Read anuak 1 Camiel 16 Bible Online

1 Camiel 16 - anuak bible

1 Camiel 16

¹'Ba Wuuö Jwøk aköö jï Camiel, «?A këël yi wäne nø, noo bëëdï niï kïmmö kiper gïna tïïc Cøølli, ni këël aani ki dëëra kiree Cøøl yaa nø kwier ki man bëëde na nyeya bäät jø Icriel? Ennø, ï jääŋŋa jääŋŋö baŋ Jeci nyï Bethelem, kiper aano nø jëëtö ki nyeya røk wääte. Tuuŋ man wø käär maar rööny ki gø, pääŋ yie ki maaw, ni ciï baŋe.»

²'Ba Camiel aköö, na «?A aa nidïï? Kiper ni näk mo wïny Cøølli wïnynyö, a pute ka 'näk.» Kanyøgønø, Wuuö Jwøk aköö, ni «Käädï ki nyirøøa, ni kööï, na ‹A ööi kaper nee nyirøøa man cïba no olämi jï Wuuö Jwøk.›

³'Ba Jeci wär cwølï nee nude kanyo cïpï olämi jï Wuuö Jwøk. Køøre aani, gïno tïïyï nyoodha nyoodhø jïrï; ni thïïmmï wï ŋato caana jïrï ki maaw.»

⁴'Ba Camiel, gïna caan Wuuö Jwøki jïre atïïe, ni ci Bethelem. Ni ö jø døøk pääny manøgø ni öge baŋe nee ge røømge ki eni, ni ge ööi ni dëëtge rïïŋö ki lwär, ni köge, ni «?Marï beeye öö jaak?»

⁵'Ba ena köö, «Yaa, mara öö jaak; aani, a ööi kaper naa cïpa ko olämi jï Wuuö Jwøk. Ennø, cïbu dëëtu kur keeru ni waany, ni ööu ni bëëdu nou nut buuta kanyo cïba olämi.» Kanyøgønø Camiel, Jeci ki wääte acïp kur keerge ni waany, ni cwøl ge nee nutge kanyo cïp olämi.

⁶'Ba kanya pïïcge, Camiel, Eliap o Jeci ajoode, ni cäde ki cwïnye ni kööe, ni «Ka adïëri møn, Wuuö Jwøk ŋato tïïe nee wïïe thïïmmi ki maaw nee tïme na nyeya, beeye ni cuŋŋi nyïme en.»

⁷'Ba Wuuö Jwøk aköö jï Camiel, ni «Kärï raŋ dëër dhaanhø jaak wala bäye, kiper eni yaa kwierø. A na Wuuö Jwøk, raŋ mara ba caal raŋ mar dhaanhø; kiper dhaanhø, raŋŋa dëër dhaanhø wøk jaak, 'ba a na Wuuö Jwøk, a raŋŋa cwïny dhaanhø.»

⁸Køøre Jeci, wääde ma Abinadap acwøle ni tïïc gø nee pöödhe ki nyïm Camiel. 'Ba Camiel aköö, ni «Nyenøgø thuwø kär jier Wuuö Jwøki.»

⁹Køøre Jeci, wääde ma Cimia atïïe nee pöödhe ki nyïm Camiel. 'Ba Camiel aköö, ni «Nyenøgø thuwø kär jier Wuuö Jwøki.»

¹⁰'Ba Jeci wääte moa na abïriiø atïïe nee pööthge ki nyïm Camiel. 'Ba Camiel aköö jï Jeci, ni «Wuuö Jwøk bäŋ ŋat ee jierø røk wäätï moi.»

¹¹Køøre Camiel aköö jï Jeci, na «?Aŋø, moi beege wäätï ge bëët?» 'Ba Jeci aköö, ni «Mana thiinhnha eni døc nut; 'ba ennø, eni ena baŋ kwaac dïëk.» Køøre Camiel aköö jï Jeci, ni «Jääk baŋe ki dhaanhø nee käli; kiper këël kanyo ööe, ø ba pï piny.»

¹²Kanyøgønø, Jeci ajäägö ki dhaanhø, ni ö wääde ma Deebit ni käli paac. 'Ba Deebit beeye nyen mo kïte mïërö mo dëëre pulli, ni nyeŋŋe tar. Kanyøgønø, Wuuö Jwøk aköö, ni «Ö maal, ni thiiï maaw wïïe; kiper beeye eni gø.»

¹³Ni ö Camielli ni put tuuŋ mana en maar rööny yie lwør ni thïïm wï Deebit ki maaw yïthakic nyïïmenni; ni put Jwïëc Wuuö Jwøki ö bäät Deebit ni teek døc ki mana täge ki dïcäŋeca. Køøre Camiel atïŋŋö ni døø paare na en Reema.

¹⁴'Ba kar kaagø, Jwïëc Wuuö Jwøk aput aay bäät Cøøl, ni ö Wuuö Jwøki ni wëëk jwïëy mo reyø ööny bäät Cøøl ni putge gø caarø.

¹⁵'Ba jø tïïc mo Cøøl aköö jï Cøøl, ni «Neenï, ennø Jwøk jwïëy moi ni reyø ii awëëk ööny bäätï ni caarge ïïni.

¹⁶Caanï jïwa, wa na jø tïïc moï en, nee wa määnywa ki ŋat mo pwöt thoom-othïënhö ŋääe døc; nee kany wø tïme ni Jwøk jwïëy moø ni reyø yøø, wëëge ööny bäätï ni caarge ïïni, ŋatøgø thoom-othïënhö pute ka pwöt, ni put wïïï døø kare.»

¹⁷'Ba Cøøl aköö jï jø tïïc moe, ni «Ennø, määnyu ki ŋat mo pwöt thoom-othïënhö ŋääe døc, ni kälu gø baŋa.»

¹⁸'Ba aløk dhaanhe acielli dïge ni kööe, ni «Neenï, da o Jeci nyï Bethelem mo pwöt thoom-othïënhö ŋääe døc, ma dhaanhø mo teek mo cwïnye da cer, ma ŋat leny, mo waŋe riek ki luubö, ni beeye nyen mo kïte mïërö; 'ba Wuuö Jwøk nut buute.»

¹⁹Kanyøgønø, Cøøl aput jääk baŋ Jeci ki jiy, ni kööe, ni «Jääŋ wäädï ma Deebit baŋa, nyenø ni kwaac dïëk enø.»

²⁰Ni ö Jeci ni put arëën lwør, ni kïth dïŋää gø ki dääpe, ko opïr pïën mo yie da køøŋ nyïïomøki, ni lwöte ki nyidiel thuwø, ni jääŋ ge baŋ Cøøl cer wääde ma Deebit.

²¹Køøre Deebit apïï baŋ Cøøl ni tïny gøøni, ni ö Cøølli ni tïme ni mëër ki Deebit døc; ni put Deebiti tïmö na ŋat käär jap leny jï Cøøl.

²²'Ba Cøøl ajääk baŋ Jeci ki dwøl, ni kööe, ni «Ennø, Deebit bëëdö na ŋat tïny aani, kiper aani, yia atïmö ni met ki eni.»

²³Køøre nø, aput tïmö ni kany wø ö Jwøki wø wëëk jwïëy moa reyø ööny bäät Cøøl, Deebit thoom-othïënhö wø lwøre lwørø ni pwöt gø; ni ö jwïëy moøgø ni reyø yøø ni wecge Cøøl, ni døø wïïe kare, ni jöön dëëre.