Read anuak Mana Nyooth 6 Bible Online

Mana Nyooth 6 - anuak bible

Mana Nyooth 6

¹Kanyøgø aana nëënnö kanya ö Nyidielli na jap mööni aciel røk möönne abïriiø, ni wïnynya dwør aciel røk gïïa kwøw karge ŋweeni, ni cäänni ka dwøl mo keda määc køth, ni kööe, ni «Ööï.»

²Ni nëënna, ni jooda okweeny[2] mo tar, mo bääte da ŋat mo cere da atum. Ni mooi ka aduda, ni cøøe ni ena ŋat dïïm nee nyïïmänne dïïme.

³'Ba na ö Nyidiel na jap riet möönne, dwør riet gïïa kwøw awïnynya, ni köö, ni «Ööï.»

⁴Ni cäŋ okweenynyi mør ö wøk mo kwaar døc. 'Ba ŋata en bääte omooø ki teek man raany bëët-mëër bäät piny, kiper nee jiy røkge 'näkge. Ni mooi ko opëëllö mo dwøŋ døc.

⁵'Ba na ö Nyidiel na jap dää möönne, dwør dää gïïa kwøw awïnynya, ni köö, ni «Ööï.» Ni nëënna, ni jooda okweeny mør mo cøl, mo bääte da ŋat mo cere da rumi.

⁶Ni wïnynya gïnmør mo keda dwøl dï gïïa näk aŋween na kwøw, ni köö, ni «Rumi aciel mar beek wø cwøl ni cïndë ŋeew ka gwel mo röömi ki gät tïïc man wø cool jï dhaanhø ki yi cäŋ, ni beek wø cwøl ni gäbci[3] mo yïth rumme adäk poot ŋeew ka gwel mo caala moøgø. 'Ba kär niï raanynya maaw ki køøŋ nyïïomøki.»

⁷'Ba na ö Nyidiel na jap ŋweer möönne, dwør ŋweer gïïa kwøw awïnynya, ni köö, ni «Ööï.»

⁸Ni nëënna, ni jooda okweeny mør mo obwörö, mo bääte da ŋat mo nyeŋŋe Thøø, ni kar bëët jwïëc jøøa näk othøw cäädha køøre. Ni geno wëëk teek bäät ŋweer thääŋö mar piny, nee 'näkge ko opëëllö, ki meel, ki ŋwiili, ni wëëk geni 'näk dhøk cwëënyi mo owär.

⁹'Ba na ö Nyidiel na jap bïï möönne, jwïëc jøøa 'näk kiper luum Jwøk ki luum Jecu na køpge, ajooda tier gïn wø cïp olämme bääte.

¹⁰Ni köökge ki dwøl mo päl, ni «?Wui Kwäärö Jwøk na en teeki jïre, na en kur keere na näk adïëri, awäne noo ŋølï luubö noo coolï kwör remwa dëët jøø ni bëëdö bäät piny en?»

¹¹Kanyøgø ŋati man nø amooc ka abïï mo tar mo røøe, ni köömmi ni cäŋge bëëtö ki kany mo thiinh, këël mano päŋ kwään nyïïmëëkge, jø wø tïny Krictø ki geni na aciel moo 'näk kaamar marge.

¹²'Ba na ö Nyidiel na jap bïcier möönne, aana nëënnö, ni jooda dïjäŋ piny mo dwøŋ døc. Ni ö cäŋŋi ni tïme ni cøl døc, ni ö dwääyi kare bäre ni tïme ni caala remø.

¹³Ni ö ceerri mo maal ni pänhge piny, keda mar olaam wø øc nyïïe piny ka arïïa, kany wø jäŋi ya jame mo teek.

¹⁴Ni ö maalli ni rwäänye keda mar wëëlö mo di dølø. Ni ö kïte bëët ka acuule ni daai kwörge.

¹⁵Kanyøgø nyec piny, ki jøøa kwörge døøŋŋø, ki kwääc jø leny, ki jøøa näk okwär, ki jøøa teek, ki jiy bëët, nee laŋŋø wala ŋat mo bëëdö ka wïïe, rege akange yïth buri ki dï ogeeme mo kïte,

¹⁶ni ge cøøra kïte ko ogeeme, ni «Päthu bäätwa ni kannu waani ki waŋ ŋat en bäät wälu, ki wëëc Nyidiel.

¹⁷Kiper cäŋa dwøŋ na näk mar wëër marge apïï. ?Na aŋa noo maar cuŋŋö?»