Read anuak Mana Nyooth 20 Bible Online

Mana Nyooth 20 - anuak bible

Mana Nyooth 20

¹Kanyøgø nyïïatwiel maal mør aneena ni ööa piny ki maal, ni cere da muktää mar buura näk bäye bäŋ cuŋŋe ki tiimme mo dwøŋ.

²Ni mak thwörögø, thwöra nut ya acääŋŋe cøøn na näk anägö, ni näk Ceethan, ni twöc gø ki cwiiri ma kuma aciel,

³ni leeŋ gø yi buur, ni cïëk gø ni mwön gø bääte, kiper nee mïëri ba cøøge këët këël kanyo thum cwiiyøgø na kuma enø. Køør manøgønø, eni di pädö ki kany mo thiinh.

⁴Kanyøgø wäle møøk ajooda, ni jøøa näk owëëk ŋøl luup opï bäätge. Ni jooda jwïëc jøøa wïthge ŋul wøk thuwø kiper gïr Jecu na køpge, ki gïr luum Jwøk, jøøa näk Lääy manøgø kärge wøørø, wala gïna näk ocwääö na caal kïte, na näk kär jïtö ki ŋïï täärnyïmge wala ceŋge. Geni, gena cäŋ kwøwø, ni bëën geni ki Krictø na aciel ki cwiiri ma kuma.

⁵'Ba jøøa näk othøw møga, kär cäŋ kwøw këël mana thum cwiiya näk kuma. Manøgø beeye duun wøk ki yi thøø mano kwøŋ tägö.

⁶Ŋato en ri duun wøk ki yi thøø mano kwøŋ tägö, gwïëth oen jïre, ni eni ena kur keere na mar Jwøk. Teeŋ jøøgø, thøw oen cään bäŋ teek jïre bäätge, 'ba ge tïmö ni gena dïlämme mo Jwøk ki Krictø. 'Ba geno bëënni ki eni na aciel ki cwiiri ma kuma.

⁷'Ba kanyo thum cwiiyøgø na kuma yøø, Ceethan opät øt tööc mana en yie,

⁸ni ö wøk kuna cøøk mïëri ni en wïth tuk piny karge ŋweeni, ni beeye Gøg ki Magøg.[4] Ni eni cøøga geni nee ge cooŋe kiper leny. 'Ba kwäänge caala akwöny deŋ naama dwøŋ.

⁹Ni öge ki yi piny bäre ni rumge twïër jø Jwøk dïër, ki paana mëërö ki gø. 'Ba maac aöö ki maal, ni dïïr wïthge.

¹⁰Ni ö anägö na cøøk geni ni leeŋi yi naama liel ki maac mo jïye keec ni lïëth døc, kanya en Lääyi yie ki nyikuŋ jwøk mana näk patha adïëri. 'Ba ge di caarø ki cääŋŋe ki wärre këël na bäre bäre.

¹¹Kanyøgø wälu mo tar mo dwøŋ døc ajooda ki ŋata en bääte. Ni ö maalli ki piny ni reŋge ki eni, ni bäŋe kany mo ojoodø kiperge.

¹²Ni jooda jøøa näk othøw, moa døøŋŋø ki moa therø, ni ge cuŋŋö nyïm wällögø. Ni ö weeli ni jabi. Ni ö wëële mør thuwø ni jabi, wëëlla näk Wëël Kwøw. Ni ö luup jøøa näk othøw ni ŋøli ki køør gïïa näk ogöörö yïth weeli, ki køør tïïe moge.

¹³Ni ö naama dwøŋ ni cïp jiy moa no othøw yie, ni ö thøøe ki kar bëët jwïëc jøøa näk othøw ni cïpge moa en yïthge, ni ŋøl luupge bëët ki køør tïïe moge.

¹⁴Kanyøgø thøø ki kar bëët jwïëc jøøa näk othøw aleeŋ yi naama liel ki maac. Manøgø beeye thøø mano en cään, mar naamo liel ki maac.

¹⁵'Ba ni näk da ŋat mo nyeŋŋe kär joodø no ogöör yi Wëël Kwøw, eni wø leeŋa yi naama liel ki maac mo jïye keec ni lïëth døc.