Read anuak 1 Camiel 18 Bible Online

1 Camiel 18 - anuak bible

1 Camiel 18

¹'Ba kanya tïme ni Deebit løny ki cäänö ki Cøøl, cwïny Jönathan ki cwïny Deebit aput gääbö na aciel; ni put Jönathanni tïmö ni mëër ki Deebit døc kaawat man wø mëër dhaanhe ki dëëre.

²'Ba dïcäŋögø Cøøl Deebit aput käl nee bëëde buute, ni ö Cøølli ni käre Deebit wëëk wääth ki man døø po wänni.

³Køøre Jönathan atudö ki luubö ki Deebit, kiper eni mëër ki gø døc kaawat man wø mëër dhaanhe ki dëëre.

⁴Kanyøgønø, Jönathan abïï mare mana en dëëre aput gööny wøk ni cïp gø jï Deebit, ni cïbe na aciel ka abïï nywïënyö man wø røø dëël, këël opëëllö, ka atheerø, ki kaw.

⁵Kanyøgønø, aput tïmö ni kany wø ö Cøølli ojääŋ Deebit yie jaak, Deebit puta cøø, ni tïïc jammi bëët na karge ni waŋe riek. Ni ö Cøølli ni put Deebit cuum na wïth jø leny moe. 'Ba Deebit aput tïmö ni jiy bëët këël jø tïïc mo Cøøl thuwø yïthge met ki gø.

⁶'Ba kanya duu jø lenynyi, ni beeye kanya duu Deebiti ki kuna 'näk Göliat nyï Pilitin, mään aput ö wøk ki yïth päänye bëët mo jø Icriel ni ge ööa kuna røømge ki nyeya ma Cøøl, ni ge wär ki dudi, ni ge miel, ni ge pöödö ka anëët ki thøme, ni yïthge met.

⁷Kanyøgønø, mään duut man awärge ni ge løøŋŋa dhøkge, ni ge miel, ni köge, ni «Cøøl anääö ki jø Pilitin ma kume, 'ba kume moa 'näk Deebiti thöötha geni døc.»

⁸Køøre Cøøl awëër døc, kiper yie atïmö ni raac ki duut manøgø, ni kööe, ni «Beege kume mo thööth døc na caange no onäk Deebiti; 'ba beege kume keerge jaak na caange ni yaa nääö. ?Aŋø, agïnaŋø na dööŋ ni käre joodø? ?Paa nyec keere nø?»

⁹'Ba ki mana täge ki dïcäŋögø, Cøøl aput bëëtö ni Deebit neete ka waŋ mo raac døc.

¹⁰'Ba na tïme na amöölla maya, jwïëy moa reyø aput Jwøki wëëk ööny bäät Cøøl ni teek døc, ni rïïŋe dï øtø mare ni cäänö ki luup bøølø, ni tøŋ mare ena cere. 'Ba kar kaagø, Deebit pöödö ki thoom-othïënhö kaawat man wø tïïe cooth.

¹¹Køøre Cøøl Deebit athööre ki tøŋ, ni eni caara gø ki cwïnye ni Deebit dee kwøø ri øtø ki tøŋ. 'Ba Deebit tøŋ agønynye kwöre ariiø nyïm Cøøl.

¹²'Ba Cøøl aput lwäyö ki Deebit, kiper Wuuö Jwøk nut buut Deebit, ni ree ee nø paany buut Cøøl.

¹³Kiper manøgønø, Cøøl Deebit aput tïïc nee ree daae buute nee bëëde ni kare bäär ki eni, ni tïïc gø na kwääc lwaa leny mo jïre da jø leny ma kuma; ni ö Deebiti ni put bëëtö ni bwøtha eni maal nyïm jiy kany wø näk ri leny.

¹⁴'Ba Deebit aput bëëtö ni jammi bëët tïïe na karge ni waŋe riek, kiper Wuuö Jwøk nut buute.

¹⁵'Ba kanya jooti ya Cøølli møn ni Deebit jammi bëët tïïe na karge ni waŋe riek, ena put lwäyö døc ki Deebit.

¹⁶'Ba jø Icriel bëët ki tuuŋge ma jø tuuŋ Juuda ge mëër ki Deebit døc, ni ö Deebiti ni bëëde ni bwøtha eni maal nyïmge kany wø näk ri leny.

¹⁷Køøre Cøøl aköö jï Deebit, ni «Ennø, nyaara ma Mërap na dwøŋ nutö. Eni cïba cïbö jïrï nee nywømï; 'ba gïno tïïyï keere, bëëdï ni ïïna ŋat leny mo teek jïra, ni këëlï lenye moøgø ni en cer Wuuö Jwøk yøø.» 'Ba Cøøl gïnögø acaane kiper ena cädö ki cwïnye ni kööe, ni «Ba doo beer ki man tïme ni eni 'näga aani; 'ba beerra man tïme ni eni 'näga jø Pilitinni.»

¹⁸'Ba Deebit aköö jï Cøøl, «?Aŋø, aana ŋa ni köö naa tïmö ni aana cø nyi nyeya en? ?A bëëtö mara wala bëëtö mar dhi øt wära, a bëëtö mo nyïëdi dï Icriel?»

¹⁹'Ba kanya tïme na kanya di Mërapi nyi Cøøl cïbö jï Deebit, acäŋ tïmö ni cïpa jï Adariel nyï Meyöla nee nywøme.

²⁰'Ba Mikal nyi Cøøl atïmö ni mëër ki Deebit døc. 'Ba kanya caani jï Cøøl, Cøøl yie aput tïmö ni met døc ki luubö manøgø.

²¹Ni cät Cøølli ki cwïnye ni kööe, ni «Nyaara manøgø cïba cïbö jïre nee bëëde ni caala abïëp kipere, nee tïme ni eni 'näga jø Pilitinni.» Kanyøgønø, Cøøl aköö jï Deebit, ni «Man beeye rietge nø ki man tïmï ni ïïna cø nyaara dïcäŋi.»

²²Køøre Cøøl jø kööre moe aköömme, ni kööe, ni «Cou ni cäänu ki Deebit ki piny mëëth, ni kööu, ni ‹Neenï, nyeya yie met ki ïïni døc, ni jiye bëët thuwø ge mëër ki ï døc; 'ba ennø, beerra man tïmï ni ïïna cø nyi nyeya.› »

²³Ni ö jø kööre mo nyeya ni putge cøø ni caange luubö manøgø jï Deebit. 'Ba Deebit aköö, «?Aŋø, beeye gïn mo jööt jaak ki baŋu ki man tïma ni aana cø nyi nyeya, a ni can ni bäŋ kara en?»

²⁴Ni ö jø kööre mo Cøøl ni døøkge ni caange luup bëët moa caan Deebiti.

²⁵Kanyøgønø, Cøøl acäŋ köö, ni «Døøgu ni caannu gø jï Deebit ni kööu, ni ‹Nyeya bäŋ jap kääny mo manynye baŋï; 'ba man manynye keere beeye ki man nääï ki jø Pilitin ma cwøw ma dïpa, ni coolï kwör nyeya dëët nyïïmän moe, ni daŋï geni, ni käli buyi moo daŋï baŋe.› » 'Ba luummögø acaan Cøølli kiper eno nø cädö ki man tïme ni Deebit 'näga jø Pilitinni.

²⁶'Ba kanya døøk jø kööre mo Cøøl na caange luubö manøgø jï Deebit, Deebit aput jïëy ki man tïme na cø nyi nyeya. 'Ba kanya poode ni nïne moa caan poot kär pöödhö,

²⁷Deebit aö maal ni ci baŋ jø Pilitin, ni beeye eni ki jø leny moe, ni nääe ki jiy ma dïpe ariiø røk jø Pilitin, ni daŋ geni, ni käl buyi moa daaŋe; ni cïpge ge jï nyeya ni kaala kwään moa no ocaanø, nee tïme ni løny ki man tïm Deebiti na cø nyi nyeya. Kanyøgønø, Cøøl nyaare ma Mikal aput cïp jï Deebit nee nywøme.

²⁸'Ba kanya jooti Cøølli ni ŋäc gø ni Wuuö Jwøk nut buut Deebit, ni ŋääe thuwø ni nyaare ma Mikal mëër ki Deebit døc,

²⁹eni na Cøøl enø, lwär mare ki Deebit aput kadhø døc. Ni ö Cøølli ni put bëëtö na nyïïmän mar Deebit.

³⁰Køøre kwääc lwaae mo leny mo jø Pilitin aput bëëtö ni ge ööa baŋ leny cooth baŋ jø Icriel; 'ba kany wø tïme ni ge öö, Deebit jammi bëët wø pute ka tïïc na karge ni waŋe riek ni kaala jø tïïc mo Cøøl bëët; ni ö nyeŋ Deebiti ni put wïnynye døc.