Read anuak Mana Nyooth 1 Bible Online

Mana Nyooth 1 - anuak bible

Mana Nyooth 1

¹Wëëlö man caana luup gïna nyooth Jecu Krictø, na wëëk Jwøki eni, nee gïïo laar tägö nee nyoodhe jï laage. Ni nyoodhe ka dhi nyïïatwiel maal mare na jääŋŋe baŋ laŋŋe ma Jøøn,

²ŋata køp gïr luum Jwøk ki gïr luum adïëri mana caan Jecu Krictø, këël gïr gïïa neene bëët.

³Gwïëth en jï ŋato kwaan luupi ni køp gïï mo poot ena nyïm en nee wïnye. Ni gwïëth en jï jøw owïny ge, ni gwøkge gïïa näk ogöör yie, kiper kanya wäŋŋi acäännö.

⁴Aana Jøøn ni määth acook Jwøk karge bïriedi, ni en yi Eecia. Met ec bëëde bäätu ki bëët-mëër man wø ööi ki baŋ ŋat nut en, na nut cøøn, ni beeye noo ööi, ki baŋ jwïëy karge bïriedi ni wø en nyïm wälle,

⁵ki baŋ Jecu Krictø, na näk lïŋi mana näk adïëri, ŋata kwøŋ duu wøk ki yi thøø, eni na wïth nyeye mo piny. Ajiem ki rööny en jïre këël na bäre bäre, ŋata mëër ki øøni, na pät øøni ki remme yïth raay moø,

⁶ni tïïc øøni ni øøna jø bura, na dïlämme jï Jwøe na näk Wänni. Enøgønø.

⁷Neennu! Eni öö ki yïth pøøl, ni ö nyeŋŋi bëët ni neenge eni, ki jiy bëët moa mooc dëëre ki ŋwiili. Ni ö jø pinynyi bëët ni kïmge ki gïre. Ni beeye kare, na enønø.

⁸Kwäärö Jwøk aköö, ni «Aana Alpa ni näga Omëëga,[1] ŋat nut en, na nut cøøn, ni beeye eni no ööi, ŋata en teeki jïre.»

⁹Aana cöögu ma Jøøn na dwätö ki uuni ki nyeŋ Jecu ki ri jwør gïï mo leth, ki ri bura, ki ri mak cwïny ni teek. Aani, aana kïth ya acuulla cwøl ni Patma kiper mana køba luum Jwøk ki gïr luum adïëri mana caan Jecu.

¹⁰'Ba dïcäŋ aciel ma Cäŋ Jwøk, Jwïëc Jwøk aö bääta, ni wïnynya dwøl ŋääa mo dwøŋ, mo keda dwør tuuŋ,

¹¹ni cäänö, ni «Göör gïn ni neetï en yi wëëlö, ni jääŋŋï gø baŋ acook Jwøk karge bïriedi, ni beeye yi Epeca, ki Camerna, ki Pergamum, ki Thayatira, ki Carda, ki Piladelpia, ki Leeyödicia.»

¹²Kanyøgø dëëra aløøa naa neena dwørøgø na cäänö ki aani. 'Ba na løøa dëëra, a joota lambae abïriiø mo ena bäät tëëde ma warkey.

¹³'Ba dï lambae moøgø da ŋat mo keda Wär Dhaanhø, mo orøø ka abïï mo okëët tiete, ni kööre da kaa warkey.

¹⁴Ni wïïe ki jïëye tar, keda jïëc røømmø mo tar. Ni taye caala piiø mo tar døc. Ni nyeŋŋe caala maac mo liel.

¹⁵Ni tiete caala jwëëlli mo othoodhø, ni ŋwaŋŋi kee poot ena yi maac. Ni dwøre caala lwör mar pïï mo thööth.

¹⁶'Ba cer cwïïe da ceer abïriiø, ni dhee da opëëllö mo beth mo lage ariiø. Ni täärnyïme caala cäŋ mo orieny ni kwaar døc.

¹⁷'Ba na jooda gøøni, aana päth tiete kede aano thøw. 'Ba cer cwïïe acïp bääta, ni kööe, ni «Kärï lwäyö. Beeye aani na dïkwøŋ, ni näga aŋuudi.

¹⁸Ni beeye aani ni kwøw. Kiper aana thøw møn, 'ba kawaane aana cäŋ kwøwø, këël na bäre bäre. Ni muktääe mo thøø ki kar bëët jwïëc jøøa näk othøw ena cera.

¹⁹'Ba kawaane gïïa neenï, ki gïï ni nut ii, këël moo tägi cään, göör piny.

²⁰'Ba luum ceer moa na abïriiø na jootï cer cwïïa, ki lambae moa näk abïriiø na näk warkey, ni beege japa näk tietge okwøŋ kan, tiere beeye en. Ceer moøgø karge bïriet gena nyïïatwiet acook Jwøk karge bïriedi. 'Ba lambae karge bïriet beege acook Jwøk karge bïriedi.»