Read anuak 1 Camiel 11 Bible Online

1 Camiel 11 - anuak bible

1 Camiel 11

¹'Ba Naøc nyeny jø Amön aöö ki jiye, ni tïïc twïër mare buut pääny jø Jabic-Gelät nee këëde ki geni; 'ba cwøw bëët mo päänyögø aköö jï Naøc, ni «Tudï ki luubö ki waani niï tïnywa.»

²'Ba Naøc nyeny jø Amön aköö jïge, na «A tudö ki luubö ki uuni møn, 'ba ŋati man nø dïïu waŋe mana en bäät cwïïe gööna wøk, ni tïïa gïnögø na ajøøŋ bäät jø Icriel bëët.»

³'Ba jø døøŋŋø mo jø Jabic-Gelät aköö jïge, ni «Wec waani ki nïne abïriiø keerge, nee wa jääkwa ki dwøl dï ŋööm powa ma Icriel bäre. Køøre ni näk mo tïmö ni bäŋ ŋat mo køny waani nø, waani wa ööa wøk baŋï.»

⁴Køøre jøøa jääŋŋi apïï Giba, päänya bëët Cøølli yie, ni caange luup moøgø bëët ni wïnyö jï jiy, ni ö jiyi bëët ni putge jwøk ni döötge ege tïŋ maal.

⁵'Ba kar kaagø, Cøøl aput öö ki yi pwödhö ni cäädha køør dhäk mo puur, ni kööe, na «?Aŋø, agïnaŋø no otägö dëët jiy, ni jwöŋge en?» Kanyøgønø, luubö mana käl baŋ jø Jabic-Gelät acaange jïgø.

⁶'Ba kanya ö Cøølli na wïny luummögø, Jwïëc Jwøk aput ö bääte ni teek døc, ni put wëër døc.

⁷'Ba eni dhää puur ariiø aput ŋarø na thäŋi, ni cïp ge ceŋ jiy, ni jääŋ ge dï ŋööm jø Icriel bäre, ni kööe, ni «Ŋato ba ö wøk køøra, a na Cøøl en ki Camiel, teeŋ gïn di tïïö dëët dhäk moe.» 'Ba jiy aput lwäyö ki gïno tïïc Wuuö Jwøki, ni putge ö wøk kaamar dhaanhø aciel.

⁸Ni ö Cøølli ni kwaan geni Bëdhëk; ni tïm jø Icrielli moa näk jø tuuŋ Juuda na jiy ma kume ma pïëradäk, ni jø Icriel møga beege jiy ma kume ma dïpe adäk.

⁹'Ba gena köö jï jøøa jääŋŋi na ö baŋge, ni «Cou ni caannu gø jï jø Jabic-Gelät, ni ‹Diøø ni cäŋ ena dhöör, u jïtö ki køny.› » Kanyøgønø, jøøgø na jääŋŋi yøø aput døø, ni caange gø jï jø Jabic-Gelät; ni ö jø Jabic-Gelät ni mïn yïthge.

¹⁰Ni ö jø Jabic-Gelät ni köge jï jø Amön, ni «Diøø wa ööa wøk baŋu, nee gïna manynyu tïïyu dëëtwa.»

¹¹'Ba na tïme na kur amöölla, Cøøl jiy acïïmme na dhøgi adäk. 'Ba kanya tïm pinynyi na köök gwïën, gena ci yi twïër jø Amön ni 'näkge geni këël mana këët cäŋŋi dhöör. Ni put jøøa no obøth keethø, ni ŋati man nø rïïŋi ka jööre, ni bäŋ jiy mo orööpö na ariiø.

¹²Køøre jiy aköö jï Camiel, na «?Age jøøa köö, ni ‹Cøøl ba tïmö na nyeya marø›? Käl jøøgø, nee ge 'näkwa ennø.»

¹³'Ba Cøøl aköö, ni «Bäŋ ŋat mo di nääö dïcäŋi, kiper dïcäŋ man, Wuuö Jwøk køny mo dwøŋ døc atïïe dï Icriel.»

¹⁴Køøre Camiel aköö jï jiy, ni «Ööu, waa cøø Gëlgela nee rööny tïïø na adïëri.»

¹⁵Kanyøgønø, jiy bëët aci Gëlgela, ni røønyge Cøøl na nyeya nyïm Wuuö Jwøk Gëlgela. Ni cïpge ko olämme mo wø duunni ki mëër jï Wuuö Jwøk kaace thuwø; ni ö Cøølli ki jø Icriel bëët ni jïtge ki met ec mo dwøŋ.