Read anuak Mana Nyooth 2 Bible Online

Mana Nyooth 2 - anuak bible

Mana Nyooth 2

¹«'Ba gööt baŋ nyïïatwiel maal mar acooŋ Jwøk mana en Epeca ni kööï, ni «Moi beege luup ŋata näk cer cwïïe da ceer abïriiø, ni wø cäädhi ki dï lambae abïriiø ni wø en bäät tëëde ma warkey karge bïriet.

²«Aani, tïïe moï ŋääa, ki öölö marï, ni cwïnyï iï maa, niï ba maar jïëy ki jø raay. 'Ba jøøa døøc dëëtge nyïïatwieli ni ge patha nyïïatwieli, gena päänynyï, ni jootï geni ni marge tööt.

³Ni ŋääa ni cwïnyï iï maa niï jøøya gïï mo leth kiper nyeŋŋa, ni kärï ööl.

⁴«'Ba gïna jääla ïïni ki gø en beeye kiper mana weyï mëëyï mana dïkwøŋ.

⁵Caar wïïï ki gïna døøï cään ki gø. Løk cwïnyï, ni tïïyï tïïe moa wara tïïyï dïkwøŋ. 'Ba ni näk ba tïïyï, ni ba løgï cwïnyï, a ööa baŋï, ni lwøra lamba marï kare, ni daaa gø.

⁶'Ba gïn ni poot beer jïrï en, beeye kiper mana mänï ki tïïe mo jø Niköölac, na mäna ki ge thuwø.

⁷«'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk. 'Ba ŋato böödö, owëëga cam jaath kwøw, ni en yi pwötha beer mar Jwøk.»

⁸«Ni göötï baŋ nyïïatwiel maal mar acooŋ Jwøk mana en Camerna, ni kööï, ni «Moi beege luup ŋata dïkwøŋ ni näk aŋuudi, na thøw ni cäŋ kwøwø.

⁹«Aani, gïïö ni leth ni jwørï yøø ŋääa, ki cannï, 'ba ïïno kwär. Ni ŋääa gïïö ni reyø ni wø cari dëërï, ni beege jø wø köö ni gena jø Juuth, ni ge path. 'Ba gena øt acooŋa mar Ceethan.

¹⁰Kär niï lwäyö ki gïn ni kare cään en noo jwørï. Kiper jø møøk røk jiy moï, oleeŋ anägö øt twöc kany mo cään en, niï päänynyi. 'Ba nïne apaar obeetï niï jwøra gïï mo leth. 'Ba wärï bëëdï ni cwïnyï iï maa këël doo cööpa ri thøø, køøre ïïno mooa ka adun kwøw.

¹¹«'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk. 'Ba ŋato böödö, ba doo gwaar thøøe mano en cään.»

¹²«Ni göötï baŋ nyïïatwiel maal mar acooŋ Jwøk mana en Pergamum, ni kööï, ni «Moi beege luup ŋata näk jïre da opëëllö mo beth mo lage ariiø.

¹³«Aani, kany bëëdï yie enø ŋääa, ni beeye kany wø bëët wäl Ceethanni yie. 'Ba nyeŋŋa iï jïëö møn, ni ŋäädhe marï mana ŋääthï aani ki gø kärï mooŋø, këël yïth nïr lïŋi mara ma Antipa ŋata näk yaa ŋäädhö, na 'näk dïïu, kanyø ni bëët Ceethanni yie enø.

¹⁴«'Ba jïra da luup møøk mo ï yaa jäälö ki ge. Kiper jïrï da jø møøk kaagø mo ojïëy ki pwöc Beelam, ŋata pwöny Beelak ki jöö man wëëk wäät Icriel cwany tietge ki gø, nee ge cämge ki caammi mo wø 'näk jï juu, ni bëëtge ki bëët käp.

¹⁵Ni jïrï da jø møøk thuwø mo ojïëy ki pwöc jø Niköölac.

¹⁶Kiper manøgønø, løk cwïnyï. 'Ba ni näk ba løgï, a laara ö baŋï ni këëda ki jøøgø ko opëël dhaa.

¹⁷«'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk. 'Ba ŋato böödö, owëëga cam meena mana näk okanø, ni mooa gø ki kïdi mo tar, mo nyeŋ mo nyään ogöör bääte mo bäŋ ŋat mo ŋäc gø, 'ba beeye ŋato cï jïre keere noo ŋäc gø.»

¹⁸«Ni göötï baŋ nyïïatwiel maal mar acooŋ Jwøk mana en Thayatira, ni kööï, ni «Moi beege luup O Jwøk, ŋata nyeŋŋe caal maac mo liel, ni tiete caala jwëëlli mo othoodhø.

¹⁹«Aani, tïïc marï ŋääa, ki mëëyï, ki ŋäädhe marï, ki tïny jø møøk, ki mak cwïny marï. Ni ŋääa ni tïïe moï moa en cään thöötha geni ki moa dïkwøŋ.

²⁰«'Ba gïna jääla ïïni ki gø, beeye kiper mana wëëgï nyaanøgø na Jedhebal bëëtö dïïu, nyaanø ni dëëre ee døøc nyikuŋ Jwøk enø, ni pöö ni maaŋŋa wïth laaŋe 'moa nee bëëtge ki bëët käp, ni cämge ki caammi mo wø 'näk jï juu.

²¹Ena wëënna ki nïne nee cwïnye løøe, 'ba eni kweeyø ki man løk cwïnye ni wec käp mare.

²²'Ba ennø, eno wëëga täw bäät pëëm. 'Ba ni näk jøøa näk kääpe ki eni na aciel cwïnyge ba løkge ni kwierge gïï wø tïïc nyaanøgø, ge mooa mooø ki gïï mo leth døc.

²³'Ba nyïïe onääa ni thøwge ki thøø mo leth. Ni ö acook Jwøki bëët ni ŋäcge gø ni beeye aani ni wø neen gïï wø en yi cwïny ki wïc. 'Ba ŋati man nø dïïu omooa ki mano rømi ki tïïe moe.

²⁴'Ba maru, u na jø møga ni en yi Thayatira, u na näk kär jïëy ki pwöc moøgø, na kär kwany gïï wø cwøl jø møøki ni jap Ceethan moa teek, a køpa gø jïïu, ni bäŋ gïn mør mo u ööla öölö ki gø.

²⁵'Ba putu gïna nut jïïu mak ni teek këël mano ööa.

²⁶«'Ba ŋato böödö, ni gwøk tïïe 'moa këël cuŋŋe, omooa ki teek bäät mïëc piny,

²⁷keda mana ö Wära na wëëk a teek thuwø.» « ‹Ni ö eni ni dïïm geni ka athøny nywïënyö, ni pööt geni ni keeth ge na thäŋi keda thäk dak mo ogøø piny,›

²⁸«Ni wëëga cëëy amöölla eni.

²⁹'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk.»