Read anuak 1 Camiel 10 Bible Online

1 Camiel 10 - anuak bible

1 Camiel 10

¹Køøre Camiel wïl maaw alwøre, ni thii maaw wï Cøøl, ni nuum dhi gø ni kööe jïgø, «?Aŋø, Wuuö Jwøk ï käre røønyø niï tïmï ni ïïna wïth jiye na näk thööge?

²'Ba dïcäŋi en, kanyo nø tïŋŋï buuta kany, ï jïtö ki jiy ariiø ma cwøw mo ena buut bwöc Reecal na en Dheldha yi ŋööm jø tuuŋ Benjamen, ni kö jøøgø jïrï na arëëni moa ciï baŋge nee manynyï anø joot, ni wäru acaara mana en wïïe kiper arëëni awiie ni tïme ni cädö kiperu døc ni cäänö, ni ‹?Luubö mar wääda otïïa gø nidïï nø?›

³«Køøre nø, ïïno pöödhi ki kaace, ni pïïyï buut jaadha dwøŋ na en Tabör; 'ba noo pïïyï kaace, uuno røømmi ki jiy adäk ma cwøw mo ge cøøa Bëthël nee cïpge ko olämme jï Jwøk. 'Ba jøøgø na adäk yøø, dhaanhø aciel käädö ki nyïïdïëk adäk ma atëëe, dhaanhø maya käära dääpe adäk, ni dhaanhø maya käära køøŋ nyïïomøki ki ya agwäy;

⁴'ba geni, ï määthge määdhö ni moocge ïïni ki dääpe ariiø, ni lwørï dääpe moøgø ceŋge.

⁵«Køør manøgønø, ï pïï buut thuur man wø cïp olämme jï Jwøk bääte, ni beeye thuur wø kur jø Pilitinni bääte; 'ba kanyo tïme niï pïï kaace, niï cøøa pääny ennø, ï puta røømmø ki lwaa nyïïkuk Jwøk ni ge löönynya piny ki kar lam mana en bäät thuur, ni thoom-othïënhö, ka anëëdö, ko opelø, ki thoom man wø root di pwödö nyïmge, ni ge wär ki dudi ni yïthge met ni ge pwøya Jwøk.

⁶Køøre Jwïëc Wuuö Jwøk puta ö bäätï ni teek ni put ï tïïc niï wärï ki duut ki geni na aciel, ni wïït cwïnyï ni tïmï na teeŋ dhaanhø mør.

⁷'Ba kanyø jootï nyuuthe moøgø noo tägö, wär put ŋäc ni Jwøk oløny ni bëëdö ki ïïni. Køøre nø, løny jïrï ki man tïïyï gïno tïïyï jaak.

⁸'Ba ïïno løøc piny ni ciï nyïma Gëlgela; 'ba ka adïëri møn, aani, a löönynya piny baŋï ni cïpa jï Wuuö Jwøk ko olämme mo wø waaŋ bäre, ko olämme mo wø duunni ki mëër. 'Ba wärï kurï ki nïne abïriiø këël kanyo ööa baŋï, ni ö gïno tïïyï ni nyoodha gø jïrï.»

⁹'Ba gïna tägö, kanya ö Cøølli na løk ŋääe jï Camiel ni mare wääth, Jwøk cwïny Cøøl aput wiil møn; ni ö nyuuthe moøgø ni putge tägö dïcäŋögø kiree.

¹⁰'Ba kanya pïïcge bäät thuur kaace, ka adïëri møn, ena put røømmø ki lwaa nyïïkuk Jwøk; ni ö Jwïëc Jwøki ni put ö bääte ni teek døc ni put eni tïïc nee wäre ki duut ni yie met, ni pwøya Jwøk ki jøøgø na aciel.

¹¹'Ba kanya ö jiyi bëët moa bëëdö ni Cøøl ŋäcge na jootge eni ni wär ki duut ki nyïïkuk Jwøk na aciel, gena cäänö yïthakicge, ni köge, «?Agïnaŋø na tägö dëër Cøøl o Kic? ?Aŋø, Cøøl thuwø atïmö ni ena dï nyïïkuk Jwøk?»

¹²'Ba dhaanhø aciel kaace mare acaane ni kööe, «?Aŋø, jøøgø bëët na nyïïkuk Jwøk yøø, wëëkge ŋäyu?» 'Ba luubö mana caan kiper Cøøl aput tïmö na aŋaada, ni jiy köö, «?Aŋø, Cøøl thuwø atïmö ni ena dï nyïïkuk Jwøk?»

¹³'Ba kanya nø løny Cøølli ki wär duut mana wärge ki nyïïkuk Jwøk, ena ci kar lam na en bäät thuur.

¹⁴'Ba cöök wää Cøølli aköö jï Cøøl ki ŋat tïïc mare, ni «?Uuno pöötha kaa?» Ni kö Cøølli, ni «Waana ci kuna manywa arëëni. 'Ba kanya tïme na arëëni moøgø ba løny ki joot jïwa këët, waana ci baŋ Camiel.»

¹⁵Ni kö cöök wää Cøølli, «Nyie wääda, gïna caan Camielli jïrï, caanï jïra.»

¹⁶Kanyøgønø, Cøøl aköö jï wänni, na «Acaan Camielli jïwa na kare, na arëëni onø joot.» 'Ba Cøøl luubö mana caan Camielli jïre ni eni tïmö na nyeya, käre caanø jïgø.

¹⁷'Ba kanya tïme na køøre cään, Camiel jø Icriel acwøle ni cooŋ ge kanya ciel nyïm Wuuö Jwøk kanya cwøl ni Micpa;

¹⁸ni kööe jïge, ni «Man beeye dwør Wuuö Jwøk Jwø Icriel, ena köö, ni ‹Uuni, u na jø Icriel, uuna käla wøk ki Ijep, ni kønya uuni ceŋ jø Ijep, ki ceŋ nyeye bëët moa teek na bëëdö ni u ege dïïmö.›

¹⁹'Ba ennø uuni, Jwøk maru anø kwierru, ni beeye Jwøa køny uuni yïth gïïa leth ki caannø mana bëëdu yie, ni kööu, ni ‹Röönyï jïwa ki nyeya mo bëëtwa tiere.› 'Ba ennø møn, nyänhnhu nyïm Wuuö Jwøk ki køør wïth tuŋi mou ki dhøk uudi mou.»

²⁰Kanyøgønø, Camiel wïth tuŋi mo jø Icriel bëët acwöl buute kany mo cään, ni ö jø tuuŋ Benjamenni ni jieri ki køør ŋïïce mo wø tïïc ki ri kwääk ki baw.

²¹Køøre Camiel jø tuuŋ Benjamen acwöl buute kany mo cään ki køør dhøk uudi moge, ni o dhi øt Matari ni jieri ki køør ŋïïce mo wø tïïc ki ri kwääk ki baw. Køøre jiy moa en dhi øt Matari acwöl buute kany mo cään, ni ö Cøølli o Kic ni jieri; 'ba kanya neetge eni, eni kär joodø.

²²Kar kaagønø, Wuuö Jwøk acäŋge pëënynyö ni köge, «?Aŋø, da dhaanhø mo poot kär ö kany en?» Kanyøgønø, Wuuö Jwøk aköö, ni «Ka adïëri møn, Cøøl ree ee kanø yïthakic jammi mou moa kääru.»

²³'Ba jiy aput reŋ baŋe, ni lwørge eni kaace, ni kälge gø; 'ba kanya cuŋŋe dï jiy, eni bäär døc, ni jiy ee thany piny ni ge dïët ki gööge.

²⁴'Ba Camiel aköö jï jiy bëët, «Neennu, ŋata jier Wuuö Jwøki beeye en. Ka adïëri møn, bäŋ dhaanhø mør mo caala eni røk jø Icriel bëët.» Kanyøgønø, jiy bëët aput kwöŋŋö ni yïthge met ni köge, «Cøøl puta bëëtö na nyeya marwa møn!»

²⁵Køøre Camiel jöör bëëtö mar nyeya acaane jï jiy, ni göör luup moøgø yi wëëlö ni cïp gø nyïm Wuuö Jwøk. Ni ö Camielli ni wëëk jiy keethø, ni ö ŋati man nø ni put døø paare.

²⁶Køøre Cøøl thuwø adøø paare na en Giba; ni ö cwøw mo teek mo cwïnyge ocøm Jwøki ni aacge ki Cøøl na aciel.

²⁷'Ba jø møøk mo wïthge reyø aköö, «?Aŋø, nyenøgø jøw piem gø nidïï?» Ni putge Cøøl taak, ni kärge cïpö jïgø ki muuce. 'Ba Cøøl alïŋö jaak.