Read anuak Ruuth 2 Bible Online

Ruuth 2 - anuak bible

Ruuth 2

¹'Ba Naømi jïre da wat cwøre, ma dhaanhø mo okwär, ma tuuŋ ki Elimëlëk, mo nyeŋŋe Böeeth.

²'Ba Ruuth nyi jø Möap aköö jï Naømi, na «A kwaya ïïni naa cøøa dï pwöth, naa kwänya ki wïth beel moa no odööŋ piny yi pwöth ŋato yie met ki aani.» Ni løk gø jïgø, ni «Ciï nø, cï nyaara.»

³Køøre ena ö maal, ni ci kuna kwänynye yïth pwöth, køør jø kac; ni cwöp ri pwöth Böeeth na näk tuuŋ ki Elimëlëk.

⁴Kar kanyøgønø, Böeeth aöö ki Bethelem, ni määth jø kac ni kööe, ni «Met ec mar Wuuö Jwøk bëëde ki uuni.» Ni løkge gø, ni «Gwïëth mar Wuuö Jwøk bëëde ki ïïni.»

⁵Køøre Böeeth ŋata näk wïth jø kac ki beel apëënynye ni kööe, ni «?Nyijøøgø ni poot na wøp enø, a nyijø kaa?»

⁶Ni løgi ya ŋata näk wïth jø kac beel jïre, ni «Beeye nyijø Möap, na öö ki Naømi kanya duue ki Möap.

⁷Ena köö, na ‹A kwaya ïïni naa cøøa kun kwänynya ki wïth beel køør jø kac.› 'Ba eni ööi ka aruunnø cøøn, ni put tïïc këël kawaane ennø, ni poot na pïïnne piny tier abïla ennø.»

⁸Køøre Böeeth aköö jï Ruuth, «Nya nyaara, wïnynyï; kär pwödhö man weyï ni ciï baŋ kwany yi pwödhö mør; 'ba bëëdu na aciel kany ki mään moi na jø tïïc 'moa ii.

⁹Raŋ pwödhö mano kacge ni ciï køørge. Jø tïïc moa näk cwøw yaa cemø niï ba gutge. 'Ba ni näk dëërï da riew, ciï ni mäthï ki pïï moa wømge na en yïth dääe.»

¹⁰Køøre Ruuth cøŋŋe akëël piny ni kuul wïïe piny, ni kööe jï Böeeth, na «?Agïnaŋø na tïïc yiï ni met ki aani, ni cädï kipera en, ni ŋäyï ni aana dhaanhø ma jur mo path?»

¹¹'Ba aløk Böeethi jïgø ni kööe, ni «Gïïa tïïyï bëët jï mii cwørï køør thøw cwørï, këël mana weyï wäru ki meru ki pou kanya nywøl ï yie, ni ööï baŋ jøw mo poot kuyï dïkwøŋ anø caan jïra bëët.

¹²'Ba Wuuö Jwøk ïïno cunne kiper gïna tïïyï; ni ö eni na Wuuö Jwøk na näk Jwø Icriel, Jwøa ööï baŋe na kanï riï buute, ni mooc ïïni ki gïn mo beer.»

¹³Køøre Ruuth aköö, ni «Wui kwäärö, aana jïtö ki met ec baŋï, kiper cwïnya acømï ni caanï luup mo met jïra, këël na näk a ba kwaan røk jø tïïc moï na näk mään.»

¹⁴'Ba na tïme na kar cam, Böeeth aköö jï Ruuth, ni «Ö kany niï cämï ki møø, ni cwenyï møgï ki kadø.» Køøre Ruuth apï piny buut jø kac, ni mooyi ya Böeethi ki beel mo omuuö; ni nyäme gøøc mana jäŋe, ni dööŋ møøki.

¹⁵Kanya døø baŋ kwany, Böeeth jø tïïc moe aköömme ni kööe, ni «Weyu eni nee kwänye këël dï ŋaaŋe, ni kär nou lää wïïe.

¹⁶Ni kännu wøk thuwø røk wïth beel mo wø kayu, ni wiiu ge piny jïre nee kwanye, ni ba joogu eni.»

¹⁷Køøre Ruuth akwänyö yi pwöthögø këël abøøya, ni dïn beel moa kwanye, ni jïte ki beel mo ni rømi tïmö ni yi rumi ma iipa.[4]

¹⁸Ni kwany beegøgø ni aa paac, ni nyooth moa joode ri kwany jï mii cwøre; ni käl cam wøk mana dhäthö dhee thuwø, ni mëëk gø eni.

¹⁹Ni kö mii cwøre jïgø, ni «?Ïïno kwänyö kaa ki beel dïcäŋi? ?Ïïno tïïö kaa? Gwïëth oen bäät ŋata cädö kiperï enø.» Køøre ŋata tïïe baŋ gø acaane jï mii cwøre, ni kööe, ni «Nyeŋ ŋata tïïa baŋe dïcäŋi beeye Böeeth.»

²⁰Ni kö Naømi jï cï nyaare, ni «Ŋatøgø ogwïëth Wuuö Jwøki na näk mëëye käre paanyø bäätø, ø na kwøw, ki bäät cwøra ki wääta na näk onø thøø.» Ni cäŋ Naømi köö jï Ruuth, ni «Ŋatøgø beeye ŋat paara døc, ni ena tuuŋ ki cwøra.»

²¹Ni ö Ruuthi nyijø Möap ni kööe, ni «Gïn mør acaane jïra thuwø; ena köö, ni ‹Ï doo bëëdö na aciel ki jø tïïc 'moa, këël mano thum beelli 'moa ki kac bëët.› »

²²Ni kö Naømi jï cï nyaare ma Ruuth, ni «Wøp enønø, cï nyaara; beerra man cäädhï ki määrögø, ni ba gaaï pwödhö mør, nee bäŋe gïn tägi dëërï mo raac.»

²³Køøre Ruuth abëëdö na aciel ki määra tïïö pwöth Böeeth, ni kwänyö ki beega cwøl ni gäbci ki beega cwøl ni cïndë, gøøc mana thum pwödhö bäre ki kac; ni eni bëëdö ka mii cwøre.