Read anuak Pïëmme 8 Bible Online

Pïëmme 8 - anuak bible

Pïëmme 8

¹'Ba jø tuuŋ Ipariem, Gidien ajäälge ni yïthge ege keeyø døc, ni köge jïgø, na «?Aŋø, agïne ni tïïyï dëëtwa en? ?Aperŋø na ba cwølï waani, kanya aaï baŋ leny ki jø Midien en?»

²'Ba aløk Gidienni jïge, na «?Agïnaŋø na tïïcwa, wa na jø dhi øt Abiedhar en, na näk rööma maru, u na jø tuuŋ Ipariem? ?Aŋø, maru na caal jeeny yi pwödhö kär tïmö ni pöödha eni ki marwa na caal kac pwödhö bäre?

³?Agïnaŋø na løny jïra na tïïa mo röömi ki mana tïïyu? Kiper Jwøk, kwääri mo jø Midien, ni beege Orëëp ki Dhëëp, acïp ceŋŋu.» 'Ba kanya caan gïnögø jï jø tuuŋ Ipariem, wëër mana en cwïnyge ki eni aput kwöyö.

⁴'Ba Gidien ki jø leny moe moa näk dïpe adäk na en buute, këël na bëëtge ni geno ööl, gena ö bäät Naam Jördan, ni ŋølge gø, ni ge poot ŋwieya køør jø Midien.

⁵'Ba kanya pïïcge pääny mana cwøl ni Cuköt, Gidien aköö jï jø Cuköt, na «Akwaya uuni, mooyu jø leny moi ni cäädhi ki aani en ki dääpe, kiper mana näk geno ööl kanya ŋwiecwa køør nyeye mo jø Midien ni beege Jeeba ki Jalmuuna.»

⁶'Ba aløk dïbwöthe mo Cuköt ni köge, na «?Aŋø, ki jïrï ni Jeeba ki Jalmuuna oløny ni ena ceŋŋu, ni moocwa jø leny moï ki dääpe en?»

⁷Køøre Gidien aköö, ni «Wøp nø; 'ba kanyo ö Wuuö Jwøki noo cïp Jeeba ki Jalmuuna cera yie, aani u bïba bïbö ki koodhi mo paap ko oŋöön.»

⁸'Ba ena cäŋ aay ki kaace ni pïïe Peniël, ni cäŋ teeŋ luumma caane jï jø Cuköt caannø jï jø päänyögø; ni ö jø Peniël ni løkge gø jïgø keda teeŋ mana løgi ya jø Cuköti jïre.

⁹'Ba ena cäänö ki jø Peniël thuwø ni kööe, ni «Kanyo duua ni dëëra jööt, aani øt pööki man ni bäär ni you tïïö na kar gwøk røk en toora piny.»

¹⁰'Ba kar kaagø, Jeeba ki Jalmuuna ki jø leny moge ma kume apaar kurbïïc moa bëëdö ki geni, ge ena kanya cwøl ni Karkar, ni beege jiy bëët moa dööŋ røk jø leny moa öö ki mïëya en jï løø kur tuul-cäŋ. 'Ba jø leny moa thøw beege jiy ma kume ma dïpa ki pïërariiø.

¹¹Køøre Gidien aci baŋge ni cøra jöör jøøa näk bëëdö yïth oduŋkaare, ni jöörögø cøra jï løø kur tuul-cäŋ ki kwöra cøøri ni Nöba ki Jögebiya; ni tuk twïër jø Midien, kanya bëëde ni kär dïët jø wø koor twïër.

¹²'Ba kanya ö nyeye mo Midien moa na ariiø, ni beege Jeeba ki Jalmuuna, na reŋge, Gidien aput reŋ køørge ni mak geni; ni ö jø Midienni ni putge bwøk.

¹³Køøre Gidien o Jöac aduuö ki baŋ leny ni cøra jöör kanya cwøl ni Ërë.

¹⁴'Ba eni nyen ma wøp røk jø Cuköt amaae ni tet gø. Køøre nyenøgø nyeŋ kwääc jø Cuköt ki jø døøŋŋø ma pïërabïriiø ka abïriiø agöör piny jï Gidien.

¹⁵Køøre Gidien aö baŋ jø Cuköt ni kööe, ni «Neennu Jeeba ki Jalmuuna nø, na buu aani kiperge na kööu, na ‹?Aŋø, ki jïrï ni Jeeba ki Jalmuuna oløny ni ena ceŋŋu, ni moocwa jø leny moï ki dääpe en, kiper mana näk geno ööl?› »

¹⁶Kanyøgønø, Gidien jø døøŋŋø mo päänyögø akäle ni bïp ge ki koodhi mo paap ko oŋöön ni pwönynya geni.

¹⁷Køøre eni pööki mana bäär na näk kar gwøk røk mana en Peniël atoor piny, ni 'näk jøøa en yi päänyögø.

¹⁸'Ba Gidien aköö jï Jeeba ki Jalmuuna, na «?Ateeŋ jiy mo nyïëdi na 'nägu bäät Kïn Tabör?» Køøre aløkge, ni «Ge caala ïïni, ni ŋati man nø ree ee caalø ki o nyeya.»

¹⁹Køøre ena köö, ni «Geni, gena nyïïmera moa nywøl mera kiree. 'Ba ennø, ki nyeŋ Wuuö Jwøk na kwøw, doo na geni you wiiø ni ge kwøw, u ba daa nääö.»

²⁰Køøre Gidien aköö jï kanynye ma Jether, ni «Ö maal ni 'nägï geni.» 'Ba nyilaarøgø opëëllö mare käre wöth wøk, kiper ena lwäyö ki man 'näk geni, kiper mana näk eni poot na nyilaal.

²¹'Ba Jeeba ki Jalmuuna gena köö jï Gidien, ni «Ïïni ki dëërï, ö maal ni laarï wa 'näk; kiper ïïna dïcwøø ni jïrï da teek.» Kanyøgønø, Gidien aö maal ni 'näk Jeeba ki Jalmuuna, ni put jap mïërö moa en cwäk athïrööle moge käl.

²²Køøre jø Icriel aköö jï Gidien, ni «Tïmï ni ïïna nyeya marwa, ni beeye ïïni këël wäädï ki nyikwaarï thuwø, kiper ïïni, waana piemï ceŋ jø Midien.»

²³'Ba Gidien aköö jïge, ni «Aani, a ba tïmö ni aana nyeya maru, këël wääda ba tïmö na nyeya maru; 'ba beeye Wuuö Jwøk keere na nyeya maru.»

²⁴'Ba Gidien aköö jïge, ni «Da gïrpiny aciel mo daa manynyø baŋu. Beerra man ö ŋati man nø ni cïpe ki gwel ïth røk moa twiere.» Kiper jø Midien jïge da gwet ïdhi mo tïïc ka warkey; kiper geni, ge poot na jø Icmiel.

²⁵'Ba jø Icriel aköö, ni «Cïpwa cïbö møn.» Køøre abïï aputge peer, ni ö ŋati man nø ni lëëŋ yi gø ki gwel ïth aciel røk moa twiere.

²⁶'Ba gwet ïdhi moa näk tïïc ka warkey moa pëëny Gidienni atïmö na rumme ma kuma aciel ki dïpe abïriiø, ni røm ka rumi mana cwøl ni cekel; 'ba gwet cwägi ki gwet ïdhi ma teeŋi teeŋi, ka abïïe mo perge leth ma dïmuur moa käär nyeye mo jø Midien, ki jap mïërö moa en cwäk athïrööle moge kär kwaan rege.

²⁷Køøre Gidien warkey manøgø atïïe na ëëput,[5] ni cïp gø pääny poge ma Opara; 'ba jø Icriel bëët ëëput manøgø atïïcge kaamar jwøk, ni cwïnyge onieŋ køøre kaawat man wø tïïc dhaaŋ paac mo rïïŋö køør käp. Ni put gïnögø tïmö ni caala abïëp kiper Gidien ki jø paare.

²⁸Kanyøgønø, jø Midien wïthge aput døø piny ni tïmge ni ge lwäär ki jø Icriel, ni kärge wïthge tïŋ maal këët. Køøre piny aput nikwöc ni bäŋ lenye ki cwiiri ma pïëraŋween yïth nïr kwøw moa beet Gidienni.

²⁹'Ba Jerubaal, ni beeye Gidien o Jöac, aput aa poge ni pï piny paare.

³⁰'Ba kiper mana näk jïre da mään mo thööth, ena nyöödö ki wääte ma pïërabïriiø mo käla dëëre kiree.

³¹'Ba dhaagø mar Gidien mana näk akwanya mo bëëdö Cekam, Gidien anyöönne ki nyilaal ma dïcwøø, ni cak nyeŋ gø na Abimëlëk.

³²Køøre Gidien o Jöac athøw ni eno jal ki jalø ma wøp, ni kani yi kään kïdi mar wänni ma Jöac na en Opara, pääny jø Abiedhar.

³³'Ba kanya tïme na køør thøw Gidien, jø Icriel acäŋ tïmö ni cwïnyge onieŋ køør juuga cøøri na Baal kaawat man wø tïïc dhaaŋ paac mo rïïŋö køør käp; ni tïïcge Baal-Berith na jwøk marge.

³⁴Ni ö jø Icrielli ni wïl wïthge ki Wuuö Jwøk na bëëdö na Jwøge na piem geni ceŋ nyïïmänge ki yïth kwörögø bëët;

³⁵ni bäŋ gïn mo beer mo ege nyoodhø jï tuuŋ Jerubaal, mo röömi ki gïïa beyø na tïïe jï jø Icriel. 'Ba Jerubaal nyeŋŋe maya beeye Gidien.