Read anuak 2 Piter 2 Bible Online

2 Piter 2 - anuak bible

2 Piter 2

¹'Ba da nyïïkuk Jwøk mo patha adïëri thuwø mo røkge ege thïïŋö dï jiy, kaawat mano ö dïpööye mo patha adïëri noo thïïŋge rege dïïu, jøw okäl teeŋ pwöc ränynyö baŋu ki jöö mør. Këël Kwäärö ma Jecu okwierge, ŋata ŋeew geni, ni ge käla ränynyö mo laara ö bäätge.

²'Ba jiy mo thööth oluk køør bëëtö marge na näk patha karge, ni ö jöör adïëri ni janynyi kiperge.

³'Ba kiper mano wärge ki uuni, uuno møøthge ki luup atade. 'Ba ajäla marge nutö cøøn ni ena dëëtge, ni ränynyö marge patha okääŋö.

⁴Kiper nyïïatwiet maal kär wec Jwøki kanya bääcge, 'ba gena leeŋ kar pöödö, ni kïth ge yïth buri mo cøl døc, nee bëëtge yïthge këël mano ŋøl luup marge piny.

⁵Ni jøøa cääŋŋe na bëëdö bäät piny kär wec Jwøki, 'ba Jwøk gwøga Nöa ki jiy abïriiø møøk, ni beeye Nöa na bëëdö ni køpa luup moa thïŋŋö, kanya käl jwïïö piny bäät jø raay.

⁶Ni døøc pääny Cødam ki pääny Gømöra bur, ni dïïr wïthge bëët, ni tïïya ge na nyuudhi jï jø raay.

⁷Ni piem Løøt, ŋata beer na näk cwïnye oränynyö døc ki gïïa näk patha karge na rïïŋ jø raayi køørge.

⁸Kiper ŋatøgø na beer enø cwïnye na leer wø ränynyö cooth ki gïïa näk patha karge na wara tïïcge, ni wø neete ni wø wïnynye.

⁹'Ba ni näk eni na Wuuö gïïögø ee tïïö bëët, ŋääe ki man piem jø wø wøør Jwøk ki gïï wø pääny geni, ni maa jøøa reyø kar pöödö këël dïcäŋo ŋøl luup yie.

¹⁰Ni kadha jø wø rïïŋi køør gïïa reyø ni wø nieŋ cwïnynyi køørge røk, ni wø taak teek Jwøk. 'Ba kiper na bäŋe gïn mo wøørge ni cwïnyge teek, ge ba lwäär ki man janyge moa jïge da ajiem maalø.

¹¹'Ba këël nyïïatwiet maal na døøŋŋø ge ki geni na teeka ge døc, jøøgø bäŋ wø jäälge ki dhøgi mo reyø nyïm Wuuö.

¹²'Ba geni na caal lääy na bøøre, gïïa näk ocwääö ni wø caath køør gïï wø ŋäcge ki cwïnyge, na nywöli kiper nee maaŋŋi ni nääŋŋi, ge buua gïï mo kucge, 'ba geno ränynyi ki geni ciel kanyo raany geni,

¹³ni jïtge ki gïn mo raac na kwör gïïa reyø na tïïcge. 'Ba yïthge met ki wïïrö jaak kwör kwääk ki nyeŋ cääŋŋe. Ni ge caala kït mo reyø ki gïï mo di jøøŋŋø, ni yïthge met ka atade moge, kany wø cämge ni mäthge ki caapge na thööth ki uuni na aciel.

¹⁴Ni nyeŋge ena køør käp, ni raay ba maarge wec. Ni ge maaŋŋa wïth jøøa cwïnyge cwøk. Ni cwïnyge ege pwönynyö ki wärö. Ni gena jiy mo ocienø.

¹⁵Jöö mana thïïŋ akwierge ni tïmge ni ge wïïrö, ni ge caatha jöör Beelam o Beeyör, ŋata yie met ki joot jammi ki køør tïïc raay.

¹⁶'Ba ena jook kiper gïna raac na tïïe, na tïm arëënni na näk ba luubö ni cäänö kaamar dhaanhø, ni mäna nyikuŋ Jwøk manøgø ki mana dee tïïö ki bøølle.

¹⁷'Ba jøøgø caala jøør mo bäŋ pïï yïthge, ni ge caala rwöc mo käära apøyaweerø. 'Ba kany mo cøl døc ojiiŋŋø kiperge.

¹⁸'Ba dhøkge päŋ ka atöör jammi mo oballe jaak, ni ge maaŋŋa wïth jøøa bøth kany mo cään en, ceŋ jøøa en yïth raay, ki gïïa reyø ni wø many dëër dhaanhe.

¹⁹Ni wø køpge købø jïge, ni «Uuno bëëdö ki wïthu,» 'ba ge ki dëëtge gena laak gïïa reyø. Kiper gïn wø bööt dhaanhø, eni tïmö na laŋ gïnöca.

²⁰'Ba ni näk wïthge ocäŋ maaŋŋø ni bööt geni, køør mana bøthge ki japa doo raany geni piny, ki køør ŋäc mana ŋäcge Kwääyø na näk Pïëmi ma Jecu Krictø, bëëtö mana en cään atïmö ni raaca eni døc ki bëëtö mana dïkwøŋ.

²¹Kiper doo naa beerra eni ki mana ba dege jöör adïëri kwanyø ki man cäŋge døø ŋäthge ni wecge ciik mana en kur keere na näk mar Jwøk na käl baŋge.

²²'Ba gïnögø atägö dëëtge keda man wø ŋaadi na adïëri, ni «Gwök wø cäŋa døø baŋ ŋwøge, no othur wø lööŋŋa jaak, ni cäŋa døø yo onøt.»