Read anuak Mana Nyooth 14 Bible Online

Mana Nyooth 14 - anuak bible

Mana Nyooth 14

¹Kanyøgø aana nëënnö, ni jooda Nyidiel ni cuŋŋö bäät Kïn Dhayan, ni buute da jiy ma kume ma dïpa ki pïëraŋween kurŋween, jøøa näk nyeŋŋe ki nyeŋ Wänni ogöör täärnyïmge.

²Ni wïnynya dwøl mør mo ööi ki maal mo caala lwöc pïï mo thööth, ni caala dwør køth mo määr døc. 'Ba dwønøgø na wïnynya gø atïmö ni keda dööt thøme mo pwöta jiyi.

³Ni ge wär ki duut mo nyään nyïm wälu, ki nyïm gïïa näk aŋween na kwøw, ki nyïm jaae. 'Ba bäŋ dhaanhø mo maar duudace kwany, 'ba beege jøøa wïïl wøk piny na näk kume ma dïpa ki pïëraŋween kurŋween, na kwany gø.

⁴Beeye jøøa näk dëëtge kärge raanynyø ki mään. Kiper dëët mään kucge. Ni beeye geni wø caath køør Nyidiel kany wø ci yie jaak. Geni, ge wïïl wøk ka røk teeŋ jiy bëët, na këël wï Jwøk jï Jwøk ki Nyidiel.

⁵Ni bäŋ tööt mo ojoodø dhøkge, kiper bäŋ gïn mo jøøŋŋi dëëtge.

⁶Kanyøgø nyïïatwiel maal mør mo määdö maal ajooda, ni käära luumma nyään na met na näk bäŋ cuŋŋe mo købe købø jï jø wø bëëdö bäät piny, ni beege mïëri bëët, ki wïth tuŋi bëët, ki teeŋ dhøgi bëët, ki wïth juurre bëët.

⁷Ni cäänne ki dwøl mo päl, ni «Lwäärru Jwøk ni jiemmu gø, kiper kany ŋøl luup yie apïï. Wøørru eni, eni na cwääc maal ki piny ki näpa døøŋŋø, ki kwöra tuul pïïyi ki yïthge.»

⁸Ni ö riet nyïïatwiet maalli mør ni läw cäännö, ni «Babiløn na dwøŋ apädhö ki pädhö mo ba thiinh, nyaana wëëk mïëri bëët mäthö ki køøŋ nyïïomøki mar käp mare.»

⁹Ni ö dää nyïïatwiet maalli mør ni läw cäännö ki dwøl mo päl, ni «Ni näk da ŋat mo wøøra Läänögø ki gïna näk ocwääö na kïte, ni jït täärnyïme ki ŋïï, wala cere,

¹⁰ŋatøgø thuwø, omäthi ki køøŋ nyïïomøki mar wëëc Jwøk, mo okøny yaa athöönh wëër mare, ni bäŋ gïn mo ojääbö ki gø. 'Ba eno caari ki maac, ki maac mør mo jïye keec ni lïëth døc nyïm nyïïatwiet maal na en kur keerge, ki nyïm Nyidiel.

¹¹Ni ö jïc maac mano caar geni ki gø ni duuŋe këël na bäre bäre. Ni bäŋ jwömö jïge ki wärre ki cääŋŋe, ni beege jø wø wøør Läänögø ki gïna näk ocwääö na kïte, ki jø wø dëëtge jïti ki ŋïï mar nyeŋŋe.»

¹²Manøgø nø, manynya jïëny gïï mo leth mar jø Jwøk, jø wø gwøk gïïa cem Jwøki, ni ŋäädhe marge na en ri Jecu ege maa ni teek.

¹³Ni wïnynya dwøl mør mo ööi ki maal, ni kööe, ni «Göör gïn, ‹Køør man ennø gwïëth en jï jø wø thøw ni ge ena ri Wuuö.› » Ni kö Jwïëc Jwøki, ni «Gena gwïëth møn, kiper nee dëëtge jwömge ki öölö marge, kiper tïïe moge cäädhi ka geni na aciel.»

¹⁴Kanyøgø aana nëënnö ni jooda pöölö mo tar, ni ŋat mo keda Wär Dhaanhø opï bääte, ni wïïe da adun warkey, ni cere da manyjil mo beth.

¹⁵Ni ö nyïïatwiel maalli mør wøk ki yi Øt Jwøk Mana Dwøŋ, ni cwøl ŋata bëëdö bäät pöölö manøgø ki dwøl mo päl, ni kööe, ni «Lwør manyjil marï ni kääï, kiper kar kac apïï. Kiper gïïo kac piny atal døc.»

¹⁶Kanyøgø nø, ŋata bëëdö bäät pöölö manøgø manyjil mare awïre bäät piny, ni ö gïïa en bäät pinynyi ni kaay.

¹⁷Ni ö nyïïatwiel maalli mør wøk ki yi Øt Jwøk Mana Dwøŋ mana en maalø. Ni cere da manyjil mo beth thuwø.

¹⁸Ni ö nyïïatwiel maalli mør wøk ki yi gïn wø waaŋ gïï wø jïcge ŋwääi ni met bääte, ni beeye nyïïatwiella en luum maaci cere. Ni cwøl nyïïatwiella näk cere da manyjil mo beth ki dwøl mo päl, ni kööe, ni «Lwør manyjil marï, ni kayï nyïïomøki mo piny. Kiper nyïïomøki moe ociek.»

¹⁹Kanyøgø nyïïatwiel maal manøgø manyjil mare awïre bäät piny ni kac nyïïomøki mo piny, ni leeŋ ge yi buur wø biic nyïïomøki yie, ni beeye buur mana dwøŋ døc mar wëëc Jwøk.

²⁰Ni ö buur wø biic nyïïomøki yie ni nyøri ki tiel ŋää paac wøk. Ni ö remø ni kwön wøk ki yi buur wø biic nyïïomøki yie, ni päŋ mare ena dho okweeny ni møle ni cööp kany mo jïtö ki kiïlömethërri ma dïpe adäk.