Read anuak 1 Camiel 14 Bible Online

1 Camiel 14 - anuak bible

1 Camiel 14

¹'Ba dïcäŋ aciel Jönathan o Cøøl aköö jï nyen wø käär jap leny jïre, ni «Ööï, ø aa ŋutø kar koor mar jø Pilitin na en jï kunece.» 'Ba Jönathan wääth manøgø käre caanø jï wänni.

²'Ba kar kaagø, Cøøl bëëdö ya aŋuun Giba, ni eno pï piny tier adikwala mana en Migarön, ni buute da jø leny mo jïtö ki dïpe abïciel.

³'Ba Kwääy Lam Mana Dwøŋ na bëëdö buutge kaagø, na abïïna cwøl ni ëëput ee røø dëëre, beeye Akiya wär Akitöp, Akitöp cöök Ikaböt o Piniac, Piniac wär Ëli, ni beeye Ëli na bëëdö na Kwääy Lam Mana Dwøŋ mar Wuuö Jwøk kanya cwøl ni Cëëlö. 'Ba kuc jiyi ni Jönathan onø aay.

⁴'Ba Jönathan kanya manynye nee ŋut kar koor mar jø Pilitin ki yie, løøk man nø da kïdi mo cuŋŋö mo beth, ni nyeŋ aciel cwøl ni Bödheth ni ö nyeŋ maya ni cwøli ni Cënë.

⁵Ni kïte moøgø, aciel cuŋŋa jï løø wï-piny ni dïët ki Mikmac, ni maya cuŋŋa jï løø tier-piny ni dïët ki Giba.

⁶Køøre Jönathan aköö jï nyena käär jap leny jïre, ni «Ööï, ø aa ŋutø kar koor mar jøøgø ni kär daŋø yøø; kanymør Wuuö Jwøk tïïö ki gïn mo beer kiperø. Kiper bäŋ gïn mo mäna Wuuö Jwøk ki man kunye ki ri jiy mo thööth wala ki ri jiy mo nøk.»

⁷'Ba nyen wø käär jap leny jï Jönathan aköö, ni «Jammi bëët moa caarï ki cwïnyï ni beyø, tïïyï. Neenï, aani a nut buutï; gïno caarï ki cwïnyï jaak, beeye gïno tïïa thuwø; cøø nø.»

⁸Køøre Jönathan aköö, ni «Neenï, ennø ø ŋuta baŋ jøøgø, ni nyoodhø røø jïge.

⁹Ni näk mo ge köö ki øøni, ni ‹Cuŋŋu këël mano öwa baŋu›, køøre nø, ø puta cuŋŋö karø ni ba cøø baŋge.

¹⁰'Ba ni näk mo ge köö, ni ‹Ööu baŋwa,› ø puta ci baŋge, kiper luummögø nyootha gø ni Wuuö Jwøk jøøgø ee nø cïp ceŋŋø; 'ba gïnögø otïmö na nyuudhi jïïø.»

¹¹'Ba kanya ö jagøgø na ariiø yøø na nyoothge rege jï jøøa en kar koor mar jø Pilitin, jø Pilitin aput köö, ni «Neennu, jø Ibaru yøøke; marge beeye ööny wøk ki yïth buri kwöra näk dëëtge ege kaannø yïthge.»

¹²Kanyøgønø, jø Pilitin moa en kar koor kaagø, Jönathan ki nyen wø käär jap leny jïre aputge rwaac ni köge, ni «Ööu baŋwa nee gïn mør kany caanwa jïïu.» Ni kö Jönathanni jï nyen wø käär jap leny jïre, «Ööï nø, cäädhï køøra, kiper Wuuö Jwøk jøøgø anø cïp ceŋ jø Icriel.»

¹³Køøre Jönathan aput eth maal bäät kïdi ni muulö, ni nyen wø käär jap leny jïre nutö køøre. 'Ba kanya pïïc Jönathanni kar koor, ena put leny ki jø Pilitin, ni 'näk geni; ni ö nyen wø käär jap leny jï Jönathan ni cäädhe køøre ni lema jiy moa bøth.

¹⁴'Ba jiy moa kwøŋ thøø na 'näk Jönathanni ki nyen wø käär jap leny jïre, beege jiy mo jïtö ki pïërariiø, ni jøøgø 'näkge kany mo caala pwödhö ma böölö aciel.

¹⁵Ni ö jø Pilitinni moa en twïër ki moa en pwöla, ni beege jø Pilitin bëët, ni put dëëtge tïmö ni kwanynyi ki lwär. Këël jøøa en kar koor, ki jø twëër, dëëtge atïmö ni kwanynyi ki lwär thuwø, ni put pinynyi jïtö ki dïjäŋ piny. 'Ba lwär manøgø bäre ni dwøŋ enø beeye gïn mo käla baŋ Jwøk.

¹⁶'Ba jø koor mo Cøøl na en Giba na en kur jø tuuŋ Benjamen kanya lwïthge, ka adïëri møn, jø leny mo jø Pilitin moa thööth døc aputge joot ni ge bwøk, ni jøw rïïŋö ni ge reŋŋa kun ki kun.

¹⁷'Ba Cøøl aköö jï jø leny moa en buute, ni «Ennø, kwaannu dëëtu nee joodø ki man näk ma aŋa noo aay dëëtø en.» 'Ba kanya kwaange dëëtge, ka adïëri møn, Jönathan ki nyen wø käär jap leny jïre ajootge ni tøørø dïge.

¹⁸Køøre Cøøl aköö jï Akiya na näk Kwääy Lam Mana Dwøŋ, na «Acanduk man wø nyooth luumma tuut Jwøki ki jiy käl kany.» Kiper kar kaaca acanduk mar Jwøk ena buut jø Icriel kaagø.

¹⁹'Ba kanya tïme ni Cøøl cäänö ka Akiya ni beeye Kwääy Lam Mana Dwøŋ, jø leny mo jø Pilitin aput tïmö ni ge ŋurö yi twïër marge ni döötge wïnyö ni nyänhnha maal; kanyøgønø, Cøøl aköö jï Kwääy Lam Mana Dwøŋ, ni «Weyï jaak nø.»

²⁰Køøre Cøøl ki jø leny bëët moa en buute rege adwalge na aciel ni cige baŋ leny; 'ba ka adïëri møn, kanya pïïcge, ajootge ni jø leny mo jø Pilitin wïthge rege ege kierø døc, ni ŋati man nø cwøpa wati ko opëëllö.

²¹'Ba kar kaagø, jø Ibaru moa näk okwøŋ ci baŋ jø leny mo jø Pilitin nee kuutge ki ge, ni beeye kanya ö jø Pilitinni na tïïcge twïër marge nee këëtge ki jø Icriel, jø Ibaru moøgø rege aløkge ni duuge baŋ tuuŋge ma jø Icriel na en ri Cøøl ki Jönathan.

²²'Ba kanya ö jø Icrielli moa näk rege ege kan mïëya en bäät kïte na en kur jø tuuŋ Ipariem na wïnyge gø ni jø Pilitin abwøk, gena put reŋ køør jø Pilitin ni 'näkge geni.

²³Kanyøgønø, Wuuö Jwøk jø Icriel aput piem dïcäŋögø, ni ö lenynyi ni put nyaay ni kaal Bëëth-Awëën.

²⁴'Ba dïcäŋögø jø leny mo jø Icriel geno ööl døc, kiper Cøøl jiy awëëk kööŋ ni kööe, na «Acïëni oen bäät ŋato cämö ni cäŋ poot kär pädhö, këël kanyo coola kwöra dëët nyïïmän 'moa.» Kanyøgønø, aput tïmö ni bäŋ dhaanhø mo cam ee belø røk jø leny mo jø Icriel.

²⁵Ni ö jø lenynyi moøgø bëët ni pïïcge ri lul ni dønyge yie, ni jootge maar kïc ni piny manøgø bäre ogääbö ki gø.

²⁶'Ba kanya døny jiyi yi lul, ka adïëri møn, maar kïc bëëdö ni päl jaak; 'ba bäŋ dhaanhø mo olwötö ki maar kïc ni kïth gø dhee, kiper jiy olwäyö ki kööŋ mana nø jïëcge.

²⁷'Ba Jönathan, kanya ö wänni na wëëk jiy kööŋ, gïnögø käre wïnynyö. Kiper manøgønø, Jönathan athøra mana kääre ki cere tier gø arwaak yi maar kïc, ni kïth gø dhee, ni ö dëëre ni put nithïk.

²⁸Køøre dhaanhø aciel røk jiy, mare acaane ni kööe, ni «Wäru, jiy anø cäänne døc ni wëëk jiy kööŋ, ni kööe, na ‹Acïëni oen bäät ŋato cämö dïcäŋi.› » 'Ba kar kaagø møn, jiy oööl døc.

²⁹Køøre Jönathan aköö, ni «Wära wïth jiy akiere. Neennu, ki køør mana bela maar kïc man ni thiinh en, dëëra aput nithïk.

³⁰?Aŋø, doo na jiy ocämö ki gïïa twierge baŋ nyïïmän moge dïcäŋi en, jø Pilitin ba doo puta böötö døc ni kaala man? Kiper ennø, jiy moa 'näk dëët jø Pilitin ba thööth døc.»

³¹'Ba dïcäŋögø jø leny mo jø Icriel, jø Pilitin aböötge ni 'näkge geni ki mana täge ki Mikmac këël mana këët Ayalön. 'Ba kar kaagø, jø Icriel oööl døc.

³²Kanyøgønø, jø Icriel aput läät kuna twierge dïëk, ki dhäk, ki nyïïrøøe, ni putge lääy moøgø ŋarø piny yïth ŋøøm kaagø; ni putge rïk lääy moøgø cam ni rege ege jääbö ki rem jaak.[11]

³³Køøre acaan jï Cøøl ni køp, ni «Neenï, jiy anø tägö ki man tïïge ki raay dëër Wuuö Jwøk, kiper rïŋ camge ni rege ege jääbö ki rem.» Ni kö Cøølli, ni «Uuna nø tägö ki man tïïu ki gïn mo raac døc; ennø, määnyu ki kïdi mo dwøŋ døc ni ŋïëlu gø baŋa kany.»

³⁴Køøre Cøøl aköö, ni «Cou ni caathu dï jiy ni caannu gø jïge ni Cøøl aköö, ni ‹Ŋati man nø dëëtu käl dhieŋ mare, wala diel mare, ni ŋaal gø kany bäät kïdi man, ni cäme; 'ba käru tïïö ki raay dëër Wuuö Jwøk ki man cammu rïŋ mo rege ege jääbö ki rem.› » 'Ba dïwäänögø jiy bëët aput öö ni ŋati man nø dhieŋ mare di peeyø ni ŋaal gø bäät kïdi kaagø.

³⁵'Ba Cøøl atïïö ki gïn wø cïp olämme bääte jï Wuuö Jwøk kaace; ni manøgø beeye gïn wø cïp olämme bääte mana dïkwøŋ na tïïc Cøølli jï Wuuö Jwøk.

³⁶Køøre Cøøl aköö jï jø leny, ni «Ø aa løøyø piny ni läpø køør jø Pilitin ki wäär ennø, nee gïïa en jïge twierø këël mano tïm pinynyi na amöölla, ni bäŋ dhaanhø mo wiiø dëëtge.» Ni köge, ni «Tïïc gïna caarï ni beerra eni ki jïrï jaak.» 'Ba Akiya Kwääy Lam Mana Dwøŋ aköö, ni «Beerra man pëënynyø Jwøk kany dïturu.»

³⁷Ni ö Cøølli ni pëëny Jwøk ni kööe, ni «?Läpa køør jø Pilitin? ?A ni näk mo aano läp køørge, ge cïbï ceŋ jø Icriel?» 'Ba Wuuö Jwøk bäŋ gïn mo ee løø jï Cøøl dïcäŋögø.

³⁸'Ba Cøøl aköö jï kwääc lwaae, ni «Uuni bëët u na kwääc lwaae, nyänhnhu kany mo cään nee bääyö man no otägö dïcäŋi en nee tiere manynyu ni jootu gø.

³⁹'Ba ki nyeŋ Wuuö Jwøk na kwøw, Jwø wø piem jø Icriel, këël bääyö manøgø tïïya wääda ma Jönathan, ka adïëri møn, eni put ka 'näk.» 'Ba ki røk jiy bëët, bäŋ dhaanhø aciel mo mare ee løø jï Cøøl.

⁴⁰Køøre Cøøl acäŋ köö jï jø leny mo jø Icriel bëët, ni «Uuni, cou løøk aciel, nee aani ki wääda ma Jönathan nee wa ciwa løøk maya.» Ni kö jiyi jï Cøøl, ni «Tïïc gïna caarï ni beerra eni ki jïrï jaak.»

⁴¹Kanyøgønø, Cøøl aköö jï Wuuö Jwøk, Jwø Icriel, ni «Nyooth marï na adïëri, nee ŋata bääyö joot yïthakicwa.» 'Ba Jönathan ki Cøøl aput nyooth, ni ö jø Icrielli ni dööŋge wøk.

⁴²'Ba Cøøl aköö, ni «Ŋïïce mo wø tïïc ki ri kwääk ki baw tïïyu kipera ki wääda ma Jönathan, nee ŋata bääyö joot yïthakicwa.» Ni ö Jönathanni ni nyoodhi.

⁴³Køøre Cøøl aköö jï Jönathan, ni «Ennø, gïna näk iï tïïö caanï jïra.» Kanyøgønø, Jönathan mare acaane ni kööe, ni «Ka adïëri møn, da maar kïc mo thiinh maa bela, ni lwøra ka tier athøra mana en cera. 'Ba ennø møn, a nut ennø; løny ki man 'näk aani.»

⁴⁴'Ba Cøøl aköö, «Nyie Jönathan, ka adïëri møn, ï di nääö. Ni näk miï kär nääö, beerra man ö Jwøki ni raany aani.»

⁴⁵'Ba jiy aköö jï Cøøl, «?Aŋø, Jönathan na tïïö døc, ni jït jø Icrielli ki køny man ni dwøŋ en ki køøre, doo nääö møn? Gïnögø ba doo tägö na bäre bäre. Ki nyeŋ Jwøa kwøw, këël jëën wï Jönathan aciel, ba doo pätha piny na bäre bäre, kiper Jönathan atïïö ki Jwøk na aciel dïcäŋi en.» Kanyøgønø, Jönathan aput jiyi køny ni käri nääö.

⁴⁶Køøre Cøøl jø Pilitin aput wec ni käre läp køørge këët, ni ö jø Pilitinni ni putge ci poge.

⁴⁷'Ba kanya bëët Cøølli ni ena nyeya mar jø Icriel, ena këëdö ki nyïïmän moe bëët kwöra enge yïthge, ni beege jø Möap, ki jø Amön, ki jø Ëdöm, ki nyeye moa bëëdö Dhöba, ki jø Pilitin; ni put tïmö ni kany wø ci Cøølli yie jaak, kwör pute ka cool.

⁴⁸'Ba Cøøl akëëdö ki leny mo teek, ni bööt jø Amalëk, ni piem jø Icriel ceŋ jø Amalëk moa ö baŋge na twier geni.

⁴⁹'Ba nyeŋ wäät Cøøl beege Jönathan, ki Yecuwi, ki Mëlkica; ni nyeŋ nyïïe na näk ariiø beege Mërap na dwøŋ ki Mikal na thiinh.

⁵⁰Ni nyeŋ cï Cøøl beeye Akinaam nya Akimaath. 'Ba nyeŋ kwääy lwaa leny mar Cøøl beeye Abinër o Nër, ni Nër beeye wää Cøølli cöök wänni.

⁵¹'Ba wää Cøølli beeye Kic, ni Nër wää Abinër beeye wär Abiël.

⁵²'Ba ki yïth nïra bëët Cøølli na nyeya, lenye mo teek døc atägö yïthakicge ki jø Pilitin; 'ba kar kaagø, Cøøl kany wø jïte ki dhaanhø mo cwïnye da cer wala dhaanhø mo teek ki leny, pute ka nyïï dëëre.