Read anuak Mana Nyooth 5 Bible Online

Mana Nyooth 5 - anuak bible

Mana Nyooth 5

¹Ni neena wëëlö cer cwïï ŋata näk opï bäät wälu, mo yie ki ŋääe ogöörö, mo omwönö ki möönne abïriiø.

²Ni neena nyïïatwiel maal mo teek mo cäänö ki dwøl mo päl, ni pëëö, na «?Aŋa no orømø ki man jap wëëlö ni jap möönne moe?»

³Ni tïme ni bäŋ dhaanhø maal wala bäät piny, wala tiet ŋøøm, mo maar lønyø jïre ki man jap gø wala ki man neen yi gø.

⁴Ni jwöŋa døc kiper na bäŋe dhaanhø mo ojoodø mo orømø ki man jap wëëlö wala neena yi gø.

⁵Kanyøgø dhaanhø aciel røk jaae aköö jïra, ni «Kärï jwöŋö. Ŋuur tuuŋ Juuda na løth ri Deebit, nyïïmänne adïïme. Løny jïre ki man jap wëëlö ki möönne karge bïriet.»

⁶'Ba yïthakic wälu ki gïïa kwøw karge ŋweeni ki dï jaae aana nëënnö ki Nyidiel mo cuŋŋö, mo kede onää, dëëre ki tuŋi abïriiø ki nyeŋ abïriiø na näk Jwïëc Jwøk karge bïriedi mo ojääŋŋö dï piny bäre.

⁷Ni cøøe ni lwør wëëlö cer cwïï ŋata näk opï bäät wälu.

⁸'Ba na nø lwør wëëlö, gïïa kwøw karge ŋweeni ki jaae na näk pïërariiø kurŋween gena päth nyïm Nyidiel, ni ŋati man nø cere da thoom ki kuura ma warkey mo päŋ ki gïï wø jïcge ŋwääi ni met, na näk laam mo jø Jwøk.

⁹Ni wärge ki duut mo nyään, ni köge, ni «Røma ïïni ki lwør wëëlö ni japï möönne moe. Kiper ïïna 'näk, ni wïïrï kwör jiy ki remmï kiper Jwøk, jøøa käl røk tuŋi bëët, ki dhøgi, ki wïth juurre, ki yïth mïëri bëët.

¹⁰Ni tïïyï geni na jø bura na dïlämme jï Jwøk marø. 'Ba geno bëënni bäät piny.»

¹¹Kanyøgø aana nëënnö, ni wïnynya dööt nyïïatwiet maal mo thööth døc døc, mo jïtö ki kume ma kume mo ena deŋ wälu bäre, ki deŋ gïïa kwøw, ki deŋ jaae,

¹²mo köö ki dwøl mo päl, ni «Røma Nyidiel na 'näk, ki man wëëk teek eni, ki kwär, ki leec wïc, ki dööŋ-kar, ki wödö, ka ajiem, ki pwøc.»

¹³Ni wïnynya dööt gïïa näk ocwääö bëët, moa en maal ki moa en bäät piny, ki moa en tiet ŋøøm, ki moa en yïth näpa døøŋŋø, ki gïïa en yïthge bëët, ni ge köö, ni «Pwøc, ki wödö, ka ajiem, ki teek, en jïre, eni na en bäät wälu ki Nyidiel, këël na bäre bäre.»

¹⁴Ni kö gïïa kwøw karge ŋweeni, ni «Enøgønø.» Ni ö jaae ni leeŋge rege piny ni wøørge Jwøk ki Nyidiel.