Read anuak 2 Piter 1 Bible Online

2 Piter 1 - anuak bible

2 Piter 1

¹Aana Cayman Piter na laŋŋø na nyïïatwiel Jecu Krictø, a määtha uuni, u na wëëk ŋäädhe mo röömi ki marwa ki ri beeny Jwøk marø, ge ki Pïëmi ma Jecu Krictø.

²Met ec ki bëët-mëër bëëde ni päl bäätu ki man ŋäyu Jwøk døøc, ki Jecu na näk Kwääyø.

³'Ba teege na näk teek Jwøk, jap kwøw bëët ki jap bëët jöör Jwøk awëëk øøni ki køør mana ŋääø eni, ŋata cwøl øøni ya ajieme ki beenynye.

⁴Ni beeye køør gïï ii, na wëëk ø jape na døøŋŋø na perge leth na buue, kiper nou bøthu ki ränynyö ni en piny ni wø ööi ki køør gïïa reyø ni wø nieŋ cwïnynyi køørge, nou tïmu nou nywaaga bëët Jwøk.

⁵Kiper manøgønø, magu dëëtu ki man kuurru ŋäädhe maru ki bëëtö ma wøp,

⁶ni kuurru bëëtö ma wøp ki ŋäc luup, ni kuurru ŋäc luup ki bëëtö kar ni teek, ni kuurru bëëtö kar ni teek ki män røk ki raay, ni kuurru män røk ki raay ki bëët jöör Jwøk,

⁷ni kuurru bëët jöör Jwøk ki mëëc nyïïmëëe, ni kuurru mëëc nyïïmëëe ki mëër.

⁸'Ba ni näk gïïögø mou, ni cwïnynyu päŋ ki ge, ge tïïya uuni nou ba jägö nou patha jiy mo bäŋ gïn mo ege duuö, nou ŋäya Kwääyø ma Jecu Krictø.

⁹'Ba ŋat wø jïre bäŋ gïïögø, ena cwør, ni neeta gïï mo kwörge cärö, ni wïïe owïl ki lwøk raay moe moa dïkwøŋ.

¹⁰Kiper manøgønø, nyïïmera, putu cwïnynyu cïp ri cwödö mana cwøl uuni ki gø ki mana jier u, nee tïme na adïëri. Kiper ni näk gïnögø tïïyu tïïö, u ba maara pädhö.

¹¹'Ba uuno wëëk jöö mo päl man dønynyu yi buya näk bäŋ cuŋŋe mar Kwääyø na näk Pïëmi ma Jecu Krictø.

¹²Kiper manøgønø, yia met ki man para wïthu cooth ki gïïögø, këël na ŋäyu geni, nou cuŋŋu nou teek ra adïëri na ŋäyu.

¹³'Ba yaa caarø ni beer jïra kany pooda naa poot kwøw ki dëël man en, ki man jiia uuni naa para wïthu,

¹⁴kiper mana ŋääa gø ni kar käl dëël man en kare cään, keda mana nyoothi ya Kwääyø ma Jecu Krictø jïra.

¹⁵'Ba manøgø, aano tïïö bääte døc, kiper kanyo tïme na køør thøø mara, nee maar lønyø jïïu ki man cäŋu wïthu parrø ki gïïögø kany wäro manynyu.

¹⁶Kiper kanya køpwa gïr teek Kwääyø ma Jecu Krictø ki öönynye, wa ba caath køør waac mo waac ka riek waŋ, 'ba waana lïŋŋe ma ajiem mare ewa neenø ki nyeŋwa.

¹⁷Kiper kanya ö eni na wëëgi wøør ka ajiem mana käl baŋ Jwøk na näk Wuuö, kanya ö dwøra öö ki baŋ Kwääy ajiem na bäŋ teeŋe na caan gïn kipere, ni «Man beeye Wääda, ŋata mëëra ki gø, na met yia ki mare,»

¹⁸dwørøgø awïnywa na ööe ki maal, kiper wa ena buute kaace bäät kïnna en kur keere.

¹⁹'Ba luumma kwøŋ nyïïkuk Jwøki køp, ajootwa na adïëri møn. Doo beerra eni jïïu ki man cegu ïthu døøc ki gøøni keda lamba mo liella yi muudhö, gøøc mano ö tiet øwi noo kwääre ni päny cëëy amöölla yïth cwïnynyu.

²⁰'Ba beerra man kwøŋu gïn ŋäc ni bäŋ gïn mo okøp nyïïkuk Jwøki yi wëël Jwøk na gïn mo køpa dhaanhe ki wïïe keere.

²¹Kiper bäŋ gïn mo okøp nyïïkuk Jwøki bäre bäre, mo käla dhi dhaanhø, 'ba ge wø køpa moa käl dhi Jwøk, kanya ö Jwïëc Jwøki na käär geni.