Read anuak Mana Nyooth 7 Bible Online

Mana Nyooth 7 - anuak bible

Mana Nyooth 7

¹Køør manøgøøni, nyïïatwiet maal aŋween ajooda ni ge cuŋŋa yïth tuk piny karge ŋweeni, ni kwör wø kwön jame ki yïthge karge ŋweeni ege mänö nee bäŋe jamø mo kwön bäät piny, wala bäät näpa døøŋŋø, wala ri jaathø.

²Kanyøgø nyïïatwiel maal mør ajooda ni ö maal ka jï løø kur tuul-cäŋ, ni cere da ŋïï mar Jwøa kwøw, ni cwøl nyïïatwieta näk aŋween ki dwøl mo päl, geni na wëëk teek ki man raanyge piny ki näpa døøŋŋø.

³Ni kööe, ni «Kär nou raanynya piny, wala näpa døøŋŋø, wala jen, këël mano kïthwa täärnyïm laak Jwøø ki ŋïï.»

⁴Ni wïnynya kwään jøøa täärnyïmge kïthi ki ŋïï, na jiy mo jïtö ki kume ma dïpa ki pïëraŋween kurŋween, mo ööi ki røk tuk wäät Icriel bëët.

⁵Ri tuuŋ Juuda da kume apaar kurriiø na mooc ki ŋïï. Ki ri tuuŋ Ruben, da kume apaar kurriiø. Ki ri tuuŋ Gaat, da kume apaar kurriiø.

⁶Ki ri tuuŋ Acer, da kume apaar kurriiø. Ki ri tuuŋ Naptali, da kume apaar kurriiø. Ki ri tuuŋ Maneeca, da kume apaar kurriiø.

⁷Ki ri tuuŋ Cimien, da kume apaar kurriiø. Ki ri tuuŋ Libay, da kume apaar kurriiø. Ki ri tuuŋ Icakar, da kume apaar kurriiø.

⁸Ki ri tuuŋ Dhebulan, da kume apaar kurriiø. Ki ri tuuŋ Jocep, da kume apaar kurriiø. Ki ri tuuŋ Benjamen, da kume apaar kurriiø.

⁹Køør gïïögø aana nëënnö, ni jooda lwaak mo päl døc, mo bäŋ ŋat mo maar lønyø jïre ki man kwaan geni, ni ööi ki yïth mïëri bëët, ki røk tuŋi bëët, ki røk jiy bëët, ki teeŋ dhøgi bëët, ni ge cuŋŋa nyïm wälu ki nyïm Nyidiel, ni geno ruyö ka abïïe mo tar, ni ceŋge da bäät twöe.

¹⁰Ni köökge ki dwøl mo päl, ni «Pïëm man piem jiy ki gø, en jï Jwøø, eni ni en bäät wälu en, ki Nyidiel.»

¹¹Ni ö nyïïatwiet maalli bëët ni cuŋge deŋ wällögø bäre, ki deŋ jaae ki gïïa näk aŋween na kwøw, ni päthge ki nyïmge nyïm wälu ni wøørge Jwøk,

¹²ni köge, ni «Enøgønø. Pwøc ka ajiem ki leec wïc, ki dwøk met ec, ki wödö, ki teek, ki dööŋ-kar, en jï Jwøø këël na bäre bäre. Enøgønø.»

¹³Kanyøgø jaa aciel aluupö ki aani ni kööe, ni «?Moø a jøøe, ni käädö ka abïïe mo tar yøø, na a kaa na kälge yie?»

¹⁴Ni dwøga gø jïre, ni «Ŋäyï, kwäärö.» Ni duu gø jïra, ni «Jøøgø beege jøøa ö wøk ki yi gïna leth døc na wäŋŋi. Abïïkge apenyge ni tïïcge ge ni tar ki rem Nyidiel.

¹⁵«Ni beeye tiere ni cuŋge nyïm wäl Jwøk en, ni ge tïnynya eni ki cääŋŋe ki wärre yi Øt Lam mare na dwøŋ. 'Ba eni ni en bäät wälu kiper na nude, geno gëëŋe.

¹⁶Geni, ge ba 'näk käci këët, ni bäŋe riew rege këët. Ni ge ba 'näk cäŋŋi këët, wala kwaac cäŋ mo jootge.

¹⁷Kiper Nyidiel ni en dï thudhi tïmö na dïkwääy marge, ni nyooth geni kwör jøør mo pï kwøw, 'Ba Jwøk pï nyeŋge opwøe bëët.»