Read anuak Mana Nyooth 21 Bible Online

Mana Nyooth 21 - anuak bible

Mana Nyooth 21

¹Kanyøgø maal mør mo nyään ki piny mo nyään aneena. Kiper maal mana dïkwøŋ ki piny mana dïkwøŋ aay, ni bäŋ näpa døøŋŋø këët.

²Ni jooda paana en kur keere na näk Jerucalem mana nyään, ni öö ki maal baŋ Jwøk, no ojiiŋŋø keda dhaagø thiinh mo dëëre orunynyö ki coole kiper cwøre.

³Ni wïnynya dwøl mør mo päl mo ööi ki bäät wälu, ni kööe, ni «Kar bëët Jwøk atïmö ni bëëdö ka jiy. Eno bëëdö ki geni ni tïmge na jiye. 'Ba Jwøk ki dëëre obëëdö ki geni,

⁴ni pooc pï nyeŋge bëët, ni ö thøøe ni bäŋe gø këët. Ni bäŋ kïmmö, wala oduuru mo di gøø, wala rääm këët. Kiper japa dïkwøŋ oaay.»

⁵Ni ö ŋata en bäät wälu ni kööe, ni «Ennø, a tïïya jammi bëët ni nyärö.» Ni cäŋ köö, ni «Göör gïn. Kiper luup moi ii beege luup mo oŋäädhö ni näkge adïëri.»

⁶Ni kööe jïra, na «Aløny nø. Aana Alpa ni näga Omëëga, ŋata nut wïlöölö ni näga cuŋŋe. 'Ba jø wø dëëtge da riew omooa ki pïï mo ba ŋeew mo käla yi jøøro mar pï kwøw.

⁷'Ba ŋato böödö, olaaw manøgø oci jïre, ni tïma ni aana Jwøk mare, ni tïme na wääda.

⁸'Ba mar jøøa lwäyö, ki jøøa näk kär jïëy, ki jøøa näk ocienø, ki dïnäk jiy, ki jø käp, ki jø thïëth, ki jø wø lam juu møøk, ki tööte bëët, marge beeye ciin yi naamo liel ki maa näk jïye keec ni lïëth døc, na näk beeye thøw oen cään.»

⁹Kanyøgø nyïïatwiel aciel røk nyïïatwiet maal moa näk abïriiø, jøøa käär kuuya näk abïriiø na päŋ ki jap räny piny moa näk abïriiø na näk aŋuudi ena öö ni luupe ki aani, ni kööe, ni «Ööï, nee dhaagø thiinh na näk cï Nyidiel nyutha ïïni.»

¹⁰Ni kïth aani bäät kïdi mo bäär mo dwøŋ døc, ni Jwïëc Jwøk ena bääta, ni nyuth aani paana en kur keere na näk Jerucalem, ni ööa piny ki maal ki baŋ Jwøk,

¹¹ni dëëre da ajiem Jwøk, ni ŋwaŋŋi døc keda waŋ kïdi mo pere leth, ni caal kïn wø ŋwaŋŋi, ni tøŋ døc keda wïlli.

¹²Deŋŋe da kiir mo bäär mo dhøge apaar kurriiø. Dhøgi moøgø da nyïïatwiet maal apaar kurriiø, na aciel nø cuŋŋö dhi man nø, ni nyeŋ tuk wäät Icriel karge paari kurriiø ogöör bäätge.

¹³Ki jï løø kur tuul-cäŋ, da dhøgi adäk, ni dee dhøgi adäk ki jï løø wï-piny, ki dhøgi adäk ki jï løø tier-piny, ki dhøgi adäk ki jï løø kur pänh-cäŋ.

¹⁴'Ba kiir paanøgøøni odhïŋe opeedhø ki kïte apaar kurriiø moa cwäc bäätge, ni nyeŋ nyïïatwiet Nyidiel karge paari kurriiø ogöör bäätge.

¹⁵'Ba ŋata cäänö ki aani jïre da athøra ma warkey mar rumi man røm paanøgø ki gø, ki dhøge ki dëër kiire.

¹⁶'Ba paanøgø tuge aŋween. Ni bäye ki yie röömi. Ni røm paanøgø ka athønynye ni jïte ki kiïlömethërri ma kume ariiø ki dïpe aŋween. 'Ba bäye, ki yie, ki gääŋe röömi.

¹⁷Ni røm odhïŋ mar kiir gø thuwø ni jïte ki gööye ma dïpa ki pïëraŋween kurŋween ni caala mo wø røm dhaanhe, ni beeye na tïïc nyïïatwiel maal manøgø.

¹⁸'Ba kiirøgø ogeerø ki kïdi mo ŋwaŋŋi, ni ö paaci ni geeri ki warkey mo tøŋ keda wïlli.

¹⁹'Ba kiir paanøgø tiere mana cwäc bääte oŋwagø ki teeŋ wïth kïte bëët. 'Ba kïdi mana kwøŋ cwäc bääte ŋwaŋŋi døc, ni ö rietge ni caal dïmuuy, ni ö dääge ni caal otïït, ni ö ŋweerge ni caal keenh-orwëëdhö,

²⁰ni ö bïïge ni caal awaaga tierthëërö, ni ö bïcierge ni caal dha-adhieŋ, ni ö bïrietge ni caal nyicwïïr, ni ö bäcge ni caal okwëër, ni ö bïŋweerge ni caal maar-odwëëla, ni ö paacge ni caal apwønnø, ni ö paacge kurciel ni caal nyabïcøle, ni ö paacge kurriiø ni caal dïmuur.

²¹'Ba dhøk kiiri moøgø karge paari kurriiø gena kïte mo caala obuudi, ni dhi kiir man nø, ocwääö ni caala kïdi mo obuudö aciel, ni ö jöör paaci ni näk warkey mo tøŋ, ni waŋ pöödhö ki yie keda wïlli.

²²'Ba bäŋ Øt Jwøk mo yaa joodø paanøgø, kiper Øt Jwøk mare beeye Kwäärö Wuuö Jwøk na en teeki jïre ge ki Nyidiel.

²³'Ba paanøgø bäŋ cäŋ mo manynyi yie wala dwääy nee rienye bäät gø, kiper ajiem Jwøk beeye tar mare, ni ö lamba mare ni näk Nyidiel.

²⁴'Ba mïëri ocäädhi ki dääre, ni ö nyeye mo piny ni kälge ajiemge yie.

²⁵'Ba dhøge bëëdö ni ŋaam ki dïcäŋ cooth, ni bäŋ wäär kaace.

²⁶'Ba ajiem mïëri ki gïïa beyø na en yïthge okälge yi gø.

²⁷Ni bäŋe gïn mo raac mo døny yie, wala ŋat mo tïïya gïï mo määnö wala twöt. 'Ba beege jøøa näk nyeŋge ogöör yi Wëël Kwøw mar Nyidiel keerge noo ci yie.