Read anuak Pïëmme 12 Bible Online

Pïëmme 12 - anuak bible

Pïëmme 12

¹'Ba jø leny mo jø tuuŋ Ipariem rege adwalge kiper leny, ni ŋutge løøga ni cige pääny mana cwøl ni Capön, ni köge jï Jeptha, na «?Aŋø, aperŋø na pööthï kuna këëdï ki jø Amön en, ni wa kärï cwølø, nee wa ciwa ki ïïni? 'Ba ennø, ødï waaŋwa bäätï.»

²Køøre Jeptha aköö jïge, ni «Kar kaaca, aani ki jø leny 'moa wa ena bäät ŋaap mo teek ki jø Amön; 'ba kanya cwøla uuni, u kär öö ki man piemmu aani ceŋge.

³'Ba kanya jooda gø nou kär öö ki man piemmu aani, aani jwïëya aweta ni cøøa baŋ jø Amön ni këëtwa ki geni, ni ö Wuuö Jwøki ni cïp ge cera. ?Aperŋø na ööu baŋa dïcäŋi en, nou këëdu ki aani?»

⁴Kanyøgønø, Jeptha jø leny bëët mo jø Gelät adwale ni këëtge ki jø tuuŋ Ipariem, ni ö jø leny mo jø Gelät ni böötge jø tuuŋ Ipariem. 'Ba tier leny beeye kiper mana köö jø tuuŋ Ipariem, ni «?Wui jø Gelät, aŋø, këël na bëëdu yïthakic jø tuuŋ Ipariem ki jø tuuŋ Maneeca, u ba päny wøk ka ri tuuŋ Ipariem?»

⁵Køøre jø Gelät dhøk wäädhi mo Naam Jördan moa näk dïët ki ŋööm jø tuuŋ Ipariem amakge. Kanyøgønø, aput tïmö ni kanyo ö ŋati man nø røk jøøa reeŋø ri jø tuuŋ Ipariem okööe, na «A ŋuta løøga,» jø leny mo jø Gelät oköö jïgø, ni «?Ïïna nyï tuuŋ Ipariem?» Ni näk mo eni köö, ni «Jïra bäär,»

⁶jø Gelät oköö jïre, ni «Kööï nø ni ‹Cibølät› », 'ba eni köö ni «Thibølät», kiper mana näk ba løny ki man cwøl gø na kare. Køøre jø Gelät nyïï tuuŋ Ipariem makge maaø ni putge gø 'näk dhi waath Naam Jördan. 'Ba kar kaaca, jø tuuŋ Ipariem ma kume ma pïëraŋween kurriiø aput 'näk.

⁷'Ba Jeptha abëëdö na pïëmi mar jø Icriel ki cwiiri abïciel. Køøre Jeptha nyï Gelät athøw, ni koonyi yi pääny aciel røk päänye mo Gelät.

⁸'Ba Ibïcan nyï Bethelem abëëdö na pïëmi mar jø Icriel kanya tïme na køør Jeptha.

⁹'Ba Ibïcan jïre da wääte ma pïëradäk ki nyïïe ma pïëradäk; ni tïïc nyïïe nee nywøm wøk; ni ö eni ni känne ki nyïïakuue ki wøk jï wääte. 'Ba ena bëëdö na pïëmi mar jø Icriel ki cwiiri abïriiø.

¹⁰Køøre Ibïcan athøw ni koonyi yi Bethelem.

¹¹'Ba Ëlön nyï tuuŋ Dhebulan abëëdö na pïëmi mar jø Icriel kanya tïme na køør Ibïcan; ni ö eni ni bëëde na pïëmi mar jø Icriel ki cwiiri apaar.

¹²Køøre Ëlön nyï tuuŋ Dhebulan athøw ni koonyi Ayalön na en yi ŋööm Dhebulan.

¹³'Ba Abidön wär Ëlël nyï Pirathön abëëdö na pïëmi mar jø Icriel kanya tïme na køør Ëlön.

¹⁴'Ba Abïdön jïre da wääte ma pïëraŋween ki nyïïkwaaye ma pïëradäk, ni ge wø cäädhi ka bäät arëëni ma pïërabïriiø. Ni ö eni ni bëëde na pïëmi mar jø Icriel ki cwiiri abära.

¹⁵Køøre Abidön wär Ëlël nyï Piratön athøw ni koonyi Pirathön yi ŋööm Ipariem na en mïëya en bäät kïte na en kur jø Amalëk.