Read anuak Pïëmme 2 Bible Online

Pïëmme 2 - anuak bible

Pïëmme 2

¹'Ba Wuuö Jwøk na nyooth ree Gëlgela, ree acäŋ nyoothø kaamar nyïïatwiel maal kanya cwøl ni Bökim, ni kööe jï jø Icriel, ni «Beeye aani na käl uuni wøk ki Ijep, ni käla uuni yi ŋöömma kööŋa kipere ni cïba cïbö jï kwäyu. Kar kaaca aana köö, ni ‹Aani, luumma mana tuuda ki uuni ba raanynya na bäre bäre;

²ni këël uuni thuwø, u ba doo tudö ki luubö ki jiy moi ni bëëdö yi ŋöömmi en; 'ba gïna dou tïïö, u doo raanynya gïï wø cïpge bäätge ko olämme moge.› 'Ba ennø, uuni dwøra käru leŋø. ?Aperŋø na tïïyu teeŋ gïnögø?

³'Ba ennø, aani thuwø acaana gø jïïu, nyïïmännu moøgø ba riema wøk nyïmmu; 'ba geno tïmö ni caala koodhi mo cööba tiet butu, ni tïm juu moge ni caala abïëp kiperu.»

⁴'Ba kanya ö Wuuö Jwøki na nyooth ree kaamar nyïïatwiel maal na caan luupögø jï jø Icriel bëët, jø Icriel gena put jwöŋö ni döötge ege tïŋ maal.

⁵Køøre geni nyeŋ kaace aputge cak ni Bökim, na näk tiere beeye ni jiy ajwöŋö; ni cïpge ko olämme jï Wuuö Jwøk kaace.

⁶'Ba kanya ö Jøcua na wëëk jø Icriel wääth kar kaaca, jø Icriel aput aay ni jø tuuŋ man nø cøøa yïth ŋøøm mo odööŋ jïge na kurge nee macge.

⁷'Ba jø Icriel abëëdö ni ge tïnynya Wuuö Jwøk ki yïth cwiiri bëët moa beet Jøcua ni kwøw, këël yïth cwiiri bëët moa beet jø døøk Icriel moa dööŋ ni kwøw køør thøw Jøcua, ni beege jø døøŋŋø moa ŋäc tïïe bëët moa døøŋŋø na perge leth na tïïc Wuuö Jwøki kiper jø Icriel.

⁸Kar kaaca, Jøcua o Nun, na näk dhaanh Wuuö Jwøk, athøw, ni cwiiye dïpa ka apaar.

⁹Ni ö jø Icrielli ni koonyge eni yi ŋöömma no onø wëëk eni na kure, ni beeye Temna-Cëëra na en mïëya en bäät kïte na en kur jø tuuŋ Ipariem, na en jï løø wï-piny ki kïnna cwøl ni Geäc.

¹⁰'Ba jøøa en yi beenhnhø maneca bëët gena thøw thuwø, ni läpge køør kwäcge; ni ö jiyi moa en yi beenhnhø mana öö køør jøøgø ni døøŋge. 'Ba geni na en yi beenhnhø manøgø, Wuuö Jwøk kucge; këël gïïa tïïe kiper jø Icriel kucge thuwø.

¹¹Køøre jø Icriel atïïö ki gïï mo nëëni ni reyø ki jï Wuuö Jwøk, ni tïnyge juuga cwøl ni Baal,

¹²ni wecge Wuuö Jwøk, Jwø kwäcge na käl geni wøk ki yi ŋööm Ijep, ni tïmge ni ge caatha køør juu møøk røk juu mo jøøa bëëtge dïge kaagø, ni këëlge cøŋge piny ni wøørge juu moøgø; ni tïïcge Wuuö Jwøk nee goote.

¹³'Ba jø Icriel Wuuö Jwøk awecge ni tïnyge juuga cøøri ni Baal ki Actaröth.

¹⁴Ni ö Wuuö Jwøki ni put wëër døc ki jø Icriel, ni cïp geni ceŋ jøøa twier japge, ki nyïïmän moge moa bëëtge dïge, ni tïmge ni ge ba maar cuŋŋö nyïm nyïïmänge kany wø tïme na ri leny.

¹⁵Kanyøgønø, aput tïmö ni kany wäro cige yie jaak, Wuuö Jwøk bëëdö ni tïïö ki gïï mo reyø dëëtge, kaawat mana nø caan gø na nø kööŋe jïge; ni put bëëtö marge tïmö ni teek døc.

¹⁶Køøre Wuuö Jwøk jiy mo piem jø Icriel ki køørge athïïŋe, nee jø Icriel kønyge ceŋ jøøa twier japge.

¹⁷'Ba këël na bëëde na enøgønø, jø Icriel ge poot bëëdö ni dööt pïëmme moge ba wïnyge, kiper ge poot bëëdö ni cwïnyge onieŋ køør juu møøk, kaawat man wø tïïc dhaaŋ paaci mo rïïŋö køør käp. Geni cøŋge wø këëlge piny ni ge wøøra juu moøgø. Ni ge wø laara gaa wøk ki øtjöö mana caath kwäcge kanya bëët kwäcge ni ge gwøga ciik Wuuö Jwøk; 'ba ge kär bëëdö ki bëëtö mana beet kwäcge.

¹⁸'Ba kany wø tïme ni Wuuö Jwøk pïëmi man nø di thïïŋö jïge, eni puta bëëtö ni nut buut pïëmi mano thïïŋe, ni køny jø Icriel ceŋ nyïïmän moge yïth nïr kwøw mo wø beet pïëmi manøgø; kiper Wuuö Jwøk cwïnye opädhö ki cooyø marge ki køør gïna tïïc jøøa dïïm geni na caar geni.

¹⁹'Ba kany wø tïme ni pïëmi thøw, geni na jø Icriel yøø, ge puta døø cään, ni kwierge jöör Jwøk, ni tïïge ki gïï mo reyø ni kaala moa tïïc wëëkge; ni caathge køør juu møøk ni tïnyge geni ni këëlge cøŋge piny ni ge wøøra geni; ni gïïa temge ki teek wïc marge ba wecge.

²⁰Kiper manøgønø, Wuuö Jwøk aput wëër døc ki jø Icriel, ni kööe, ni «Jøøi ii kiper mana kaalge luubö mara mana tuuda, na köömma kwäcge ki gø, ni kärge luumma leŋø,

²¹aani, wïth juurre moa dööŋ ni kär dïïm Jøcua kanya thøøe, ba riema wøk nyïmge këët.

²²Gïnögø otïïa kiper nee jøøgø tïmge ni jø Icriel di päärö ki rege, ki man näk mo geni jöör Wuuö Jwøk caathge caadhø kaawat mana tïïc kwäcge, wala jïge bäyö.»

²³'Ba Wuuö Jwøk wïth juurre moøgø aput wii yi ŋöömmögø, ni käre cïp cer Jøcua kanya poode ni kwøw, ni ge käre laar riem wøk thuwø nyïm jø Icriel køør thøw Jøcua.