Read anuak Pïëmme 6 Bible Online

Pïëmme 6 - anuak bible

Pïëmme 6

¹'Ba jø Icriel atïïö ki gïï mo nëëni ni reyø ki jï Wuuö Jwøk; ni ö Wuuö Jwøki ni cïp geni ceŋ jø Midien, ni wëëk geni caarø ki cwiiri abïriiø.

²'Ba teek mar jø Midien aput kadhø døc bäät jø Icriel. Ni ö jø Icrielli ni jiiŋge kwör mo ŋammø mo ena bäät kïte, ki uut kïte, ki kwör gwøk røk mo otïïö ni teek mo ena bäät kïte, ni gïïögø jiiŋge kaper dëëtge.

³Kiper kany wø tïme ni jø Icriel pïïdhö ki caammi, jø Midien wø puta öö ki jø Amalëk ki jø wø bëëdö jï løø kur tuul-cäŋ, ni ge ööa baŋ jø Icriel.

⁴'Ba jøøgø puta tïïö ki twëëre buut jø Icriel, ni raanyge gïïa näk otuy kaagø bëët këël mano këët paana cwøl ni Geedha, ni bäŋ caammi mo wecge jï jø Icriel, këël dïëk ki dhäk ka arëëni bäŋgø mo wecge.

⁵Kiper kany wø öge, ge ööi ka lääc paac moge bëët ko oduŋkaare moge, ni ge thööth døc ni caala bäänyö; ni geni ka athïrööle moge bëët, ge ba løny ki kwaan. 'Ba ge wø ööi ni ge raanynya ŋöömö manøgø møn.

⁶'Ba jø Icriel bëëtö marge adøø piny døc kiper gïna tïïc jø Midienni dëëtge, ni ö jø Icrielli ni jwöŋge dëër Wuuö Jwøk.

⁷'Ba kanya ö jø Icrielli na jwöŋge dëër Wuuö Jwøk ki køør gïna tïïc jø Midienni dëëtge,

⁸Wuuö Jwøk ajääk baŋ jø Icriel ki nyikuŋ Jwøk, ni kö nyikuŋ Jwøki manøgø jïge, ni «Gïna caan Wuuö Jwøki, Jwø Icriel beeye en, ena köö, ni ‹Beeye aani na käl uuni wøk ki Ijep, ni käla uuni wøk ki yi bëët laŋ.

⁹Aani, uuna käla wøk ceŋ jø Ijep, ni käla uuni wøk ceŋ jøøa bëëdö ni u ege thiel piny, ni riema jøøgø wøk nyïmmu ni cïba ŋöömö marge jïïu;

¹⁰ni caana gø jïïu, ki man näk mo beeye aani na Wuuö Jwøk na näk Jwøu; ni caana gø jïïu thuwø ki man ba wøørru juu mo jø Amör ni bëëdu yi ŋöömö marge en. 'Ba uuni dwøra käru leŋø.› »

¹¹Køøre Wuuö Jwøk ree anyoodhe kaamar nyïïatwiel maal, ni ööe ni pï piny tier jaadha dwøŋ na en Opara, paana en cer Jöac na käl dhi øt Abiedhar. 'Ba kanya ö nyïïatwiel maal manøgø, Gidien o Jöac dïnö ki beel moa cwøl ni cïndë yi kany wø biic nyïïomøki yie, ni tïïe ni ee kanø kiper nee ba joot jø Midien.

¹²'Ba Wuuö Jwøk na nyooth ree kaamar nyïïatwiel maal ree anyoodhe jï Gidien, ni kööe jïgø, ni «Wui, ï na ŋat leny mana teek, Wuuö Jwøk bëëdö ki ïïni.»

¹³'Ba Gidien aköö jïgø, ni «Wui kwäärö, ?dee na Wuuö Jwøk bëëdö ki waani cøøn, gïï bëët ii, a dige tägö dëëtwa nidïï? ?Këël gïï mo rëëma ec moa tïïe bëët, moa caan wëëkwa jïwa na köge, ni ‹Wuuö Jwøk øøna käl wøk ki Ijep,› gïïa näk rëëma ec moøgø enge kaa ennø? 'Ba ennø møn, Wuuö Jwøk waana nø wiie ni cïp waani ceŋ jø Midien.»

¹⁴'Ba eni na Wuuö Jwøk enø, jï Gidien aneene, ni kööe, ni «Ciï ki teek man cïba jïrï ennø ni piemï jø Icriel ceŋ jø Midien. Ïïna jääŋŋa ennø.»

¹⁵'Ba Gidien aköö jïgø, «?Wui Kwäärö, jø Icriel opiema gø ceŋ jø Midien nidïï? Neenï, tuuŋwa beege jiy moa jägö geni døc ki ri jø tuuŋ Maneeca, ni ki ri dhi øt wära, aana dhaanhø mo bäŋ kara.»

¹⁶'Ba Wuuö Jwøk aköö jïgø, ni «Ka adïëri møn, aano en buutï; ni putï jø Midien näk ni caala dhaanhø aciel jaak.»

¹⁷Køøre Gidien aköö jï Wuuö Jwøk, «Ni näk mo yiï met ki aani ennø møn, nyuuthï jïra ki ŋïï nee ŋääa ki man näk mo beeye ïïni na Wuuö Jwøk ni cäänö ki aani en.

¹⁸'Ba a kwaya ïïni niï ba aayï kany, këël kanyo duua baŋï noo känna ko olämi mo cïba jïrï.» Ni kö Wuuö Jwøki, ni «Aani, a bëëdö kany këël kanyo duuï.»

¹⁹Køøre Gidien aci paare ni jiiŋ nyidiel ki muunni mo kär coodø ki thømmø, ni møø manøgø røme ka rumi mana cwøl ni iipa; ni kïth rïŋö yi gupa ni kïth cwege ya athaa, ni käl geni baŋ gø kanya en yie tier jaadha dwøŋ, ni put gïïögø cïp.

²⁰'Ba Jwøk na nyooth ree kaamar nyïïatwiel maal aköö jïgø, ni «Lwør rïŋö ki muunni moa näk kär coodø ki thømmø ni peedhï ge bäät kïdi man en, ni kønynyï cwege bäätge.» Ni ö Gidienni ni put gïnögø tïïc ki yi jöö manøgø.

²¹Ni ö Wuuö Jwøki na nyooth ree kaamar nyïïatwiel maal ni rwaak athøra mana en cere, ni ö rïŋö ki muunni moa näk kär coodø ki thømmø ni gut ge ki tier athøra; ni ö maaci mo käla ri kïdi ni put liel ni waaŋ rïŋö ki muunni moa näk kär coodø ki thømmø këël mana thöör gø. Køøre Wuuö Jwøk na nyooth ree kaamar nyïïatwiel maal aput rwäänyö nyïm Gidien kaagø.

²²'Ba kanya ö Gidienni na joot gø ni manøgø beeye Wuuö Jwøk na nyooth ree kaamar nyïïatwiel maal, ena lwäyö døc ni kööe, «Wui kwäärö Wuuö Jwøk, ï na Wuuö Jwøk ki dëërï, ?ïïna puta neen kiree møn, niï ööi kaamar nyïïatwiel maal?»

²³'Ba Wuuö Jwøk aköö jï Gidien, ni «Bëëdï ni yiï met, kärï lwäyö; ïïni, ï ba thøw.»

²⁴Køøre Gidien aput tïïö ki gïn wø cïp olämme bääte jï Wuuö Jwøk kaace, ni cak nyeŋ gø, ni «Wuuö Jwøk beeye wø käl bëët-mëër.» 'Ba gïn wø cïp olämme bääte manøgø poot nut këël dïcäŋi en paana cwøl ni Opara na näk mar jøøa käl dhi øt Abiedhar.

²⁵'Ba na tïme na dïwäänögø, Wuuö Jwøk aköö jï Gidien, ni «Lwør rwaath dhieŋ mana näk cwiiye abïriiø, na näk mar wäru, ni beeye rwaadha käl køør kaa; ni raanynyï gïn wø cïp olämme bääte mar wäru na näk ee tïïö kiper jwøa cwøl ni Baal, ni ö jaadha näk otieŋø na näk ocaa ri jwøa cwøl na Acara na näk ocwöth piny buute kaagø ni ŋødï gø piny.

²⁶Ni tïï ki gïn wø cïp olämme bääte jï Wuuö Jwøk na näk Jwøk marï, ni tïïyï wï kïdi maal kanya näk otïïö ni teek, ni iï jiiŋŋø na kare; ni lwørï rwaath manøgø ni cïpï gø no olämi man wø waaŋ bäre ni waaŋï ki jaadhøgø no oŋødï piny enøgø.»

²⁷Køøre Gidien acwötö ki jiy apaar røk jø tïïc moe, ni tïïc gïnögø na kare kaawat mana nø caani ya Wuuö Jwøki jïre. 'Ba ki man tïïc gïnögø ki dïcäŋ, atïïe ki wäär, kiper mana näk eni lwäär døc ki tuuŋ wänni këël jø paanøgø bëët.

²⁸'Ba kanya päc jø paanøgø ka amöölla cøøn, na lwïthge ennø, gïn wø cïp olämme bääte mana näk otïïö kiper jwøa cwøl ni Baal onø raanynyø, ni jaadha näk ocaa ri jwøa cwøl na Acara na näk ocwöth piny buute kaagø onø ŋøt piny; ni rwaadha käl køør kaa onø cïp no olämi bäät gïn wø cïp olämme bääte mana näk otïïö na nyään.

²⁹Køøre jø paanøgø gena cäänö yïthakicge keerge, na «?Aŋa na tïïc gïn?» 'Ba kanya määnyge ni ge pëëö, gena köö, «Ni beeye Gidien o Jöac na tïïc gïnögø.»

³⁰Køøre jø paanøgø gena ö baŋ Jöac ni köge, ni «Käl wäädï wøk nee thøøe ennø, kiper eni gïn wø cïp olämme bääte mana näk otïïö kiper jwøk, ni beeye Baal, araanynye, ni ö jaadha näk ocaa ri jwøk, ni beeye Acara, na näk ocwöth piny buut gïn wø cïp olämme bääte manøgø ni ŋøt gø piny.»

³¹'Ba Jöac aköö jï jøøa ö baŋe na näk cuŋŋö kaagø bëët, na «?Aŋø, uuni, u ŋäbö kiper Baal? ?U manynya gø nee cwagu? Ennø, ŋato köö ni eni ŋäbö kiper Baal jaak, ka amöölla diøø eni doo nääö. Ni näk mo Baal beeye Jwøk, beerra man ŋäbe kiper dëëre keere, kiper beeye gïn wø cïp olämme bääte mare, eni na Baal enø, na raanynyi.»

³²Kiper manøgønø, nyeŋ Gidien aput cwøl ni Jerubaal dïcäŋögø, ni tiere beeye, ni «Beerra man ö Baalli ni ŋäbe ki eni,» kiper Gidien gïn wø cïp olämme bääte mar Baal araanynye.

³³Kar kanyøgønø, jø Midien bëët, ki jø Amalëk, ki jø wø bëëdö jï løø kur tuul-cäŋ rege adwalge, ni cige ni ŋølge Naam Jördan, ni tïïcge twïër marge dï gool mana cwøl ni Jedhriel.

³⁴'Ba Jwïëc Jwøk aput ö bäät Gidien; ni ö Gidienni ni kooth tuuŋ, ni ö jø poge na käl dhi øt Abiedhar ni öge ni cooŋge rege nee cääthge køøre.

³⁵Ni ö Gidienni ni jääk baŋ jø tuuŋge ma jø tuuŋ Maneeca bëët, ni öge thuwø, ni cooŋge rege nee cääthge køøre; ni jääk baŋ jø tuuŋ Acer, ki jø tuuŋ Dhebulan, ki jø tuuŋ Naptali, ni öge ni røømge ki geni.

³⁶Køøre Gidien aköö jï Jwøk, «Ni näk mo jø Icriel piemï piemø ki raa møn, kaawat mana nø caanï gø,

³⁷Ennø, aani, jïëc diel ma røømmø mo onyaarø cïba yi laara. 'Ba ni näk mo da thööy bäät jïëc røømmø keere, ni dööŋ pinynyi kaagø bäre no otal, oŋääa ni jø Icriel piemï piemø ki raa møn, kaawat mana nø caanï gø.»

³⁸'Ba kanya pääe ka amöölla cøøn, gïnögø aput joot no otägö møn. 'Ba kanya biic jïëc røømmø, thööy moa ö wøk ki røk jïër moøgø atïmö na pïï mo päŋ yi gïn mo caala keenø.

³⁹Køøre Gidien acäŋ köö jï Jwøk, ni «Beerra man ba cwat yiï ni ba gootï ki aani, naa cäŋa cäännö yie man keere; a kwaya ïïni nee gïn cäŋa päärö yie aciel man keere ki jïëc røømmø. Ennø beerra man tïm jïëc røømmø keerge no otal, ni tïm pinynyi kaagø bäre ni da thööy.»

⁴⁰Ni ö Jwøki ni tïïc gïnögø dïwäänögø; ni tïm jïëc røømmø keerge no otal, ni tïm pinynyi kaagø bäre ni da thööy.