Read anuak Pïëmme 21 Bible Online

Pïëmme 21 - anuak bible

Pïëmme 21

¹'Ba kar kaaca, jø Icriel onø kööŋ kanya enge Micpa, ni köge, ni «Kär dee dhaanhø dëëtø mo cïpa nyaare jï nyï tuuŋ Benjamen nee nywøme.»

²Køøre jø Icriel aö Bëthël ni putge bëëtö ni geno pï piny kaace nyïm Jwøk këël mana päth cäŋŋi, ni ge jwöŋö døc ni döötge ege tïŋ maal.

³Ni köge, «Wui, Wuuö Jwøk, Jwø Icriel, ?aperŋø na ö teeŋ gïnni na täge dï jø Icriel, ni tïm wï tuuŋ acielli ni tøør dï jø Icriel dïcäŋi en?»

⁴'Ba na tïme na dïcäŋ maya, jø Icriel alaar päny maal ka amöölla cøøn, ni tïïge ki gïn wø cïp olämme bääte kaace, ni cïpge ko olämme mo wø waaŋ, ko olämme mo wø duunni ki mëër.

⁵Køøre jø Icriel apëëö, na «?A jø dhi øde mane røk wïth tuŋi mo jø Icriel bëët, na näk kär ö baŋ acooŋa nyïm Wuuö Jwøk?» 'Ba gïnögø acaange kiper geno nø kööŋ døc kiper jø dhi ødo näk kär ö baŋ acooŋa nyïm Wuuö Jwøk kanya enge Micpa, ni köge, ni «Ka adïëri møn, jø dhi ødøgø put ka 'näk møn.»

⁶'Ba jø Icriel cwïnyge apädhö døc kiper nyïïmëëkge ma jø tuuŋ Benjamen, ni köge, ni «Wï tuuŋ aciel oŋul wøk røk wïth tuŋi mo jø Icriel dïcäŋi en!

⁷?Agïnaŋø noo tïïø nø, nee jø tuuŋ Benjamen moøgø no odööŋ yøø jïtge ki mään? Kiper øøno nø kööŋ ki nyeŋ Wuuö Jwøk ni kär dee dhaanhø dëëtø mo cïpa nyaare jï nyï tuuŋ Benjamen nee nywøme.»

⁸'Ba jø Icriel aköö, na «?A jø dhi øde mane røk wïth tuŋi mo jø Icriel na näk kär ö baŋ acooŋa nyïm Wuuö Jwøk kanya enø Micpa?» 'Ba ka adïëri møn, bäŋ dhaanhø aciel mo okam ö twïër kar acooŋa ki røk jø Jabic-Gelät.

⁹Kiper kanya ö jø Icrielli na kwaani kar kaace, ka adïëri møn, ki røk jøøa bëëdö Jabic-Gelät, bäŋ dhaanhø aciel dëëtge mo okam joot twïër kaace.

¹⁰Kanyøgønø, jø acooŋa ajäägö ki jø leny mo teek døc ma kume apaar kurriiø nee cige Jabic-Gelät; ni köömge jøøa jääŋge yøø, ni köge, ni «Cou; jiy moø ni bëëdö Jabic-Gelät bëët yøø, 'nägu ko opëëlle, këël mään ko obwöre moa thenh thenh bëët.

¹¹'Ba gïn en beeye gïno tïïyu; cwøw bëët, këël mään bëët moa ŋäc dëët cwøw, wär putu 'näk na bäre.»

¹²'Ba kanya ö jøøgø na cige, gena jïtö ki mään ma nyïïakuue mo dëët cwøw poot kucge ma dïpe aŋween røk jøøa bëëdö Jabic-Gelät; ni kälge nyïgögø twïër mana en Cëëlö, na en yi ŋööm Keenan.

¹³Køøre jø acooŋa bëët ajäägö ki dwøl ni cäänge ki jø tuuŋ Benjamen moa en bäät Kïn Rimön, ni ge caana luum mëër jïge.

¹⁴Ni ö jø tuuŋ Benjamenni ni putge duu paac kar kaagø, ni ö jø Icrielli ni cïpge nyïga mak ri leny jïge, ni beege nyïga käli na wec ni kwøw røk määra bëëdö Jabic-Gelät; 'ba nyïgögø arëëm ni kär rømø ki kwään jø tuuŋ Benjamen moøgø.

¹⁵'Ba jø Icriel cwïnyge apädhö døc kiper jø tuuŋ Benjamen, kiper gïna tïïc Wuuö Jwøki na lääm kar jø tuuŋ Benjamen dï wïth tuŋi mo jø Icriel.

¹⁶Køøre jø døøk acooŋa aköö, na «?Agïnaŋø noo tïïø nø, nee jø tuuŋ Benjamen moøgø no ocäŋ dööŋŋö yøø, jïtge ki mään? Kiper mään moge wïthge adïïr bëët.»

¹⁷Ni cäŋge köö, ni «Beerra man ö jø tuuŋ Benjamen moa no obøth ki thøø ri leny ni duuge yi ŋöömö mana no onø cïp jïge na marge, nee nyeŋ wï tuuŋ manøgø ba rwäänye dï jø Icriel.

¹⁸'Ba øøni, nyïïø ba døø cïbö jï jø tuuŋ Benjamen nee nywømge. Kiper ø na jø Icriel, øøno nø kööŋ, ni kööø, na ‹Acïëni oen bäät ŋato cïp nyaare jï nyï tuuŋ Benjamen nee nywøme.› »

¹⁹Kanyøgønø, jø døøk Icriel aköö, ni «Neennu, da ajwöma mar Wuuö Jwøk mo wø di tïïö ki yi cwiir cooth, ni tïïca Cëëlö.» 'Ba Cëëlö ena bäät cwïïc ki Bëthël, ni ena jï kur tuul-cäŋ ki øtjöö mana aay ki Bëthël ni coonya Cekam, ni ena bäät caam ki Leböna.

²⁰Ni ö jø døøk Icrielli ni köömge jø tuuŋ Benjamen moa rëëm ni kär jïtö ki mään, ni köge, «Cou, ni kanu dëëtu yïth pwöth omøki,

²¹ni kuru ki kaace; 'ba kanyo ö nyïïakuk Cëëlö wøk baŋ meeŋ, wäru putu ö wøk ki yïth pwöth omøki, ni ö ŋati man nø dëëtu ni mäge ki dhaagø røk nyïïakuk Cëëlö nee ci jïre na dhaagø, ni putu aa yi ŋööm jø tuuŋ Benjamen.

²²'Ba kanyo ö wëëk nyïïakuue moøgø wala nyïïmëëkge moa näk cwøw noo öge ni ge pëënynya waani kiper nyïïge, køøre nø, wa läwa köö jïge, ni ‹Bääthu yïthu kiper gïna caanwa jï jø tuuŋ Benjamen, ni weyu nyïïu nee putge ci jïge, kiper øøni, kanya këëdø ki jø Jabic-Gelät, mään moa kälø kär rømø ki jø tuuŋ Benjamen. 'Ba këël uuni, kiper mana näk paa u na cïp nyïïu jïge, bäŋ bääyö bäätu thuwø.› »

²³'Ba jø tuuŋ Benjamen gïnögø aputge tïïc, ni kätge ki mään røk nyïga ö baŋ meeŋ, ni kälge ni ege päärö ki kwäänge, ni putge aay ki geni. Køøre gena put aay ni døøge yi ŋöömö mana no odööŋ jïge na marge, ni cäŋge päänye moa en kaace geerrø, ni putge bëëtö yïthge.

²⁴Kar kaagø nø, jø Icriel atïŋŋö ki kanya enge yie Bëthël, ni ö ŋati man nø ni døø kanya en wï tuuŋ marge yie, ni pööth poge; ni ö geni bëët ni døøge yïth ŋøøm moa no odööŋ jïge na moge.

²⁵'Ba ki yïth nïrögøøni jø Icriel bëëdö ni bäŋ nyeya jïge; ni ŋati man nø bëëdö ni tïïya mana manynye na beer ki jïre.