøk ki cwïny mo leer, ki køør duun Jecu Krictø wøk ki yi thøø,

²²ŋata aa maal, ni en bäät cwïï Jwøk, ni bëët nyïïatwiet maal, ki kwääri, ki teek bäre ni ge leŋa dwøre.