Read anuak 1 Jøøn 2 Bible Online

1 Jøøn 2 - anuak bible

1 Jøøn 2

¹Nyïïa, u ni therø, a gööra luubö man baŋu kiper nou ba bääyu. 'Ba ni näk da ŋat mo bääyö, jïïø da ŋat mo ena kurø buut Wuuö, ni beeye Jecu Krictø na beer.

²Ni beeye eni no olämi kiper raay moø, 'ba patha per raay 'moø keerø, 'ba beeye kiper raay mo jø piny bäre.

³Ni näk luup moa cem Jwøki yøø gwøø, beeye noo ŋääø gø ni eni ŋääø.

⁴'Ba ŋat wø köö, ni «Eni ŋääa,» ni bëëdö ni dhala gïïa ceme, ena dïtwöt, na adïëri ba en cwïnye.

⁵'Ba ŋat wø gwøk luumme, ŋatøca mëëc Jwøk othur kare cwïnye na adïëri. Ni beeye gïnögø noo ŋääø gø ni ø ena dëëre.

⁶'Ba ŋat wø köö ni eni bëëdö ree doo cäädhö ki jööra cääth Jecu ki yie.

⁷Omëëya, a ba göör dwøl mo nyään baŋu, 'ba beeye dwøl mana näk oruuö cøøn na en jïïu. Ni dwøl manøgø no oruuö enø beeye luumma wïnynyu.

⁸'Ba u poot göönna göönnö ki dwøl mo nyään, ni luummögø athur kare ki ri Jecu, ni beeye ni tïïyu enø, kiper muudhö aay en, ni tar mana näk adïëri oløny ni rïënyö.

⁹'Ba ŋat wø köö ni eni ena yi tar, ni män ki coki, eni poot ena yi muudhö.

¹⁰'Ba ŋat wø mëër ki coki bëëdö yi tar, ni yie bäŋ gïn mo wëëk dhaanhø bääyö.

¹¹'Ba ŋat wø män ki coki ena yi muudhö ni cäädha yi muudhö, ni kany wø ci yie kuue, kiper nyeŋŋe na cøøri ya muudhe.

¹²A göönna baŋu, u ni therø, kiper raay mou awec ki køør nyeŋŋe.

¹³Naa göönna baŋu, u na wëëe, kiper na ŋäyu eni na nut cøøn. Naa göönna baŋu, u na wøpe, kiper na böötu ŋata raac. Naa göönna baŋu, u no obwöre, kiper na ŋäyu Wuuö.

¹⁴Naa göönna baŋu, u na wëëe, kiper na ŋäyu eni na nut cøøn. Naa göönna baŋu, u na wøpe, kiper na teegu, ni luum Jwøk wø bëëdö cwïnynyu, ni böötu ŋata raac.

¹⁵Käru mëër ki piny wala japi ni en yi pinyi en. Ni näk da ŋat mo mëër ki piny, mëër man wø mëërö ki Wuuö ba en cwïnye.

¹⁶Kiper jammi bëët mo en piny ii, teeŋ ka gïï wø par dëëlli, ki mo wø par nyeŋŋi, ki ŋääth jap piny, gïïögø patha mo Wuuö, 'ba gena mo piny.

¹⁷'Ba piny aay ki gïïe ni wø paaye. 'Ba ŋat wø tïïc mana many Jwøki wø bëëdö këël na bäre bäre.

¹⁸Obwöre, man a aŋuun caa. 'Ba keda mana wïnynyu gø ni nyimän Krictø öö, kawaane jiy mo thööth mo män ki Krictø aöö. Kiper manøgønø, ŋääø nø, ni man beeye aŋuun caa.

¹⁹Gena aay dïïø, 'ba ge ba en dëëtø cøøn. Onää ge ena dëëtø, ge doo puta bëëtö ki øøni. 'Ba gena aay dïïø, kiper nee ge ŋäc ni ge ba en dïïø cøøn.

²⁰'Ba uuni, uuna jør ŋata en kur keere na näk mar Jwøk ki maaw, ni jammi bëët ŋäyu.

²¹A ba göön baŋu ni per na adïëri kuyu, 'ba beeye kiper mana ŋäyu gø, ni ŋäyu ni bäŋ tööt ra adïëri.

²²?Aŋa na dïtwöt? Dïtwöt beeye ŋat wø kweer ni Jecu patha Krictø. Ŋatøgø beeye na nyimän Krictø, ŋat wø kwier Wuuö ki Wäädö.

²³Ŋat mo kwier Wäädö tøør ri Wuuö. 'Ba ŋat wø jïëc Wäädö, ena ri Wuuö thuwø.

²⁴Wëëgu gïna wïnynyu cøøn bëëtö cwïnynyu. Ni näk gïna wïnynyu cøøn bëëdö cwïnynyu møn, uuno put bëëtö dëër Wäädö ki Wuuö.

²⁵'Ba gïna buue jïïø beeye kwøw mana näk adïëri mo bäŋ cuŋŋe.

²⁶A gööra luubö man baŋu kiper jøøa doo cøøk uuni.

²⁷'Ba uuni, jør maaw mana jootu baŋe ena cwïnynyu, ni bäŋe ŋat mo manynyu nou pwönynye, kiper jør maaw mare beeye wø pwöny uuni ki jammi bëët, ni beeye adïëri, ni patha tööt. 'Ba bëëdu ri Krictø, keda mana pwöny uuni.

²⁸'Ba kawaane, u ni therø, bëëdu ree, kiper kanyo ööe nee cwïnynyø dee ŋäädhe, ni ba kwalø dëëtø ki eni ni wïthø olää ki öönynye.

²⁹Ni näk ŋäyu ni mare beer, dou ŋääö ni jiy bëët mo wø tïïc gïno beer, nywøla eni.