Read anuak 1 Piter 5 Bible Online

1 Piter 5 - anuak bible

1 Piter 5

¹Kiper manøgønø, a köömma jaak acooŋ Jwøk ni en dïïu, ni näga jaa thuwø, na ŋata neen gïïa leth na jwør Krictø, naa nywaaga ajiem mano nyooth.

²Gwøgu pïïth mar Jwøk ni en ceŋŋu, ni paa ni uuno maa ki teek, 'ba tïïyu ka met ec kaawat man wø many Jwøki; ni paa kiper nou jïtu ki jammi ree, 'ba beeye kiper mana cïbu cwïnynyu køøre bäre.

³Ni ba tïmu ni uuna kwääri bäät jøø ni en ceŋŋu yøø, 'ba bëëdu ni uuna jiy ma wøpe nee bëëtö maru ŋwaal pïïthi.

⁴'Ba kanyo nyooth Kwääy dïkwääye, uuno jïti ka adun ajiem man wø ba jøøl.

⁵'Ba u ni therø thuwø, leŋŋu luup jaak acooŋ Jwøk. Bëëdu nou mwöl ki røgu keeru karubëët, kiper Jwøk män ka jø atöör, 'ba met ec wø wëëge jøøa mwöl.

⁶Kiper manøgønø, døøyu dëëtu mo mwöl nou ena cer Jwøk na teek, kiper nee u røønye kanya näk kare.

⁷Cïbu gïï wø pär cwïnynyu ki geni cere, kiper eni lääŋŋa uuni.

⁸Koorru dëëtu, ni bëëdu ni nyeŋŋu you jabø. Kiper nyimän maru na näk anägö wïïrö ni caala ŋuu mo jwöŋö, ni eni caya ŋat mo løønye.

⁹Cuŋŋu karu ni kwierru eni, ni putu dëëtu mak ri ŋäädhe maru, ni ŋäyu gø ni nyïïmëëgu poot jwøra gïïö ni leth yøøgø yi piny bäre.

¹⁰'Ba køøre, nou nø jwørru gïïö ni leth yøø ki kany mo thiinh, Jwøa näk Jwø met ec bäre, ŋata cwøl uuni ya ajieme mana näk bäŋ cuŋŋe ki ri Krictø, oööi ki dëëre ni dwøk u karu, ni wëëk u tëënnö, ni këël tietu piny.

¹¹'Ba teek oen jïre këël na bäre bäre. Enøgønø.

¹²'Ba beeye Cilbana na cöögö mo yaa ŋäädhö ni cïba wëëlli ni ciek na gööra baŋu en cere, naa köömma uuni naa køpa gø jïïu, ni man beeye met yi Jwøk na näk adïëri. Bëëdu nou teek ri gø.

¹³Uuna määth acooŋ Babiløn, jøøa näk ojierø thuwø. Ni uuna määth wääda ma Maak thuwø.

¹⁴Määthu røgu ki nuum dhøk mar mëër. Bëët-mëër en jïïu bëët, u ni en dëër Krictø.