Read anuak Mana Nyooth 12 Bible Online

Mana Nyooth 12 - anuak bible

Mana Nyooth 12

¹Ni ö ŋïïyi mo dwøŋ ni nëëne maal, na dhaagø mo cäŋ ee røø dëëre, ni dwääy ena tiete, ni wïïe da adun ceer apaar kurriiø.

²Eni yie da dhaanhø ni kwöŋŋe ki mäc lwaar na en dëëre, ni baŋŋi døc ni manynya lwaar.

³Kanyøgø ŋïï mør acäŋ nëënne maal, na thwöl mo dwøŋ døc mo kwaar ni keda nyaaŋ, ni wïthe abïriiø ki tuŋi apaar, ni wïthe da adude abïriiø.

⁴Ni gøøc dää thäk ceec maal ki jïbe ni lëëŋ ge piny. Ni ö thwörögø ni cuŋŋe nyïm dhaaŋŋa kare cään ki lwaar, nee nyi gø løønye kanyo lwaare ki gø.

⁵Ni lwaar dhaaŋŋøgø ki nyilaal ma dïcwøø, ŋato käär mïëri bëët ka athøny nywïënyö. 'Ba wääde ajuth ni kïthi maal baŋ Jwøk ki wälle.

⁶Ni ö dhaage ni reŋ paap, yi kanya näk ojiiŋ Jwøki kipere, kanya dii caamø yie ki nïne ma kuma aciel ki dïpe ariiø ki pïërabïciel.

⁷Kanyøgø leny atägö maal. Maykal ki nyïïatwiet maal moe akëëdö ki thwöl, ni ö thwörögø ki nyïïatwiete ni këëtge ki ge.

⁸'Ba gena bööti, ni tïme ni bäŋ kany bëëtge yie maal këët.

⁹Ni ö thwöra dwøŋ ni lëëŋi piny. Ni beeye thwöra cääŋŋe cøøn, na cwøl na anägö ni näk Ceethan, na näk dïcuuy mar piny bäre. Ena lëëŋ piny, ni ö nyïïatwiet maalli moe ni lëëŋi piny ki eni na aciel.

¹⁰Ni wïnynya dwøl mo päl maalø, ni köö, ni «Kawaane, pïëm man piem jiy ki gø, ki teek, ki buc Jwøø, ki teek Krictø na røønye apïï. Kiper ŋat wø wac nyeŋ nyïïmëëgø aleeŋ piny, ŋat wø wac nyeŋge nyïm Jwøø ki cääŋŋe ki wärre.

¹¹'Ba ena böötge ki køør rem Nyidiel ki luum Jwøk na køpge, ni per jwïëcge ba leth jïge, këël doo cööpa ri thøø.

¹²Ï na maal, yiï mïnne nø, ki uuni ni bëëdö yie. 'Ba oraac jï piny ki näm, kiper anägö aö piny baŋu ki wëër mo päl, kiper ŋääe ni kare acäännö.»

¹³'Ba na jooti ya thwölli ni eno lëëŋ piny, køør dhaaŋŋa lwaar ki nyilaal ma dïcwøø aŋwiee.

¹⁴'Ba dhaaŋŋøgø omooø ki bwöp coor mana dwøŋ karge riet, kiper nee määt paap kiper thwöl, kanya dii caamø yie dïciel ki cwiiri adäk ki thääŋö.

¹⁵Ni ö thwölli ni ŋöö pïï wøk ki dhee mo keda naam køør dhaaŋŋøgø, kiper nee dhaaŋŋøgø käl jwïïe.

¹⁶'Ba piny, dhaaŋŋøgø akønye ni ööe ni jap dhee ni mwøny naamøgø, na ŋöö thwölli wøk ki dhee enø.

¹⁷Kanyøgø thwörögø awëër ki dhaagø, ni ci kuna këëde ki nyïïkwaac dhaaŋŋøgø møga, jø wø gwøk gïïa cem Jwøki, ni wø køp gïr Jecu.

¹⁸Ni ö eni ni cuŋŋe ya akwöny naama dwøŋ.