Read anuak Ruuth 4 Bible Online

Ruuth 4 - anuak bible

Ruuth 4

¹Køøre Böeeth aci dhi kiir kar acooŋa, ni pï piny kaace. 'Ba ŋata doo dööŋ ki Ruuth na wäŋ Böeethi acur kaagø. Ni kö Böeethi jïgø, ni «Nyie, gääï mø, ni pïï piny kany.» Ni ö ŋatøgø ni gääe ni put pï piny.

²Ni ö Böeethi ni cwöte ki jiy apaar røk jø døøŋŋø mo paanøgø, ni kööe jïge, ni «Pïïu piny kany.» Ni putge pï piny.

³Køøre Böeeth aköö jï ŋata doo dööŋ ki Ruuth, ni «Naømi na duuö ki po jø Möap manynya ŋøøpa näk mo tuuŋø ma Elimëlëk nee dwøk pwödhö.

⁴'Ba aana cädö ni beerra man caana gø jïrï, nee ŋeewï nyïm jøøi no opï piny kany ii, na näk jø døøk pøø. 'Ba ennø, ni näk ŋeewï ŋeeø, ŋeewï, kiper nee ŋöömmögø put bëëtö na mar wï tuuŋ marø. 'Ba ni näk jïrï bäär, caanï jïra nee ŋääa; kiper bäŋ dhaanhø mør këët mo ŋeew gø, 'ba beeye ïïni keerï, ni ena køørï.» Ni kö ŋatøgø, ni «Ŋeea ŋeeø.»

⁵Køøre Böeeth aköö, ni «Cäŋo ŋeewï pwödhö cer Naømi, Ruuth nyijø Möap na näk cï thøø kälï kälö thuwø, kiper nee cwøre na thøw jïte ki lwiidhø mo dööŋ ŋöömmögø jïre.»

⁶Ni kö ŋata doo dööŋ ki Ruuth, ni «Ba løny jïra ki man lwøra gø na mara; kiper ni näk lwøra lwørø, acaara mara kiper ŋøøm moa doo dööŋ jï wääta ba thur kare këët. Kar dööŋö mana daa dööŋ ki gø lwørï, kiper ba løny jïra ki man dööŋwa ki gø.»

⁷'Ba ki køør kööŋŋö mar jø Icriel mana dïkwøŋ, dööŋŋö ki dhaagø ki lwør ŋøøm mo ŋata no othøw, gïn wø tïïc kipere beeye en; ŋata näk wää luubö warø mare göönye wøk tiere ni mëëk gø wati maya, ni nyootha gø ni luubö mana caane beeye kare, ni gïnögø beeye nyuudhi ki baŋ jø Icriel.

⁸Køøre ŋata doo dööŋ ki Ruuth aköö jï Böeeth, ni «Ŋeew ŋöömmögø nee tïme na marï.» Ni put warø mare gööny wøk.

⁹Køøre Böeeth aköö jï jø døøŋŋø ki jï jiy bëët, «Dïcäŋi u tïmö ni uuna jiy mo ŋäc luummi en; gïïa en jï Elimëlëk bëët ki gïïa en jï Këliwön ki Malön bëët oŋeea baŋ Naømi.

¹⁰Këël Ruuth thuwø, nyijø Möap, cï Malön na no othøw, okäla nee tïme na cïïa, nee Malön jïte ki lwiidhø mo dööŋ ŋöömmögø jïre, nee nyeŋŋe ba rwäänye dï tuuŋge wala dï jø poge; dïcäŋi u tïmö ni uuna jiy mo ŋäc luummi en.»

¹¹Køøre jøøa en dhi kiir kar acooŋa bëët ki jø døøŋŋø aköö, ni «Wa tïmö ni waana jiy mo ŋäc luummögø møn. Beerra man ö Wuuö Jwøki ni tïïc dhaagø mano ö paarï enø ni caala Reecal ki Liia, mään moa na ariiø na nyaac dhi øt Icrielli ki rege. Ïïno tïmö na dhaanhø mo okwär, ni wïny nyeŋŋï yi Eeparata na näk Bethelem.

¹²Beerra man ö Wuuö Jwøki thuwø ni nyaac dhi ødï ki ro obwöre moo jootï ki dhaagø manøgø; ni tïm dhi ødï ni caala dhi øt Peereth na nywøl menni ma Tamar ki Juuda.»

¹³Køøre Böeeth Ruuth alwøre ni tïme na cïïe, ni ci baŋ gø na dhaagø; ni wëëgi ya Wuuö Jwøki jïtö ki dhaanhø, ni lwaare ki gø na dïcwøø.

¹⁴Ni kö määnni jï Naømi, «Pwøc en jï Wuuö Jwøk, na mooc ïïni ki ŋat dööŋ cï nyaarï ki gø, ni jïtï ki nyikwaarï dïcäŋi. Beerra man tïm nyeŋ nyilaalli mana lwaarø ki gø ni wïnyö dï Icriel.

¹⁵Eno tïmö na ŋato kwøw ïïni, na ŋato køny ïïni kanyo døøŋŋï; kiper ŋata nywøl gø beeye cï nyaarï na mëër ki ïïni, dhaaŋŋa pere letha eni jïrï ki wäätï abïriiø moa diï nywølø.»

¹⁶Køøre Naømi nyilaal alwøre ni cïp gø kööre, ni put bëëtö ni pïra gø.

¹⁷Ni ö määnni moa en ya atut ni köge, ni «Naømi ajïtö ki nyikwaare ma dïcwøø.» Ni cakge nyeŋ gø no Obet. 'Ba Obet beeye wää Jeci, ni ö Jeci ni näk wää nyeya ma Deebit.

¹⁸'Ba moi beege nyïïkwaac Peereth; Peereth beeye wää Eedharan,

¹⁹ni ö Eedharanni ni näk wää Ram, ni ö Rammi ni näk wää Aminadap,

²⁰ni ö Aminadapi ni näk wää Nacøn, ni ö Nacønni ni näk wää Calmön,

²¹ni ö Calmönni ni näk wää Böeeth, ni ö Böeethi ni näk wää Obet,

²²ni ö Obeti ni näk wää Jeci, ni ö Jeci ni näk wää Deebit na näk nyeya.