Read anuak 2 Jøøn 1 Bible Online

2 Jøøn 1 - anuak bible

2 Jøøn 1

¹Aana jaan acooŋ Jwøk naa määtha dhaaŋŋa näk ojierø ki nyïïe, jøøa mëëra ki geni ki ra adïëri, ni patha a keera, 'ba këël jøøa ŋäc adïëri bëët thuwø,

²ni beeye adïëri man ni en cwïnynyø en, ni wø bëëdö ki øøni këël na bäre bäre.

³'Ba met ec, ki køny, ki bëët-mëër man wø ööi ki baŋ Jwøk na näk Wuuö, ki baŋ Jecu Krictø na näk O Wuuö obëëdö ki øøni ki ra adïëri ki mëër.

⁴Yia amïnnö døc na jooda nyïïï møøk ni caatha køør adïëri, keda mana ö Wuue na kööm øøni.

⁵'Ba kawaane a kwaya ïïni, ï na dhaagø, ni paa naa gööra dwøl mo nyään baŋï, 'ba beeye mana en jïïø cøøn, ni mëërø ki røgø.

⁶'Ba mëër beeye ki man caadhø køør gïïa cem. Ni mana ceme beeye en, keda mana wïnynyu gø cøøn, nou doo caatha køør mëër.

⁷Kiper jø cwøk mo thööth okeethø dï piny, jøøa näk kär jïëy ni Jecu Krictø oöö ni da dëël. Teeŋ ŋatøgø nø, beeye dïcuuy ni ena nyimän Krictø.

⁸Gwøgu dëëtu, kiper nee gïna tïïu kipere nee ba rwäänye jïïu, 'ba nee mana doo ci jïïu nee wëëk uuni na kare.

⁹'Ba ŋat wø reŋ nyïm ni ba bëëdö ri pwöc Krictø, tøør ri Jwøk. 'Ba ŋat wø bëën pwöc Krictø, ena ri Wuuö ki Wäädö karge riet.

¹⁰'Ba ni näk da ŋat mo ööa baŋu ni ba käl pwöc moøgø, kär nou jïëya gø ki man døny paac, ni ba määthu gø.

¹¹Kiper ŋato määth gø, eni tïmö ni eni nywaaga tïïc mare na raac.

¹²'Ba këël na dee luup mo thööth mo gööra baŋu, a ba many man gööra gø yi warakata ki peen, 'ba yaa ŋäädhö naa ööa kuna neena uuni, ni cäänø ni ø raŋŋa nyeŋŋø, kiper nee met ec marø thur kare.

¹³Ïïna määth nyïï coku, dhaaŋŋa näk ojierø.