Read anuak Mana Nyooth 3 Bible Online

Mana Nyooth 3 - anuak bible

Mana Nyooth 3

¹«Ni göötï baŋ nyïïatwiel maal mar acooŋ Jwøk mana en Carda, ni kööï, ni «Moi beege luup ŋat en Jwïëc Jwøki karge bïriet jïre, ki ceer karge bïriedi: «Aani, tïïe moï ŋääa. Ni nyeŋŋï wïnyö niï kwøw, 'ba ïïno thøw.

²Päyï, ni wëëgï gïïo no odööŋ ni karge cään ki thøø yøø tëënnö. Kiper bäŋ tïïe moï mo yaa joodø mo othur karge nyïm Jwøa.

³Caar wïïï nø, ki gïna wëëk ïïni na wïnynyï. Gwøgï, ni løgï cwïnyï. 'Ba ni näk ï ba päy, a öö kaawat man wø ö kuuwi, ni kuyï caanno ööa baŋï yie.

⁴«'Ba ŋääa ni jïrï poot da jiy mo nøk yi Carda, jiy ma abïïkge kärge raanynyø. 'Ba geno cäädhi ki aani ka abïïe mo tar. Kiper geno rømø.

⁵'Ba ŋato böödö, dëëre orunynyi ka abïïe mo tar na enøgønø, ni nyeŋŋe ba käla wøk yi wëël kwøw. 'Ba gïr nyeŋŋe køba købø nyïm Wära ki nyïm nyïïatwiet maal moe.

⁶'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk.

⁷«Ni göötï baŋ nyïïatwiel maal mar acooŋ Jwøk mana en yi Piladelpia, ni kööï, ni «Moi beege luup ŋata en kur keere, na näk adïëri, ni en muktään Deebit cere, ŋat wø jäbö, ni bäŋ ŋat mo dëët gø, ni wø cïëö ni bäŋ ŋat mo jap gø:

⁸«Aani, tïïe moï ŋääa. 'Ba neenï, ïïna wëënna ko odhuulu mo ojabø, mo bäŋ ŋat mo maar lønyø jïre ki man cïëk gø. Ni ŋääa ni teek marï thiinh, 'ba luumma poot iï gwøø, ni nyeŋŋa kärï mooŋø.

⁹'Ba jøø na jø øt acooŋ Ceethan yøø, ni beege jø wø köö ki tööt ni gena jø Juuth, ni ge path, geno tïïa nee öge ni këëlge cøŋge piny nyïmï, nee ŋäcge naa mëër ki ïïni.

¹⁰'Ba kiper mana gwøgï luumma na bëëdï ni cwïnyï iï maa, ïïno gwøa kanyo ö gïïa lethi no öge bäät piny bäre kuna päänyge jøøi ni bëëdö bäät piny en.

¹¹«Aani, a laara ö. Put gïna nut jïrï mak ni teek, kiper nee bäŋe ŋat mo mak aduda marï.

¹²'Ba ŋato böödö, eno tïïa na werø yi Øt Jwøk Mana Dwøŋ mar Jwøa. Ni ba ö wøk yi gø bäre bäre. 'Ba nyeŋ Jwøa ogööra dëëre, ki nyeŋ pääny Jwøa, ni beeye Jerucalem mana nyään noo ööi ki maal ki baŋ Jwøa, ni gööra nyeŋŋa mo nyään dëëre.

¹³'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk.

¹⁴«Ni göötï baŋ nyïïatwiel maal mar acooŋ Jwøk mana en Leeyödicia, ni kööï, ni «Moi beege luup ŋat wø cwøl ni Enøgønø, na näk lïŋi mana näk adïëri ni wø cäänö ka adïëri, ni beeye na ö Jwøki na cwääc jammi ki ree:

¹⁵«Aani, tïïe moï ŋääa, niï ba lïëth, niï ba ŋec. 'Ba doo beerra mana diï lïëth wala ï ŋec.

¹⁶'Ba kiper mana caalï pïï mo mør, niï ba ŋec wala ï lïëth, ï ŋuula wøk dhaa.

¹⁷Kiper ï wø köö, ni ‹Aano kwär, ni japa atïmö ni thööth, ni bäŋ gïn manynya.› Ni kuyï gø ni ïïno ränynyö, ni cwïny opädhö ki gïrï, niï can, ni ïïna cwør, niï cäädhï ka dëërï.

¹⁸'Ba a pwönynya ïïni ki man ŋëëmmï baŋa ki warkey mo oleenyø ki maac, kiper niï kwärï, ni ŋëëmmï baŋa ka abïïe mo tar, nee røøï dëërï, nee laac wïc manø ni cäädhï ki dëërï enø, nee ba neen, ni ŋëëmmï baŋa ki jaath nee nyeŋŋï wïïrï ki gø, niï nëënï.

¹⁹«Kiper a wø jooga jø wø mëëra ki geni, ni pwöda geni. Kiper manøgønø, këëyï, ni løgï cwïnyï.

²⁰'Ba neenï, a cuŋŋa dhi øtø, naa dööŋö. 'Ba ni näk da ŋat mo wïnynya dwøra, ni jap dhi øtø, a cøøa baŋe, ni cäma ki eni, ni ö eni ni cäme ki aani.

²¹«'Ba ŋato böödö, owëëga pïïn piny bäät wälla, keda mara na bööda, ni pïïa kanya ciel ki Wära bäät wälle.

²²'Ba ŋat mo jïre da ïth, beerra man wïny gïn ni caan Jwïëc Jwøki en jï acook Jwøk.»