Read anuak Pïëmme 20 Bible Online

Pïëmme 20 - anuak bible

Pïëmme 20

¹Køøre jø Icriel bëët aö wøk ki kwöra enge yïthge, ni beeye ki mana täge ki Daan na en wï-piny këël mana këët Bëërcïïba na en tier-piny, ni rwöpa ŋööm Gelät bäre na en jï løø kur tuul-cäŋ; ni ö lwaaki ni dwalge rege ni tïmge kaamar dhaanhø aciel nyïm Wuuö Jwøk kanya cwøl ni Micpa.

²'Ba kwääc lwaae mo jiy bëët, moa käl wïth tuŋi mo jø Icriel bëët, gena cuŋŋö nyïm lwaa jic Jwøk ma kume ma pïëraŋween, ni beege jø leny mo wø cäädhi ni këëdi ka piny, mo ceŋge da jap leny.

³Ni ö jø tuuŋ Benjamen ni wïnyge gø ni jø Icriel rege ege nø dwal Micpa. 'Ba jø Icriel dëëtge apëënyge ni köge, ni «Caannu jïwa ki man näk gïn ni raac en otägö nidïï.»

⁴Kanyøgønø, aløk nyï tuuŋ Libay, cø nyaana no onääö, ni kööe, ni «Aana öö ki cïïa nee wa butwa Giba na en kur jø tuuŋ Benjamen.

⁵'Ba jø Giba aö maal bääta ni putge deŋ øtø mar ki wäär kipera, ni ge manynya man 'näkge aani na bëëde; køøre cïïa aputge raanynyø, këël mana put thøø.

⁶Køøre aani, dëër cïïa alwøra ni ŋøra gø na thäŋi, ni jääŋŋa thäŋi moøgø dï Icriel bäre kwöra bëët jø Icrielli yïthge na no odööŋ jïge na kurge, kiper mana ö jø Giba na tïïcge gïn mo raac mo määnö dï Icriel.

⁷Ennø, u jø Icriel, cïpu acaare mou ni cäänu bääte kany ennø.»

⁸Køøre jiy bëët aput ö maal ki dhøk aciel ni köge, ni «Ennø, bäŋ ŋat mo døø poge rewa këët, këël ŋat mo døø paare, bäŋgø thuwø.

⁹'Ba ennø, man beeye gïno tïïø dëët jø Giba; ø cøøa baŋge nøø këëdö ki geni ki køør ŋïïce mo wø tïïc ki ri baw mano nyooth Jwøki.

¹⁰'Ba øøni, ø doo kwänyö ki jiy møøk, ni kanyo kwanyø jiy moøgø, ni näk mo jiy ma dïpa, jiy apaar døø lwørø; wala ni näk jiy ma kuma, jiy ma dïpa døø lwørø; wala ni näk mo jiy ma kume apaar, jiy ma kuma døø lwørø; ni jøøgø kwanyø røk wïth tuŋi mo jø Icriel bëët, nee tïmge ni käära caammi kiper jø leny, nee jø leny pïïcge Giba na en kur jø tuuŋ Benjamen, nee tïme ni løny jïge ki man tïïcge gïna dige tïïö dëët jø Giba, kiper gïna raac na määnö na tïïcge dï jø Icriel.»

¹¹Køøre jø Icriel bëët rege adwalge nee ge këëtge ki jø Giba, ni dëëtge ege kuurö ni tïmge kaamar dhaanhø aciel.

¹²Køøre jø wïth tuŋi mo Icriel ajäägö ki jiy baŋ jø tuuŋ Benjamen bëët, ni köge, «?Aŋø, a teeŋ gïnaŋø ni raac na tägö dïïu en?

¹³'Ba ennø, jøø ni wïthge reyø ni bëëdö Giba yøø, cïbu ceŋwa, nee ge 'näkwa, kiper gïn ni raac en nee raanywa dï Icriel.» 'Ba jø tuuŋ Benjamen dööt nyïïmëëkge ma jø Icriel kärge kam leŋ.

¹⁴Køøre jø tuuŋ Benjamen moa en yïth päänye bëët rege acooŋge Giba, kiper nee ge aage wøk baŋ leny ki jø Icriel.

¹⁵'Ba jø tuuŋ Benjamen moa öö ki yïth päänye dïcäŋeca beege jø leny ma kume ma pïërariiø ka abïciel mo ceŋge da jap leny, ni jø leny ma dïpe abïriiø moa teek døc røk jø Giba kär kwaan rege.

¹⁶'Ba ki røk jø leny moøgø bëët, da jiy ma cäm juu ma dïpe abïriiø mo teek døc, ni ŋati man nø dïge ŋäc thöör, ni këël jëënnö kiree ba baae, kany wø thöödhe ki gïr leny mo tïïc ka kaw man wø thöör ni di wïrö ni kïdi ena yie.

¹⁷'Ba jø Icriel kwäänge beege jiy ma kume ma dïpe aŋween mo ceŋge da jap leny, ni jø tuuŋ Benjamen tøør rege; ni jøøgø beege jø leny bëët.

¹⁸'Ba jø Icriel aö maal, ni aage Bëthël kuna pëënyge Jwøk ni köge, na «?A jø tuuŋ mane noo bwøth leny jïwa nee wa këëtwa ki jø tuuŋ Benjamen?» Køøre Wuuö Jwøk aköö, ni «Beeye jø tuuŋ Juuda noo bwøth leny dïkwøŋ.»

¹⁹Køøre jø Icriel apäny maal ka amöölla, ni cige ni tïïcge twïër marge buut Giba, nee këëtge ki jø paanøgø.

²⁰Ni ö jø Icrielli ni aage baŋ leny ki jø tuuŋ Benjamen, ni putge rege cïïmmö na dhøgi kiper nee këëtge ki jø tuuŋ Benjamen moa en Giba.

²¹Køøre jø tuuŋ Benjamen aput ö wøk ki Giba, ni putge jø Icriel ma kume ma pïërariiø kurriiø 'näk dïcäŋeca, ni put pinynyi gääbö ki jiy moa thøw.

²²'Ba jø leny mo jø Icriel cwïnyge amakge ni cäŋge rege cïïmmö na dhøgi kiper leny kanya kwøŋge rege cïïmmö yie na dhøgi dïkwøŋ.

²³Køøre jø Icriel aay ni jwöŋge dëër Wuuö Jwøk këël mana päth cäŋŋi, ni pëënyge Wuuö Jwøk, ni köge, ni «?Cäŋwa ci baŋ nyïïmëëkwa ma jø tuuŋ Benjamen, nee wa këëtwa ki geni?» Køøre Wuuö Jwøk aköö, ni «Cou baŋge ni këëdu ki geni.»

²⁴Køøre jø Icriel acäŋ ö baŋ leny ki jø tuuŋ Benjamen kanya tïme na ri riet nïne.

²⁵Kanyøgønø, jø tuuŋ Benjamen aput ö wøk ki Giba thuwø kanya tïme na ri riet nïne, ni ö jø lenynyi mo jø Icriel ma kume apaar ka abära mo ceŋge da jap leny ni cäŋge ge nägö, ni put pinynyi gääbö ki jiy moa thøw.

²⁶Køøre jø leny mo jø Icriel, këël jiy bëët, gena aa Bëthël ni jwöŋge yie; ni bëëtge kaace nyïm Wuuö Jwøk, ni mänge dëëtge ki cam ki yi cäŋögø bäre këël mana päth cäŋŋi. Ni cïpge jï Wuuö Jwøk ko olämme mo wø waaŋ bäre ko olämme mo wø duunni ki mëër.

²⁷'Ba jø Icriel Wuuö Jwøk apëënyge kiper gïna dige tïïö; kiper yïth nïrögøøni acanduk man wø nyooth luumma tuut Jwøki ki jiy ena kaace;

²⁸ni ki yïth nïrögø thuwø Piniac wär Eliedhar nyikwaar Aran bëëdö ni cuŋŋö nyïm acanduk manøgø ni tïïya tïï dïlämi kaace. 'Ba jø Icriel aköö, ni «?Cäŋwa ci baŋ nyïïmëëkwa ma jø tuuŋ Benjamen, nee wa këëtwa ki geni, wala wecwa?» Køøre Wuuö Jwøk aköö, ni «Cou baŋge, kiper diøø aani jøøgø cïba ceŋŋu.»

²⁹Kanyøgønø, jø Icriel jiy møøk aputge tïïc nee rege kange deŋ Giba.

³⁰Ni ö jø Icriel ni cige baŋ leny ki jø tuuŋ Benjamen ri dää nïne, ni cïïmge rege na dhøgi kiper nee ge këëtge ki jø Giba, kaawat mana tïïcge dïkwøŋ.

³¹Køøre jø tuuŋ Benjamen aö wøk nee këëtge ki jø leny mo jø Icriel; ni ö jø lenynyi mo jø Icriel ni peege geni kany mo bäär ki pääny, ni täk jø tuuŋ Benjamen ki man këëtge, ni nääge ki jiy røk jø Icriel, kaawat mana tïïcge dïkwøŋ. Ni jiy moa 'näkge beege jiy mo jïtö ki pïëradäk, ni jiy moøgø 'näkge pwöla ki uutjïëthe; ni uutjïëthe moøgø, mana dïkwøŋ beeye jöö mano ci Bëthël ni maya beeye mano ci Giba.

³²'Ba jø tuuŋ Benjamen aköö, ni «Wïthge dïïrø dïïrö, ka teeŋ mana dïkwøŋ.» 'Ba jø Icriel onø köö, ni «Wärø reeŋø kiper nee ge peeø uutjïëthe kany mo bäär ki pääny.»

³³Køøre jø leny mo jø Icriel acuŋŋö ni løkge rege ki kwöra reŋge yïthge, ni cïïmge rege na dhøgi kanya cwøl ni Baal-Tamar; ni ö jø Icrielli moa näk rege ege kanø ni pänyge maal ki kanya enge yie pwöl Giba.

³⁴'Ba kanya ö jø lenynyi ma kume apaar moa teek døc røk jø Icriel bëët na öge baŋ leny ki jø Giba, leny aput tïmö ni teek døc; 'ba kuc jø tuuŋ Benjamen ni ränynyö mo dwøŋ døc nyänhnha bäätge.

³⁵Kanyøgønø, Wuuö Jwøk wïth jø tuuŋ Benjamen aput dïïr nyïm jø Icriel; køøre jø Icriel jø tuuŋ Benjamen ma kume ma pïërariiø kurbïïc ki dïpa aciel aputge 'näk dïcäŋeca, ni beege jø leny moa näk ceŋge da jap leny bëët.

³⁶Kanyøgønø, jø tuuŋ Benjamen aputge joot ni wïthge odïdö. 'Ba kar kaaca, kanya tïme na ri leny, jø Icriel adøø ŋäthge ni wecge jø tuuŋ Benjamen, kiper ge ŋäätha jøw moa no okanø na näk ege cïp kaace nee ge këëtge ki jø Giba.

³⁷'Ba jøøa näk rege ege kanø, gena laar reeŋø ni läätge Giba, ni nigebay dï pääny bäre, ni 'näkge jiy bëët ko opëëlle.

³⁸'Ba gïna no otïïö na ŋïï yïthakic jø leny mo jø Icriel møga ki jø leny moa näk rege ege kanø, beeye ki man ö jøøa näk rege ege kanø ni waaŋge pääny nee jïrö mo dwøŋ neetul ki dï pääny,

³⁹kiper nee jø Icriel møga nee cäŋge duu baŋ leny ki jø tuuŋ Benjamen. 'Ba gïna tägö ri leny kar kaaca, jø tuuŋ Benjamen atägö ki man këëtge, ni nääge ki jiy mo jïtö ki pïëradäk røk jø Icriel, ni köge, ni «Ka adïëri møn, wïthge dïïrø dïïrö kaawat mana dïkwøŋ.»

⁴⁰'Ba kanya ö jïrö na neetul ki dï pääny, jø tuuŋ Benjamen alwïthö ŋäthge, ni jootge gø ni pääny bäre waaŋ, ni jïrö onitul.

⁴¹'Ba kar kaagø, jø Icriel nyïmge aputge løk, ni ö jø tuuŋ Benjamen ni put cwïnyge bwøk, kiper ajootge ni ränynyö mo dwøŋ døc nyänhnha bäätge.

⁴²Kanyøgønø, jø tuuŋ Benjamen ŋäthge aputge luk jø Icriel ni reŋge, ni ge reŋŋa jï kuna näk da dï paap; 'ba gena maa lenynyi dïër, ni ö jø tuuŋ Benjamenni moa ö wøk ki yïth päänye ni puti ya jø Icrielli nää dïër.

⁴³Ni ö jø Icrielli ni cielge jø tuuŋ Benjamen dïër, ni ŋwiecge køørge ni rege kärge jwömö, ni putge jø tuuŋ Benjamen mak, ni 'näkge geni kanya näk dïët ki Giba na en jï løø kur tuul-cäŋ.

⁴⁴Ni ö jø tuuŋ Benjamenni ma kume apaar ka abära ni putge thøø kaaca, ni beege jø leny moa teek bëët.

⁴⁵'Ba moa dööŋ, ŋäthge aløkge ni reŋge jï kuna näk da dï paap bäät kïnna cwøl ni Rimön; 'ba jiy ma kume abïïc amaa jø Icrielli uutjïëthe ni 'näkge geni. Køøre gena cäŋ läp køørge, ni maage geni Gidöm, ni cäŋge nääö ki jiy ma kume ariiø røkge.

⁴⁶'Ba jø tuuŋ Benjamen moa thøw dïcäŋeca beege jiy ma kume ma pïërariiø kurbïïc, ni beege jø leny moa teek bëët na näk ceŋge da jap leny.

⁴⁷'Ba dëët jøøa reŋ jï kuna näk da dï paap, jiy ma dïpe abïciel abøth ni pïïcge bäät Kïn Rimön, ni putge bëëtö kaaca ki dwäde aŋween.

⁴⁸Køøre jø Icriel aduu baŋ jø tuuŋ Benjamen moa no odööŋ mïëri møga, ni 'näkge geni ko opëëlle, ni beege cwøw ki mään ko obwöre bëët, ki lääc paac, këël gïïa jootge bëët. Ni putge mïëri bëët mo jø tuuŋ Benjamen moa jootge kaace waaŋ.