Read anuak 1 Jøøn 3 Bible Online

1 Jøøn 3 - anuak bible

1 Jøøn 3

¹Neennu a mëër mo nyïëdi na wëëk Wuue øøni, ki man cwøl øøni ni øøna nyïï Jwøk, ni näk adïëri. 'Ba gïn wø ö pinynyi wø kuc øøni, beeye kiper mana kuc eni.

²Omëëya, øøna nyïï Jwøk ennø. 'Ba kïdö mano bëëdø ki gø poot ba nëëni. 'Ba ŋääø ni kanyo ööe ø tïmö kaamare. Kiper eno neenø keda man wø bëëde.

³'Ba jiy bëët mo wø ŋääth eni na enønø, dëëtge wø døøcge mo ciil ki raay, kaawat mare na ciil.

⁴Jiy bëët mo wø bääö wø dhala ciik Jwøk. Kiper bääyö beeye dhal ciik Jwøk.

⁵'Ba ŋäyu ni ena ö kuna wëën raay. Ni eni bäŋ raay dëëre.

⁶Ni bäŋe ŋat mo bëëdö dëëre ni bëëdö ni bääö. 'Ba ŋat wø bëëdö ni bääö, Krictø poot käre joodø wala ki man ŋäc gø.

⁷U ni therø, kär dee ŋat cøøk uuni. Ŋat wø tïïc gïn mo beer, eni beer keda mar Krictø na beer.

⁸'Ba ŋat wø bëëdö ni bääö, ena mar anägö, kiper anägö wø bëëdö ni bääö ki kanya täk pinynyi. Ni beeye na ö O Jwøki nee tïïe mo anägö raanynye.

⁹Ni bäŋe ŋat mo onywøl Jwøki mo bëëdö ni bääö, kiper bëët Jwøk ena cwïnye, ni eni ba maar bëëdö ni bääö kiper mana nywøli ya Jwøki.

¹⁰Ni beeye gïnögø noo joot jø wø näk nyïï Jwøk ki jø wø näk nyïï anägö. 'Ba ŋat wø ba tïïc gïn mo beer, ki ŋat wø ba mëër ki coki, patha mar Jwøk.

¹¹'Ba man beeye dwøra wïnynyu cøøn, ni ø doo mëër ki røgø,

¹²ni ba tïmø kaamar Keen, eni na dhaanh ŋata raac na 'näk coki. ?Aperŋø na 'näk gø? Nääe kaper tïïe moe na reyø, ni ö mo coki ni becge.

¹³Kär yïthu thäŋŋö, nyïïmera, kiper mana män pinynyi ki uuni.

¹⁴Ŋääø ni øøna pööth wøk ki yi thøø ni cøø yi kwøw, kiper mana mëërø ki nyïïmëëe. 'Ba ŋat wø ba mëër, poot ena yi thøø.

¹⁵Ŋat wø män ki coki, ena dïnääy, ni ŋäyu ni bäŋ dïnääy mo cwïnye da kwøw mana näk adïëri mo bäŋ cuŋŋe.

¹⁶'Ba gïna ŋääø mëër, ŋääø kaper mana ö Jecu na cïp jwïëye kiperø. Ni øøni thuwø, jwïëyø døø cïbö kiper nyïïmëëe.

¹⁷?'Ba ni näk da ŋat mo jïre da jap piny ni neen coki ni can, ni mec waŋe ki gø, mëëc Jwøk bëëde cwïnye nidïï?

¹⁸U ni therø, kärø mëër ki dhøgø jaak wala cäänö, 'ba mëërø ki ri tïïe ka adïëri.

¹⁹Ni beeye gïnögø noo ŋääø gø ni ø ena ra adïëri, ni beeye noo cøm cwïnynyø nyïme,

²⁰kany wø ö cwïnynyø wø pärge nyïme. Kiper Jwøk dwøŋŋa eni ki cwïnynyø, ni jammi bëët ŋääe.

²¹Omëëya, ni näk cwïnynyø ba päri, Jwøk yøø ŋäädhö møn,

²²ni gïn wäro pëënynyø joodø joodø baŋe, kiper man bëëdø ni ø gwøga gïïa ceme, ni ø tïïya gïï wø met yie ki ge.

²³'Ba gïna ceme beeye en, ni jïëø ki nyeŋ Wääde ma Jecu Krictø, ni mëërø ki røgø keda mana kööm øøni.

²⁴Jiy bëët mo wø gwøk gïïa ceme wø bëëdö dëëre, ni en dëëtge. Ni beeye ki køør Jwïëc Jwøk na wëëk øøni ni ŋääø gø ni eni bëëdö dëëtø.