Read anuak 1 Camiel 13 Bible Online

1 Camiel 13 - anuak bible

1 Camiel 13

¹'Ba kanya täk Cøølli ki man bëëde ni ena nyeya, cwiiye oløny na pïëraŋween; 'ba ena bëëdö na nyeya ki cwiiri ma pïërariiø kurriiø dï Icriel.

²'Ba Cøøl akwänyö ki jø leny ma kume adäk røk jø Icriel, ni lwöte røk jøøgø ki jiy ma kume ariiø nee bëëtge ki eni paac mana cwøl ni Mikmac ki mïëya en bäät kïte na en buut Bëthël; ni ö jø leny ma kuma aciel ni tïmge ni ge bëëdö ki Jönathan o Cøøl pääny mana cwøl ni Giba na en kur jø tuuŋ Benjamen. 'Ba jiy moa dööŋ awëëk wääth, nee ŋati man nø døø paare.

³'Ba Jönathan kar koor mar jø Pilitin mana en Gëba atwöe ni put jiy 'näk, ni ö jø Pilitinni møga ni wïnyge gø. Køøre Cøøl agööc piny ki luubö nee tuuŋ kooth dï ŋöömö bäre, ni kööe, ni «Jø Ibaru,[10] beerra man wïnynyu gïn.»

⁴Ni ö jø Icrielli ni wïnyge gø ni Cøøl kar koor mar jø Pilitin atwöe ni 'näk jiy, ni wïnyge gø thuwø ni jø Icriel otïmö kaamar gïn mo ŋwäänynye raac ki jï jø Pilitin. Køøre jø Icriel acwøl nee öge baŋ Cøøl Gëlgela.

⁵'Ba jø Pilitin rege acooŋge kiper nee ge këëtge ki jø Icriel, ni jïge da jïëth leny mo wø tut okwëënyi ma kume adäk, ki jiy ma kume abïciel mo wø këëdi ki bäät okwëënyi, ki jø leny mo ba løny ki kwaan mo thööthge caala nyeŋ akwöny deŋ naama dwøŋ. Ni öge ni tïïcge twïër marge Mikmac na en løø Bëëth-Awëën jï løø kur tuul-cäŋ.

⁶'Ba kanya ö jø Icrielli na ŋäcge gø ni gïn mo leth ööa bäätge, ni bëëtö marge tïmö ni teek, jiy rege akange yïth uut kïte, ki yïth abuŋŋe moa døøŋŋø, ki yïthakic kïte, ki kwöra no otïïö na kwör gwøk røk, ki yïth buri.

⁷'Ba jø Ibaru møøk thuwø gena ŋut løø Naam Jördan løøga yi ŋööm jø tuuŋ Gaat ki yi ŋööm Gelät. 'Ba kar kaagø, Cøøl poot bëëdö Gëlgela, ni jø leny moa caath køøre bëët ge bëëdö ni dëëtge miel ki lwär.

⁸'Ba Cøøl akuuru ki nïne abïriiø, ki køør mana caan Camielli jïre ni eni doo öö nee cïpe ko olämme, 'ba Camiel kär ö Gëlgela; ni ö jø lenynyi ni täkge ki man keethge buut Cøøl.

⁹Køøre Cøøl aköö, ni «Kännu ki lääy nee cïp no olämi man wø waaŋ bäre ko olämi man wø duunni ki mëër.» Køøre eni olämi man wø waaŋ bäre acïbe.

¹⁰'Ba kanya lønye ennø ki cïp olämi man wø waaŋ bäre, ka adïëri møn, Camiel aput pïï; ni ö Cøølli ni ci baŋ gø nee ge røømge ki gø nee määdhe.

¹¹'Ba Camiel aköö jï Cøøl, «?Aŋø, ï tïnynyï ŋø ki gïn?» Ni kö Cøølli, ni «Beeye kiper mana jooda jiy ni ge keethø buuta, ni ïïni thuwø, ï poot kär pïï ki yïth nïra caanï jïra, ni jø Pilitin thuwø rege ege nø cooŋ Mikmac.

¹²Køøre aana cädö ni kööa, ni ‹Ennø, jø Pilitin ööa baŋa kuna tukge aani Gëlgela, ni aani Wuuö Jwøk poot kära kwaaø kiper met ec mare.› Kanyøgønø, dëëra amaaŋŋa ni cïba olämi man wø waaŋ bäre.»

¹³'Ba Camiel aköö jï Cøøl, ni «Ïïni, ïïna tïïö ki gïn mo wïïï kärï caarø ki gø; ciik Wuuö Jwøk, Jwøk marï, na kööm ïïni ki gø, kärï gwøø, kiper doo na iï gwøø møn, Wuuö Jwøk nyec marï dee tïïö nee bëëde dï jø Icriel na bäre bäre.

¹⁴'Ba ennø, nyec marï ba bëëdö këët. 'Ba Wuuö Jwøk anø määnyö ki dhaanhø, ni beeye dhaanhø mo cwïnye ena køøre, ni ö Wuuö Jwøki ni tïïc ŋatøgø nee tïme na wïth jiye, kiper mana kärï gïna kööm ïïni ki gø gwøø.»

¹⁵Køøre Camiel atïŋŋö ki Gëlgela ni ci Giba na en kur jø tuuŋ Benjamen. 'Ba Cøøl jø leny moa nut buute akwaane, ni tïmge na jiy mo jïtö ki dïpe abïciel keerge.

¹⁶'Ba Cøøl, ki wääde ma Jönathan, ki jø leny moa nut buutge, ge bëëdö Gëba na en kur jø tuuŋ Benjamen, ni jø Pilitin twïër marge ege tïïö Mikmac.

¹⁷Kanyøgønø, jø twëër aöö ki yi twïër mar jø Pilitin ni rege ege cïïmmö na dhøgi adäk; ni dhøk aciel cura jï kun da päänya cwøl no Opara, na en yi ŋööm Cögal,

¹⁸ni dhøk maya cura jï kun da päänya cwøl ni Bëëth-Örön, ni ö dhøk maya ni cur jï kuna näk da waŋ keew mana näk raŋŋa rege ki goor Dheböym na en jï kuna näk da paap.

¹⁹'Ba kar kaagø, bäŋ ŋat ma rëëmmö mo thädhö ki nywïëny mo di joodø dï Icriel bäre, kiper mana näk geno män jø Pilitinni ki thääth, ni köge, ni «Kär dee ŋat Ibaru mo thädhö ko opëëlle ki tøøŋi.»

²⁰'Ba jø Icriel bëët, gïn wø tïïcge, ge wø cøøa piny baŋ jø Pilitin nee ŋati man nø ley mare, ki caala mare ki jap tïïc moe møga nee wø paae.

²¹'Ba kany wø paak gïïögø jïge, ge wø cudö ki gwet cekel.

²²'Ba kanya tïme na dïcäŋ leny, bäŋ opëëllö wala tøŋ mo ojoodø ceŋ jø Icriel moa bëëdö ki Cøøl ki Jönathan, 'ba beege Cøøl ki wääde ma Jönathan keerge na joodi ceŋge.

²³Kanyøgønø, jø Pilitin kar koor aputge tïïc bäät kïdi mana en buut jöör Mikmac.