Read anuak Pïëmme 11 Bible Online

Pïëmme 11 - anuak bible

Pïëmme 11

¹'Ba Jeptha nyï Gelät beeye ŋat leny mo teek døc; 'ba eni, ena o dhaaŋŋa näk kääbi. Ni wää Jeptha beeye dhaanhø mo nyeŋŋe cwøl ni Gelät.

²'Ba Gelät cïïe anyöödö ko obwöre ni jït Geläti ki wääte. 'Ba kanya tïm wääte moa nywøl cïïe manøgø ni døøŋŋø, geni Jeptha ariemge ni köge jïgø, ni «Ïïni, ï bäŋ doo jïtö ki gïrpiny mo dööŋ jïrï po wääwa kany, kiper ïïna o dhaagø mør jaak.»

³Kanyøgønø, Jeptha aput päär wøk ni ŋwieya uutwänni, ni aae ni put bëëtö yi ŋööm Thöp; ni ö jiyi mo wïthge reyø ni cooŋge dëëtge buut Jeptha, ni putge wääth køøre.

⁴'Ba kanya tïme na køøre cään, jø Amön akëëdö ki jø Icriel.

⁵'Ba gïna tägö kanya tïme ni jø Amön këëdö ki jø Icriel, jø døøŋŋø mo jø Icriel moa bëëdö Gelät, aci kuna cwølge Jeptha yi ŋööm Thöp;

⁶ni köge jï Jeptha, ni «Ööï, niï tïmï ni ïïna kwääc lwaa leny marwa, nee tïme ni maara lønyø jïwa ki man këëtwa ki jø Amön.»

⁷Køøre Jeptha aköö jï jø døøŋŋø mo jø Gelät, «?Aŋø, u kär männö ki aani na bëëde, ni riemmu aani po wära? ?Aperŋø na ööu baŋa ennø, kanya tïme nou ena yi gïn mo leth en?»

⁸'Ba jø døøŋŋø mo jø Gelät aköö jï Jeptha, ni «Kiper gïnögø møn, waana ö baŋï ennø, nee tïme ni maara lønyø jïrï ki man aaø ki ïïni ni këëdø ki jø Amön; køøre nø, ïïno tïmö na kwäärö mar jøø bëëdö Gelät bëët yøø.»

⁹Kanyøgønø, Jeptha aköö jï jø døøŋŋø mo jø Gelät, «Ni näk mou dwøga aani paac naa këëda ki jø Amön, ni ö Wuuö Jwøki ni cïp geni cera, aani a puta tïmö ni aana kwäärö maru møn.»

¹⁰Ni kö jø døøŋŋø mo jø Gelät jï Jeptha, «Beerra man tïm Wuuö Jwøki ni beeye ŋato ŋäc luummögø yïthakiyø ki ïïni; ka adïëri møn, gïnögø tïïcwa tïïö kaawat mana nø caanï gø.»

¹¹Køøre Jeptha aay ki jø døøŋŋø mo jø Gelät, ni ö jø Gelät ni tïïcge eni ni ena kwäärö na kwääc lwaa leny marge; ni ö Jeptha ni put luup moøgø bëët carø nyïm Wuuö Jwøk kanya cwøl ni Micpa.

¹²'Ba Jeptha ajääk baŋ nyeny jø Amön ki dwøl, ni kööe, «?Aŋø, agïnaŋø ni en yïthakiyø ki ïïni, ni ööï baŋa niï këëdï ki jøøa en yi ŋöömö mara en?»

¹³Ni ö nyeya mar jø Amön ni kööe jï jøøa jääŋ Jeptha, ni «Tiere beeye kiper kanya ö jø Icrielli wøk ki Ijep, ŋöömö mara aputge lwør, ni beeye ki mana täge ki Naam Arnön këël mana këët Naam Jabök ki deŋ Naam Jördan bäre. Kiper manøgønø, duu ŋöömö manøgø ki mëër jaak ennø.»

¹⁴'Ba Jeptha acäŋ jääk baŋ nyeny jø Amön ki dwøl,

¹⁵ni ö jøøgø ni caange dwør Jeptha jï nyeny jø Amön, ni köge, ni «Jø Icriel ŋöömö mar jø Möap wala ŋöömö mar jø Amön bäŋgø mo ege kälö.

¹⁶Kiper kanya ö jø Icrielli wøk ki Ijep, ge cøra jööra en dï paap ni ge coonya Naama Kwaar ni pïïcge Kadëc.

¹⁷'Ba kar kaaca, jø Icriel ajääk baŋ nyeny Ëdöm ki dwøl, ni köge, ni ‹Wa kwaya ïïni nee wa pööthwa ki dï ŋöömö marï.› 'Ba nyeny Ëdöm ïthe käre kam cek. Ni ö jø Icrielli ni jääkge baŋ nyeny Möap thuwø ki dwøl, 'ba eni kär jïëy. Kanyøgønø, jø Icriel aput bëëtö Kadëc jaak.

¹⁸«Køøre jø Icriel aay ki dï paap ni ge wïra deŋ ŋööm jø Ëdöm ki deŋ ŋööm jø Möap, ni pïïcge deŋ ŋööm jø Möap jï løøa en jï løø kur tuul-cäŋ, ni tïïcge twïër marge løø Naam Arnön løøga; 'ba jø Icriel kär pööth yi ŋööm jø Möap, kiper keew mar jø Möap beeye Naam Arnön.

¹⁹«'Ba kar kaaca, jø Icriel ajäägö ki dwøl baŋ Cëëwön nyeny jø Amör ni wø bëëdö Ëcbön, ni köge jïgø, ni ‹Wa kwaya ïïni nee wa pööthwa ki dï ŋöömö marï, ni wa pöötha kanya dewa ci yie.›

²⁰'Ba Cëëwön, jø Icriel käre ŋäädhö ki man pööthge ki dï ŋöömö mare. Kanyøgønø, Cëëwön lwaa leny mare bäre acooŋe ni cøøe ni tïïc twïër mare Jäc, ni këëde ki jø Icriel.

²¹«'Ba Wuuö Jwøk Jwø Icriel, Cëëwön ki lwaa leny mare bäre acïp ceŋ jø Icriel, ni ö jø Icrielli ni böötge jøøgø. Kanyøgønø, jø Icriel ŋöömö bäre mana bëët jø Amörri yie aputge lwør na marge kar kaaca.

²²Køøre nø, jø Icriel ŋöömö mar jø Amör bäre alwørge na marge, ni beeye ki mana täge ki Naam Arnön këël mana këët Naam Jabök, ni cäŋ tägö ki dï paap këël mana këët bäät Naam Jördan.

²³«'Ba Wuuö Jwøk Jwø Icriel beeye na riem jø Amör wøk nyïm jiye ma jø Icriel. ?Aŋø, ennø u manynya ŋöömö manøgø nee lwørru?

²⁴?Aŋø, gïna cïp jwøu ma Kemöc jïïu nee lwørru, paa gïna dou put lwør cøøn? 'Ba ennø, Wuuö Jwøk, Jwøk marwa, ŋöömö mar jøøa nø riem wøk nyïmwa beeye noo lwørwa.

²⁵?Aŋø, iï caarø ni kadha ïïni ki Balak o Cëëpör, nyeny jø Möap? ?Aŋø, awïnynyï ni Balak apïëmö ki jø Icriel na bëëde ni këëde ki geni?

²⁶?Aŋø, cwiiri moa näk dïpe adäk na beet jø Icrielli Ëcbön ka atude moe na en buute kaace, ka Aröör ka atude moe na en buute kaace, këël yïth päänye bëët moa en buut Naam Arnön, aŋø na ba lwørru päänye moøgø kar kaaca?

²⁷Kiper manøgønø, aani, bäŋ gïn mo yaa baaø dëërï, 'ba beeye ïïni na tïïö ki gïn mo raac dëëra ki køør man këëdï ki aani en. Beerra man ö Wuuö Jwøki ni wø ŋøl luup, ni ŋøl luubö manøgø dïcäŋi yïthakic jø Icriel ki jø Amön.»

²⁸'Ba nyeny jø Amön luubö mana jääŋ Jeptha baŋe käre kam leŋ na bäre.

²⁹Kanyøgønø, Jwïëc Wuuö Jwøk aput ö bäät Jeptha, ni ö Jeptha ni put ö maal ni pöödhe ki dï Gelät ki dï Maneeca; køøre ena pöödhö ki dï Micpa na en Gelät kaace; 'ba na pöödhe ki Micpa na en Gelät kaace, ena put pööth baŋ jø Amön.

³⁰'Ba Jeptha akööŋ jï Wuuö Jwøk ni kööe, «Ni näk mo jø Amön iï cïp cera na adïëri møn,

³¹kanyo duua ki baŋ jø Amön ni dëëra jööt, ŋato cur dhi øtø mara kaace jaak ni jula aani, puta tïmö na marï, ï na Wuuö Jwøk. 'Ba aani ŋatøca puta ka cïp no olämi man wø waaŋ bäre.»

³²Kanyøgønø, Jeptha aput ŋut baŋ jø Amön nee këëde ki geni; ni ö Wuuö Jwøki ni put jø Amön cïp cer Jeptha.

³³Ni ö Jeptha ni bööt geni këël mana 'näk geni ki thøø mo leth døc, ni beeye ki mana täge ka Aröör këël mana këët kany wø pïïö Minith, ni beege päänye ma pïërariiø, këël mana këët Abël-Keramim. Kanyøgønø, jø Amön wïthge aput døø piny nyïm jø Icriel.

³⁴'Ba kanya duu Jeptha na pïïe paare na en Micpa, nyaare aput joot ni ööa baŋe kuna jul eni, ni cere da anëëdö ni cäädhi ni miel. 'Ba nyaare manøgø beeye nyaare mana na aciel keere, ni bäŋ dhaanhø mør jïre këët ma dïcwøø wala dhaagø.

³⁵'Ba kanya ö Jeptha na joot nyaare, abïïge aput jeeyø ki pänh cwïny, ni kööe, «Wui, nyaara, aana määnynyï ki pänh cwïny, ni tïmï ni ïïno kwaan røk jøøa bëëdö ni yia ege cwaadø; kiper aani, luubö mara anø caana jï Wuuö Jwøk, ni ba løny jïra ki man wiila luubö manøgø këët.»

³⁶Kanyøgønø, nyaare aköö jïgø, «Awuuö, ïïni, luubö marï anø caanï jï Wuuö Jwøk møn; tïïc gïnögø dëëra kaawat mana nø caanï gø, kiper Wuuö Jwøk ïïna tïïe nee kwör coolï dëët nyïïmännï ma jø Amön.»

³⁷'Ba ena cäŋ köö jï wänni, ni «Beerra man tïïyï gïn keere jïra; a kwaya ïïni naa bëëda dïturu ki dwäde ariiø, nee tïme ni maara lønyø jïra ki man cøøa naa cäädha bäät kïte, naa jwöŋa, kiper aana nyakøø mo dëër dïcwøø poot kuua naa kär nywømø; 'ba aani, a doo aay ki nyïïawäätwa bëët.»

³⁸Køøre Jeptha aköö, ni «Ciï.» Kanyøgønø, nyaare aput wëëk wääth kiper dwäde ariiø; ni ci nyaare ni bëëde ki nyïïawääte, ni jwöŋe bäät kïte kaace, kiper ena nyakøø mo dëër dïcwøø poot kuue ni kär nywømø.

³⁹'Ba kanya thum dwäde ariiø moøgø, ena duu baŋ wänni, ni ö wänni ni tïïc gïnögø dëër nyaare ki køør kööŋ mare na nø kööŋe ki gø; 'ba eni, ena nyakøø mo dëër dïcwøø poot kuue møn ni kär nywømø. 'Ba gïnögø aput tïmö na kööŋŋö jï jø Icriel,

⁴⁰ni kany wø tïme na yi cwiir cooth, da nïne aŋween mo nyïï jø Icriel wø puta ci kun parge wïthge ki gïna tïïc nyi Jeptha, ni beeye Jeptha nyï Gelät.