Read anuak Pïëmme 5 Bible Online

Pïëmme 5 - anuak bible

Pïëmme 5

¹Dïcäŋeca Diböra ki Barak wär Abiniem duut man awärge ni köge,

²ni «Pwøyu Wuuö Jwøk, kiper dïbwöthe mo jø Icriel cwïnyge ajïtö ki cer ni bwøthge jiy, ni ö jø Icrielli ni cïpge dëëtge, ni cige baŋ leny ni yïthge met.

³Wui, u na nyeye, wïnynyu gïn! Wui, u na bëën mïëri, cegu ïthu! Aani, a wär ki duut jï Wuuö Jwøk; a wär ki duut naa pwøya Wuuö Jwøk, Jwø Icriel.

⁴«Awuuö Jwøk, kanya lwönnï wøk ki yi ŋööm Cëër, kanya cäädhï niï leeŋŋa bäätï niï lwönnï ka yi ŋööm jø Ëdöm, piny aput tïmö ni jäŋŋi, ni ö køthi ni lwöre, këël pøøl aløy ni tïmge na pïï.

⁵Kïte atïmö ni jäŋŋi ki teegï, ï na Wuuö Jwøk; këël Kïn Caynay atïmö ni jäŋŋi ki teegï, ï na Wuuö Jwøk, Jwø Icriel.

⁶«Kanya bëëde na ri Camgar wär Anath, këël kanya bëëde na ri Jaël, nyeŋ jïëthe moa ŋäc athuk, ni tïm jiyi ni cäädhi ka nyeŋ jïëthe moa no oŋatø;

⁷ni ö jø Icrielli moa bëëdö yïth mïëri moa en wøk ni dakge, ni dööŋ mïëri moøgø keerge, këël mana tïme naa ööa maal, a na Diböra en; naa ö maal ni aana mïïö jï jø Icriel.

⁸Kanya ö jø Icrielli na jierge juu møøk kiper dëëtge, nyïïmän moge aput öö ki lenye mo teek këël dhøk kiiri moge. 'Ba dï jø leny mo jø Icriel moa näk jïtö ki kume ma pïëraŋween, bäŋ dhaanhø mo ojoodø ni cere da kwöt leny ki tøŋ.

⁹«'Ba ennø, cwïnya atïmö ni met ki u na kwääc lwaae mo jø Icriel, ki u na cïp dëëtu ki met ec, na ci baŋ leny kiper jø Icriel; beerra man pwøyu Wuuö Jwøk.

¹⁰U na kwöru døøŋŋø ni wø cäädhi ki bäät arëëni moa tar, ki u na no okwär ni wø bëëdö kwör bëëte mo kwär, këël u na can ni wø cäädhi ki tietu nyeŋ jïëthe, caarru gïna tïïc Jwøki.

¹¹Dööt jø leny awïnyö ki kwör wø um jiyi yïthge ki pïï, ni ge cara gïr japa näk adïëri na tïïc Wuuö Jwøki, ni beeye gïr japa näk adïëri moa tïïc Wuuö Jwøki kiper jø Icriel moa bëëdö yïth mïëri moa en wøk; ni put tïmö ni løny jï jic Wuuö Jwøk ki man døøge kwör acooŋe moge na en dhøk kiiri mo mïëri moøgø.

¹²«Wui Diböra, ka ööï maal nø, ö maal, ni wärï ki duut. Wui Barak wär Abiniem, ö maal ni ciï baŋ leny nee jiy magï.

¹³Kanyøgønø, jø Icriel moa no odööŋ ni kwøw, rege acooŋge buut kwääc lwaae, ni beege jic Wuuö Jwøk na ö baŋa, a na Diböra, ni gena jø leny moa teek.

¹⁴Ki røk jøøa öö, beege jø tuuŋ Ipariem na bëëdö ni tietge onø këët piny yi ŋöömma kwøŋ jø Amalëki bëëdö yie, ni beege jøøa caath køøru, u na jø leny mo jø tuuŋ Benjamen; ni ö kwääc lwaae moa käl ri dhi øt Makir ni öge; 'ba ki røk jø tuuŋ Dhebulan, beege kwääc lwaae moa näk käära athøre mo kwär.

¹⁵Këël kwääc lwaae mo jø tuuŋ Icakar ena kanya ciel ki Diböra; kare møn, jø tuuŋ Icakar adwätö ki Barak; ni putge rwäänhnhö køøre ni ge løøya piny yi ŋöömma näk ree ee päärö. 'Ba jø tuuŋ Ruben na näk bëëdö yïth atude moge, cwïnyge bëëdö ni ena dïër kiper gïna dige tïïö.

¹⁶?Aperŋø nø, u na jø tuuŋ Ruben, na dööŋŋu ni uuno pï piny dhøk lwääge mou, nou wïnynya dööt opele mo wø køth jø kwaathi? Jø tuuŋ Ruben na näk bëëdö yïth atude moge, cwïnyge bëëdö ni dëëdö ki gïna dige tïïö.

¹⁷Jøøa en yi ŋööm Gelät gena put bëëtö løø Naam Jördan løøga. ?Aperŋø na dööŋ jø tuuŋ Daan dhi waath buut baabuure? Jø tuuŋ Acer thuwø geno pï piny deŋ naama dwøŋ, ni putge bëëtö dhøk wäädhi kaace.

¹⁸'Ba jø tuuŋ Dhebulan beege jiy moa cïp jwïëcge kanya enge kar leny; këël jø tuuŋ Naptali thuwø, jwïëcge acïpge ni këëtge kiper kwör lenye moa en maal nee makge.

¹⁹«Nyeye mo Keenan aö baŋ leny, ni këëtge ki jø Icriel pääny Tanak buut Naam Kicön na en buut pääny Megidø; 'ba nyeye moøgø bäŋ gïï mo ege twierø, këël gwel-bïrö mo thiinh.

²⁰Ceer akëëdö ki kwöra cääthge yïthge maalø, ni ge këëdi ka Cicara; gena këëdö ki Cicara møn ki køør gïna tïïc Wuuö Jwøki.

²¹Ni ö jic Cicara ni køøli ya Naam Kicönni, ni beeye kanya bëëde ni kwödö døc, ni beeye Naam Kicön na nut cøøn. Wui jwïëya, beerra man putï riï mak niï teek.

²²Kar kaagønø, tiet okwëënyi mo leny awïnyö ni ge rïïŋö døc, ni beeye ŋwïëy mo teek na ŋweec okwëënyi mo leny moøgø na teek yøø.

²³Ni kö nyïïatwiel maal mar Wuuö Jwøk, ni ‹Acïëni en bäät paana cwøl ni Mërödh; jøø ni bëëdö paanøgø yøø, acïëni en bäätge na bäre bäre, kiper ge kär öö ni kønyge cer Wuuö Jwøk ki leny, ni beeye ki man kønyge cer Wuuö Jwøk kanya këëde ki jø leny mo jø Keenan na teek.›

²⁴«'Ba gwïëth en bäät Jaël ki røk mään bëët, ni beeye Jaël cï Eber nyï Këën; gwïëth en bäät dhaaŋŋøgø ki røk mään bëët moa bëëdö yïth oduŋkaare.

²⁵Cicara Jaël apëënynye nee eni mooc ki pïï, ni ö Jaëlli ni cïp caak jïgø; Jaël akännö jï Cicara ki caak ma dïïle, ni cïbe ka gïr wöt mo caala keenø.

²⁶'Ba Jaël cere arwaak baŋ dïnöök mar oduŋkaara, ni ö cere mana näk cwïïe ni rwaak gø baŋ dïgudi man wø tïï cwøwi ki gø. Køøre Jaël wï Cicara aput gur ki dïgudi ni put gø näk, ni ö thääŋŋe ni put gø tuc ni put wïïe keethø.

²⁷Ni ö Cicara ni put päth tiet Jaël no onibaŋŋa, kare møn, ena put päth tiet Jaël no onibaŋŋa; 'ba kanya päth yie no onibaŋŋa, aput thøø kaace na bäre bäre.

²⁸«'Ba mii Cicara bëëdö ni neeta wøk ki dha awëërnyeŋ ni göö ko oduuru; eni bëëdö ni neeta wøk ki dha awëërnyeŋ, ni kööe, na ‹?Aperŋø na ruu jääyi mar wääda man wø tut okweenynyi ni kär laar öö en? ?Aperŋø na ruu tiet okwëënyi mo wø tut jïëthe mo jø leny moe, na ba laarge wïnyö en?›

²⁹'Ba mii Cicara da luubö mør thuwø mo di carø ni di nøøyø ki cwïnye, ni ö määra näk owøørø na nyeŋge reegø na en buute ni caange luubö marge jïre, ni köge,

³⁰na ‹?Aŋø, ge ba poot määnyö ki jammi mo twierge, ni ge ba poot pääŋ japa twierge yïthakicge wän? ?Aŋø, ba da nyïïakuue mo ege maaø wän, ni ge poot pääŋŋa geni, nee ŋat leny man nø jïte ki nyakøø aciel wala nyïïakuue ariiø? ?Këël Cicara, ba da abïï mo kïte mïërö mo ee joodø wän, ni beeye abïï mo kïte mïërö mo ocwääö ki waare mo kïtge näga teeŋi teeŋi, ni beeye abïï mo kïte mïërö mo ocwääö na wøp døc, mano käär Cicara kanyo ööe, eni na dïtwïëdi?›

³¹«Wui Wuuö Jwøk, beerra man ö nyïïmännï ni thøwge bëët kaawat mana thøw Cicara ki jø leny moe; 'ba jøøa mëër ki ïïni, beerra man tïmge ni caala cäŋ kany wø tuule ki teek mare.» Køøre piny aput nikwöc ni bäŋ lenye ki cwiiri ma pïëraŋween.