Read anuak Pïëmme 17 Bible Online

Pïëmme 17 - anuak bible

Pïëmme 17

¹'Ba da nyen mør mo bëëdö mïëya en bäät kïte na en kur jø tuuŋ Ipariem mo nyeŋŋe cwøl ni Mikiya.

²Nyenøgø aköö jï menni, ni «Gwet-bïrö moa näk rumme ma dïpe apaar kurciel moa no okälö baŋï, na cïënï kiperge, niï cäänö ni wïnyö jïra, ka adïëri møn, gwet-bïrö moøgø ena baŋa; beeye aani na käl ge møn.» Køøre menni aköö, ni «Nyie wääda, ennø, ïïno gwïëth Wuuö Jwøki.»

³Kanyøgønø, Mikiya gwet-bïrö moøgø na rumme ma dïpe apaar kurciel yøø, adwøge jï menni. Køøre menni aköö, ni «Aani, gwel-bïrö man bäre en, cïba kur keere jï Wuuö Jwøk kiper wääda, nee tïïc na kït gïn mo otieŋø ki kït gïn mo leeny ka gwel-bïrö na gïï mo di lamø. 'Ba nyie wääda, ennø møn, aani gwel-bïrö man duua duuö jïrï nø.»

⁴'Ba kanya ö Mikiya na duu gwet-bïrö jï menni, menni alwötö ki gwet-bïrö ma yïth rumme ma dïpe ariiø, ni cïp ge jï ŋat wø thädhö ki gwel-bïrö, ni ö ŋatøgø ni tïïc ge na kït gïn mo otieŋø ki kït gïn mo oleenyø ki gwel-bïrö ni tïmge ni bëëdö øt Mikiya.

⁵'Ba nyenøgø na Mikiya enø, jïre da øtø mo ee tïïö kiper juu mo wø wøøre, ni eno tïïö ki gïr lam mo cwøl ni ëëput, ki juugo cøøri na terapim; ni lwør wääde aciel røk wääte, ni cïp tïïc manøgø cere, kiper nee tïme na dïlämi mare.

⁶'Ba ki yïth nïrögøøni, jø Icriel bëëdö ni bäŋ nyeya jïge; ni ŋati man nø bëëdö ni tïïya mana manynye na beer ki jïre.

⁷'Ba da nyen mør mo poot na wøp mo bëëdö Bethelem na en Juuda, ma tuuŋ ki jø Juuda, ma tuuŋ jø Libay; 'ba eni bëëdö Bethelem na wëëllö.

⁸Kanyøgønø, nyï tuuŋ Libay manøgø aay ni wec Bethelem na en Juuda, kiper nee bëëde kanyo jïte yie ki kar bëëtö jaak; 'ba kanya cäädhe, ena pïï mïëya en bäät kïte na en kur jø tuuŋ Ipariem, ni gaa po Mikiya.

⁹'Ba Mikiya aköö jï nyenøgø, ni «Ï kälï kaa ennø?» Køøre ena köö jï Mikiya, ni «Aana nyï tuuŋ Libay; 'ba ennø, a käla Bethelem na en Juuda, ni mara wääth jaak naa jïta ki kany bëëda yie.»

¹⁰Køøre Mikiya aköö jïgø, ni «Bëëdï buuta kany, ni tïmï ni ïïna ŋat mo owøørø ni ïïna dïlämi kipera; køøre aani, a cïpö jïrï ki gwet-bïrö ma rumme apaar ki yi cwiir, ka abïïe, këël cam marï.» Kanyøgønø, nyï tuuŋ Libay aput pï piny.

¹¹Ni ö eni ni jïëe ki man bëëde buut Mikiya, ni put eni tïmö jï Mikiya ni caala wääde aciel røk wääte.

¹²Kanyøgønø, Mikiya nyï tuuŋ Libay alwøre ni cïp tïï lam cer gø, ni tïme na dïlämi kipere; ni ö nyenøgø ni put bëëtö po Mikiya.

¹³Køøre Mikiya aköö, ni «Ennø, ŋääa ni Wuuö Jwøk tïïö ki gïn mo beer jïra, kiper mana nø jïta ki nyï tuuŋ Libay na dïlämi.»