Read anuak Pïëmme 10 Bible Online

Pïëmme 10 - anuak bible

Pïëmme 10

¹'Ba køør thøw Abimëlëk, Töla o Puwa, nyikwaar Dödö, na käl ri jø tuuŋ Icakar, athïïŋ nee jø Icriel pieme; 'ba eni bëëdö Camir na en yi mïëya en bäät kïte na en kur jø tuuŋ Ipariem.

²Ni bëëde na pïëmi mar jø Icriel ki cwiiri ma pïërariiø kurdäk. Køøre ena thøw, ni puti koony Camir.

³'Ba na tïme na køør Töla, Jayer nyï Gelät athïïŋ, ni bëëde na pïëmi mar jø Icriel ki cwiiri ma pïërariiø kurriiø.

⁴'Ba Jayer jïre da wääte ma pïëradäk, ni ge wø cäädhi ka bäät arëëni ma pïëradäk; 'ba geni jïge da päänye ma pïëradäk yi ŋööm Gelät, ni päänye moøgø cøøri ni Mïëc Jayer këël dïcäŋi en.

⁵Køøre Jayer athøw ni koonyi Kamön.

⁶'Ba jø Icriel acäŋ tïïö ki gïï mo nëëni ni reyø ki jï Wuuö Jwøk, ni tïnyge juuga cøøri ni Baal ka Actaröth, ki juu mo jø Aram, ki juu mo jø Caydan, ki juu mo jø Möap, ki juu mo jø Amön, ki juu mo jø Pilitin; ni putge Wuuö Jwøk wec ni ba tïnyge.

⁷Køøre wëëc Wuuö Jwøk aö bäät jø Icriel; ni ö Wuuö Jwøki ni put geni cïp ceŋ jø Pilitin ki jø Amön.

⁸Ni ö jøøgø ni putge jø Icriel caannø, ni täkge ki man dïïmge geni yi cwiineca. Ni putge bëëtö ni ge caara jø Icriel ni dïïmge geni ki cwiiri apaar ka abära, ni beege jø Icriel bëët moa en Gelät na en yi ŋööm jø Amör løø Naam Jördan ki jï kur tuul-cäŋ.

⁹'Ba jø Amön gena aay ni ŋølge Naam Jördan nee ge këëtge ki jø tuuŋ Juuda ki jø tuuŋ Benjamen ki jø tuuŋ Ipariem thuwø. Kanyøgønø, jø Icriel bëëtö marge aput tïmö ni teek døc.

¹⁰Køøre jø Icriel ajwöŋö dëër Wuuö Jwøk ni köge, ni «Waana bääyö dëërï, kiper waani, ïïna wecwa, ï na Jwøk marwa, ni tïmwa ni wa tïnynya Baal.»

¹¹'Ba Wuuö Jwøk aköö jï jø Icriel, na «?Aŋø, u kära piemø ceŋ jø Ijep, ki jø Amör, ki jø Amön, ki jø Pilitin na bëëde?

¹²?A kanya ö jø Caydan, ki jø Amalëk, ki jø Maøn, na dïïmge uuni, u kär jwöŋö dëëra, ni piema uuni ceŋge thuwø?

¹³'Ba ennø, aana nø weyu ni tïnynyu juu møøk; 'ba kiper manøgønø, u ba cäŋa piemmø këët.

¹⁴Cou ni jwöŋu dëët juu moa jierru, nee u piemge kanyo bëëdu nou ena yi bëëtö mo teek.»

¹⁵Køøre jø Icriel aköö jï Wuuö Jwøk, ni «Waana bääyö; ennø, tïïc mana näk nëëni ni beer ki jïrï jaak dëëtwa; 'ba beerra man piemï wa yie man keere nø.»

¹⁶Kanyøgønø, geni juuga path moa en yïthakicge aputge wec, ni tïmge ni ge tïnynya Wuuö Jwøk. Køøre Wuuö Jwøk cwïnye apädhö ki caarø manø ni teek ni caar jø Icriel ki gø enø.

¹⁷Kar kanyøgønø, jø Amön dëëtge adwalge kiper leny, ni öge ni tïïcge twïër marge yi ŋööm Gelät, ni ö jø Icrielli ni dwalge dëëtge thuwø, ni tïïcge twïër marge kanya cwøl ni Micpa.

¹⁸Kanyøgønø, dïbwöthe mo jø Gelät gena cäänö yïthakicge keerge ni köge, na «?Aŋa noo bwøth jiy nee jøw këëtge ki jø Amön? Ŋato bwøth leny, eni puta tïmö na kwäärö mar jøøi ni bëëdö yi Gelät bëët ii.»