Read anuak Mana Nyooth 17 Bible Online

Mana Nyooth 17 - anuak bible

Mana Nyooth 17

¹Kanyøgø nyïïatwiel maal aciel dëët nyïïatwiet maal moa näk abïriiø na käär kuure abïriiø aöö ni kööe jïra, ni «Ööï, nee ajäla mano pïï dëër kääbi mana dwøŋ na näk opï bäät pïï mo thööth nyoodha jïrï,

²dhaaŋŋa ö nyec pinynyi na käpge ki gø, dhaaŋŋa ö jø bëëdö bäät piny ni meerge ki køøŋ käp mare.»

³Ni kïth aani paap ni Jwïëc Jwøk ena bääta, ni neena dhaagø mo opï piny bäät Lääy mo kwaar, mo dëëre ogöönnö ki nyeŋ mo thööth mo reyø døc mo janynya Jwøk, mo jïre da wïdhi abïriiø ki tuŋi apaar.

⁴Ni dhaaŋŋøgø käära abïïe ma dïmuur ki mo kwaar, ni dëëre ee tïïö ni mïërö ki warkey, ki tii ma teeŋi, ni cere da athöödhi ma warkey mo päŋ ki gïï mo reyø døc ki rääc käp mare.

⁵'Ba täärnyïme nyeŋ mo tiere okanø ogöör yie, ni «Babiløn na dwøŋ, na näk mii kääpe ki rääö mar piny.»

⁶Ni jooda dhaaŋŋøgø no omeer ki rem jø Jwøk ki rem lïŋŋe mo Jecu. 'Ba na neena gø, yia athäŋŋö døc.

⁷'Ba nyïïatwiel maal manøgø aköö jïra, na «?Aŋø ni thäŋ yiï en? Gïr nyaanøgø na näk tiere okanø ocaana jïrï, ki gïr Läänögø ni wïthe abïriiø enø ki tuŋi apaar na näk nyaanøgø opï bääte.

⁸Läänögø na jootï enø, nut dïkwøŋ cøøn, ni tøør ennø, ni eni ööa wøk ki yi buura näk bäye bäŋ cuŋŋe ni cøøa kar ränynyö. 'Ba jø wø bëëdö bäät piny na näk nyeŋge kär göörö yi wëël kwøw ki kanya täk pinynyi, yïthge othäŋŋi noo neenge Läänögø, kiper na nude dïkwøŋ cøøn, ni tøør ennø, 'ba eni poot öö.

⁹Man nø, manynya acaara mar wïc mo leer. Wïdhi karge bïriedi gena thuuri abïriiø mo wø bëët dhaaŋŋøgø bäätge,

¹⁰ni gena nyeye abïriiø thuwø. Jiy abïïc dëëtge onø thøø, ni bïcierge poot nut en, ni bïrietge poot kär öö. 'Ba noo ööe bëëdö ka kany mo thiinh keere.

¹¹'Ba gïr Läänögø na nut dïkwøŋ cøøn, ni tøør ennø, beeye bäcge, 'ba poot ena røk jøøa näk abïriiø. Ni eni cøøa kar ränynyö.

¹²'Ba tuŋi karge paari moa jootï, beege nyeye apaar mo poot kär røønyø, 'ba ge di cuumö na nyeye ki yi caa aciel, ge ki Läänögø na aciel.

¹³'Ba jøøgø na apaar yøø cwïnyge aciel, ni cuum marge ki teek marge owëëkge Läänögø.

¹⁴'Ba geno määnynyi baŋ Nyidiel, ni ö geni ni bööti ya Nyidielli, kiper ena Kwääy kwääri, ni ena Nyeny nyeye, ni jøøo en buute, gena jøøa cwøl, na jier, na jiy mo oŋäädhö.»

¹⁵Ni kö nyïïatwiel maalli jïra, ni «Pïïa jootï na näk kääbi opï bäätge gena wïth juurre ki lwaae, ki mïëri, ki dhøgi ma teeŋi.

¹⁶'Ba tuŋi moa jootï karge paari ki Lääy, geno männi ki kääbi manøgø, ni tïïcge gø no oränynyö ni cäädhe ki dëëre, ni camge rïŋŋe, ni waaŋge gø ki maac.

¹⁷Kiper gïnögø okïth Jwøki cwïnyge, nee mana manynye tïïcge ki køør mana näk cwïnyge aciel, ki mana wëëkge teek nyec marge Läänögø, këël mano ö luup Jwøki noo thurge karge.

¹⁸'Ba dhaaŋŋøgø na jootï enø beeye paana dwøŋ na näk ocuumö wïth nyec piny.»