Read anuak Mana Nyooth 16 Bible Online

Mana Nyooth 16 - anuak bible

Mana Nyooth 16

¹Kanyøgø dwøl mør mo päl awïnynya Øt Jwøk Mana Dwøŋ, ni dwøl manøgø köömma nyïïatwiet maal karge bïriet, ni kööe, ni «Cou ni kønynyu kuure karge bïriedi mo wëëc Jwøk bäät piny.»

²Kanyøgø nyïïatwiel maal mana dïkwøŋ acøø ni køny kuura mare bäät piny, ni ö atwøti mo odheeth mo ŋwääö ni reyø ni öge bäät jøøa näk dëëtge da ŋïï mar Lääy, na wøør gïna näk ocwääö na caal kïte.

³Ni ö riet nyïïatwiet maalli ni køny kuura mare yïth näpa døøŋŋø, ni tïmge keda rem dhaanhø mo othøw, ni ö gïïa kwøwi bëët na en yïth näm ni thøwge.

⁴Ni ö dää nyïïatwiet maalli ni køny kuura mare yïth näm ki kwör wø tuul pïïyi ki yïthge, ni tïmge na remø.

⁵Ni wïnynya dwør nyïïatwiel maal mana en pïïyi cere, ni köö, ni «Marï beer ki yïth gïïögø na ŋølï enø, ïïni ni nut en, ni nudï cøøn, ï na en kur keerï.

⁶Kiper jiy rem jø Jwøk ki mo nyïïkuk Jwøk akønyge piny, ni läwï ge wëëk remø nee maathge. Ni beeye mana røm rege.»

⁷Ni wïnynya dwøl ki yi gïn wø waŋ gïï wø jïcge ŋwääi ni met bääte, ni köök, ni «Wui, Kwäärö Wuuö Jwøk na en teeki jïre, ka adïëri møn, ŋøl marï beeye adïëri ni beer.»

⁸Ni ö ŋweer nyïïatwiet maalli ni køny kuura mare bäät cäŋ, ni wëëgi man waaŋ jiy ki maac.

⁹Ni ö jiyi ni waaŋ geni ki jam maaagø na lïëth døc. Ni janyge nyeŋ Jwøk na en luum jap räny piny moøgø cere, ni kärge cwïnyge løø ki man jiemge eni.

¹⁰Ni ö bïï nyïïatwiet maalli ni køny kuura mare bäät wäl Lääy. Ni tïm buye na muudhö. Ni ö jiyi ni kaacge lakge kiper dëëtge na baŋŋi.

¹¹Ni janyge Jwø maal kiper dëëtge na rämö ka atwøt. Ni kärge cwïnyge løø yïth gïïa tïïcge.

¹²Ni ö bïcier nyïïatwiet maalli ni køny kuura mare bäät Naam Upareeti na dwøŋ, ni ö pïïe ni talge, ni jiiŋŋa jöör nyeye moo ööi ki jï løø kur tuul-cäŋ.

¹³Ni neena juu adäk mo reyø døc mo ge caala ogwäle, ni ge ööa wøk ki dhi thwöra caal nyaaŋ ki dhi Lääy, ki dhi nyikuŋ jwøk mana näk patha adïëri.

¹⁴Kiper gena jwïëy anäge mo tïïö ki ŋïïce mo wø ci wøk baŋ nyec piny bäre, kuna cooŋge geni kanya ciel kiper leny mar cäŋo dwøŋ mar Jwøk na en teeki jïre.

¹⁵'Ba Kwäärö ma Jecu aköö, ni «Ka adïëri møn, aano ööi naa caala kuu. 'Ba gwïëth oen jï ŋato bëëdö ni nëënö, ni gwøga abïïne, nee ba cäädhe ki dëëre, nee eni ba joot ni bäŋ abïï dëëre.»

¹⁶Ni ö jwïëyögø ni cooŋge nyeye kanya cwøl ni Armagedøn ki dhi Ibaru.

¹⁷Ni ö bïriet nyïïatwiet maalli ni køny kuura mare yi jamø jaak, ni ö dwølli mo päl ni wïnye ki bäät wälu ni ööi ka yi Øt Jwøk Mana Dwøŋ, ni kööe, na «Aløny nø.»

¹⁸Ni tïm agaackøthi ni mal, ni piny dïmmi døc, ni køth märö, ni piny jäŋŋi ki dïjäŋ piny mo dwøŋ døc, mo teeŋe kär tägö cøøn ki mana bëët jiyi bäät piny. Kiper dïjäŋ piny manøca dwøŋ døc.

¹⁹Ni ö paana dwøŋŋi ni kaaŋŋe na thäŋi adäk, ni ö mïëc pinynyi ni päthge, ni ö Jwøki ni par wïïe ki gïr Babiløn na dwøŋ, nee wëëk mäthö ya athöödhi na päŋ ki wëëye na raac døc.

²⁰Ni ö acuule bëët ni reŋge, ni bäŋe ya kïdi mo joot.

²¹Ni ö peyi mo døøŋŋø døc, mo peek mar man nø jïtö ki kïïle ma pïëraŋween, ni pänhge bäät jiy ki maal, ni tïm jiyi ni ge janynya Jwøk kiper gïr räny piny mar pey. Kiper gïr räny piny manøca dwøŋ døc.