Read anuak Pïëmme 15 Bible Online

Pïëmme 15 - anuak bible

Pïëmme 15

¹'Ba na tïme na køøre cään, kanya tïme ni kany wø kac beega cwøl ni cïndë, Camcøn aci kuna liim cïïe ni käädö ki nyidiel, ni kööe, ni «Aani, a cøøa baŋ dhaagø mara kar niine mare.» 'Ba wää cï Camcøn kär jïëy ki man ci Camcønni baŋ dhaagø manøgø.

²Køøre wää dhaaŋŋøgø aköö, ni «Ki jïra cøøn ni ïïno männö ki nyaanøgø na bäre en; køøre aani, nyaanøgø acïba jï lwöbö marï nee ci jïre na dhaagø mare. ?Aŋø, coki na thiinh na käl køøre, ba pöödha eni ki mïërö ni kaala nyaanøgø? Ennø, a kwaya ïïni nee nyaana thiinh ci jïrï na kar nyaana dwøŋ.»

³Kanyøgønø, Camcøn aköö jï jøøa en kaagø, ni «Ki mano täge ennø, ni näk da gïn mo raac mo yaa tïïö dëët jø Pilitin, kär dee ŋat mo jääla aani.»

⁴Køøre Camcøn aput aay ni määe ko orude ma dïpe adäk, ni løøŋ orude ni jïp man nø di kuurö ki jïp maya ni tööc ge no oriewi riewi; ni tïïe ka ameethi, ni twöa ameeth aciel man nø dïër yïthakic jïpi ariiø.

⁵'Ba kanya nø nyep ameethi ki maac, orude aput wëëk ciin yïth beek jø Pilitin moa näk poot cuŋŋö, ni ö beelli moa no otööyö na ŋaaŋe, ki beel moa näk poot cuŋŋö ni put ge waaŋ bëët; këël omøki ki jer wø nyïïge wel na mädhi aput waaŋ thuwø.

⁶Køøre jø Pilitin aköö, na «?Aŋa na tïïc gïn en?» Ni caani jïge, ni «Beeye Camcøn cø nyi nyena käl ri jø Temna, kiper nyenøgø nyaare na no onywøm Camcønni acïbe na dhaagø jï nyen ma lwöm Camcøn.» Kanyøgønø, jø Pilitin aput ö maal ni cige, ni putge nyaanøgø ki wänni rup ki maac.

⁷'Ba Camcøn aköö jï jøøgø, ni «Kiper gïnögø anø tïïyu ennø, ka adïëri møn, kwör coola coolø dëëtu; 'ba køør manøgø, bäŋ gïn mør këët nø.»

⁸Ni ö Camcønni ni put jøøgø 'näk ni ee caarø, ni thøw jiyi mo thööth ki thøø mo leth døc; ni put aay ni bëëde yi øt kïdi mo ena bäät kïn päänya cwøl ni Ëtam.

⁹Køøre jø Pilitin aci baŋ jø tuuŋ Juuda, ni tïïcge twïër marge po jø tuuŋ Juuda, ni ö jø Pilitinni ni putge nibay dï Lëëi.

¹⁰'Ba jø tuuŋ Juuda aköö jï jø Pilitin, na «?Aperŋø na ööu baŋwa nou këëdu ki waani en?» Ni kö jø Pilitinni, ni «Waani, waana öö nee Camcøn twöcwa, nee teeŋ gïna tïïe dëëtwa tïïcwa dëëre thuwø.»

¹¹Køøre jø tuuŋ Juuda ma kume adäk aay ni pïïcge øt kïdi mana en bäät kïn päänya cwøl ni Ëtam, ni köge jï Camcøn, na «?Aŋø, kuyï ni ø bëënna jø Pilitin? ?Aŋø nø na tïïyï teeŋ gïn dëëtwa en?» Ni kö Camcønni jïge, ni «Teeŋ gïna nø tïïcge dëëra beeye na tïïa dëëtge thuwø enø.»

¹²'Ba gena köö jïgø, ni «Waana öö niï twöcwa, niï cïpwa ceŋ jø Pilitin.» 'Ba Camcøn aköö jïge, ni «Kööŋŋu nee ŋääa ki man näk uuni ki dëëtu a ba 'nägu.»

¹³'Ba jøøgø aköö jïgø, ni «Jïre bäär, waani, ï twöcwa twöö døc møn, ni cïpwa ïïni ceŋ jø Pilitin; 'ba ka adïëri møn, ï ba 'näkwa.» Køøre ena putge twöc ki thøøli ariiø mo poot nyärö, ni kälge eni wøk ki yi øt kïdi.

¹⁴'Ba kanya pïïc Camcønni Lëëi, jø Pilitin aput kwöŋŋö ni yïthge met, ni cääthge baŋe nee røømge ki eni. 'Ba Jwïëc Wuuö Jwøk aput ö bäät Camcøn ni teek døc, ni ö thøøli moa näk ceŋŋe otwöö ki geni ni putge cöötö kaamar thøør waarø mo owaaŋ maaci, ni ö thøøli moa twöc eni ki geni ni putge päth piny ceŋŋe.

¹⁵Ni jïte ki lëëm arëën, ni beeye lëëmmö mo poot nyään, ni kwany gø, ni ö jiyi mo jïtö ki kar kuma ni put geni 'näk ki lëëm arëën manøgø.

¹⁶Køøre Camcøn aköö, «Aani jiy mo jïtö ki kar kuma, anääa ki lëëm arëën; gena nääa ki lëëm arëën møn, ni ö dëët jiy moa thøw ni tïmge na athwöe, ni beege athwöe ariiø.»

¹⁷'Ba kanya nø lønye ki cäänö, lëëm arëën mana en cere aput leeŋ piny, ni cak nyeŋ kaace ni Ramat-Lëëi, na näk tiere beeye thuur lëëmmö.

¹⁸Køøre Camcøn anäk riewi døc, ni jwöŋe dëër Wuuö Jwøk ni kööe, ni «Ïïni, pïëm man ni dwøŋ en man piema jø powa ki gø, anø cïbï cera, a na laŋŋø marï en. ?Aŋø, a thøw ki riew møn ennø, nee tïme naa pätha ceŋ jøøi ni kär daŋø ii?»

¹⁹Kanyøgønø, Jwøk kany ma aguul kïdi mo ena Lëëi kaace aput cööt, ni ö pïïyi ni putge ö wøk ki yie kaagø. 'Ba kanya ö Camcønni na mäthe ki pïï, jwïëye aput duuö, ni døø dëëre kare ni teek. Kiper manøgønø, Camcøn nyeŋ jøøro manøgø aput cak na Ayn-Akörë, na näk tiere beeye jøøro mar ŋata cwödö, ni jøøro manøgø poot nut Lëëi kaace këël dïcäŋi en.

²⁰Kanyøgønø, Camcøn abëëdö na pïëmi mar jø Icriel ki cwiiri ma pïërariiø yïth nïra bëët jø Pilitinni ni jø Icriel ena ceŋge.