Read anuak 1 Camiel 2 Bible Online

1 Camiel 2 - anuak bible

1 Camiel 2

¹Køøre Anna Wuuö Jwøk apwøe ni kööe, «Yia atïmö ni met ki køørï, ï na Wuuö Jwøk; ni ö teeki mara ni tïme ni cäätha maal ki køørï, ï na Wuuö Jwøk; aana jïtö ki teek ki man cääna ki nyïïmän 'moa, ni ö yia ni tïme ni met kiper køny marï.

²Bäŋ ŋat mo bëëtö mare ena kur keere mo caala ïïni, ï na Wuuö Jwøk, ka adïëri møn, bäŋ jwøk mør mo caala ïïni këët, ni bäŋ jwøk mo teek mo caala ïïni, ï na Jwøwa.

³'Ba u na jiy, kär cäänö maau ree këët nou ŋwöö; kär dee gïn ma gïr ŋwøe mo cura dhøgu; kiper Wuuö Jwøk beeye Jwøk mo jammi bëët ŋäya eni, ni beeye eni wø neet bëëtö mar jiy.

⁴Eni, jap leny mo jøøa teek di raanynyø; 'ba jøøa jägö mooe mooø ki teek.

⁵Jøøa bëëdö ni jïge da cam mo päl, ge ööl ni määnyge ki tïïe, nee ge jïtge ki caammi; 'ba jøøa bëëdö no onäk käci, ge jäŋ. Këël dhaagø ma bwøc nyöödö ko obwöre abïriiø, 'ba dhaagø mo jïre do obwöre mo thööth cäŋa ööllö.

⁶Wuuö Jwøk beeye wø wëëk dhaanhø thøø, ni beeye wø wëëk dhaanhø kwøw; beeye eni ni wø kïth dhaanhø kanya näk kar bëët jwïëc jøøa no othøw, ni beeye wø tïŋ dhaanhø maal.

⁷Wuuö Jwøk beeye wø tïïc dhaanhø ni can, ni beeye wø tïïc dhaanhø no okwär; beeye eni wø tïïc dhaanhø ni bäŋ kare, ni beeye eni thuwø wø tïïc dhaanhø ni kare dwøŋ.

⁸Beeye eni wø tïŋ ŋata can maal ki yi bur, ni beeye eni wø mak cer ŋata can ni tïŋ gø maal ki wïthur, ni cïp ge kanya ciel ki jøøa kwörge døøŋŋø, ni pïge piny kwör jøøa no owøørø; kiper Wuuö Jwøk beeye na cwääc piny ni teek, ni piny bäre ena cere.

⁹Eni jøøa näk bëëtge beyø, na näk moe, di gwøø, 'ba jø raay bëëdö ni geno nikïïl jaak yi muudhö; kiper teek mar dhaanhø keere bäŋ gïn kønye.

¹⁰Jø wø bëëdö ni ge gëëmö ki Wuuö Jwøk ge di raanynyø, ni ö wëëc Jwøki ni märe bäätge kaamar køth mo pöödö maal. Wuuö Jwøk luumme ŋøle ŋølø bäät piny bäre, këël mano këët teegi mo piny. Ni ö eni ni cïp teek mare jï ŋato cuume na nyeya, ni tïïc teek mar ŋatøgø noo røøny enø ni cäätha maal.»

¹¹Køøre Elkana aay ni døø paare na en Reema. 'Ba nyilaarø na Camiel enø adööŋ buut Ëli na näk Kwääy Lam Mana Dwøŋ, ni bëëde ni tïnynya Wuuö Jwøk.

¹²'Ba wäät Ëli beege jiy mo wïthge reyø; geni luum Wuuö Jwøk kärge kïth cwïnyge,

¹³këël jöör tïïc mana doo tïïc dïlämme kiper jiy kärge kïth cwïnyge thuwø. Kany wø näk da dhaanhø mo cïpö ko olämi, kany wø poode ni rïŋö poot twak yi maac, ŋat tïïc mar dïlämi wø öö ni cere da gïn wø lääm rïŋ wøk ki gø mo lweete adäk.

¹⁴Køøre gïnögø rwaage yi gïna thaal rïŋö ki gø, nee dhiithi, wala athaa, wala dak; 'ba rïŋö bäre mano käl gïr läämö manøgø wøk puta tïmö na mar dïlämi. Manøgø beeye gïna tïïc wäät Ëli dëët jø Icriel Cëëlö kaagø, ni beege jø Icriel bëët mo wø ööi ni wø cïpi ko olämme.

¹⁵Këël kany wø poode ni dwäälö poot kär duuŋö, ŋat tïïc mar dïlämi wø puta öö ni kööe jï ŋata näk cïpö ko olämi, ni «Cïpï ki rïŋö nee bul jï dïlämi, kiper eni ba many rïŋö baŋï mo othaalø, 'ba beeye rïŋö mana näk numö keere ni manynye.»

¹⁶'Ba ni näk mo ŋata cïpö ko olämi köö jï ŋat tïïc manøgø, ni «Ka adïëri møn, dwäälö doo kwøŋa duuŋ dïkwøŋ, køøre nø ïïno lwötï ki rïŋö mana manynyï jaak;» kar kaagø ŋat tïïc wø puta köö, «Ba løny, cïpï jïra ennø; 'ba ni näk mo ba cïpï, käla kälö ki teek.»

¹⁷Kanyøgønø bääyö mar jagøgø na dïlämme yøø aput tïmö ni dwøŋ døc nyïm Wuuö Jwøk, kiper geni olämme mo Wuuö Jwøk ataakge.

¹⁸'Ba këël na bëëde ni Camiel poot na nyilaal, eni tïïö nyïm Wuuö Jwøk no oruyö ki ëëput [4] mo tïïc ka waac lïïna.

¹⁹'Ba ki yi cwiir cooth menni ma Anna wø cwääö jïre ka abïï köö ni käl gø baŋ wääde kany wø öge ki cwøre ni ge ööa kuna cïpge ko olämi man wø cïp ki yi cwiir cooth.

²⁰'Ba Ëli, Elkana ki cïïe ma Anna wø gwïëdhe gwïëdhö ni kööe, «Wuuö Jwøk uuno mooe ko obwöre, nee tïmge na kar nyilaal mana cïp kur keere jï Wuuö Jwøk.» Køøre ge wø puta døø poge kar bëëtö marge.

²¹'Ba Wuuö Jwøk Anna akønye; ni ö Anna ni nyööde ko obwöre adäk ma cwøw ko obwöre ariiø ma mään. 'Ba nyilaarø na Camiel enø abëëdö ni døøŋŋø nyïm Wuuö Jwøk.

²²'Ba Ëli atïmö na jaal døc. Ni ö eni ni wïny jammi bëët moa reyø mo wø tïïc wääte dëët jø Icriel; këël gïn wø tïïcge kany wø cige baŋ mään mo wø tïïö dho oduŋkaany røømmø mar Wuuö Jwøk ni buutge ki ge, awïnynye thuwø.

²³'Ba Ëli aköö jï wääte, «?Aperŋø na tïïyu teeŋ gïï ni reyø ii ni wïnynya baŋ jøøi bëët ii?

²⁴Wui nyie wääta, luup moa wïnynya kiperu ni car jic Wuuö Jwøki yïthakicge keerge ii, paa wøpe na bäre.

²⁵Ni näk mo dhaanhø bääya dëër dhaanhø mør, Jwøk beeye noo tïmö na dïthääy yïthakicge. ?'Ba ni näk dhaanhø bääya dëër Wuuö Jwøk, aŋa noo tïme na dïthääy jïge?» 'Ba wäät Ëli dwør wääge kärge kam leŋ na bäre, kiper Wuuö Jwøk oløny ni manynya geni nee ge nääe.

²⁶'Ba nyilaarø na Camiel enø adøøŋŋø, ni Wuuö Jwøk yie met ki gø; këël jiy thuwø yïthge met ki gø.

²⁷'Ba nyikuŋ Jwøk mør aö baŋ Ëli ni kööe jïgø, ni «Man beeye dwør Wuuö Jwøk, ena köö, ‹?Aŋø, aani dëëra kära nyoodhø jï dhi øt kwaru kanya bëëtge Ijep po Peerø na näk kar bëët laŋ?

²⁸?A aani, ge kära jierø ki røk wïth tuŋi mo Icriel nee bëëtge na dïlämme mo tïnynya aani, nee cige buut gïn wø cïp olämme bääte mara, nee gïn wø jïye ŋwääi ni met waaŋge, nee bëëtge ni ge käära ëëput [5] nyïma? ?A aani, olämme bëët mo wø waaŋ ki maac ni wø cïp jø Icrielli, kära cïbö jï dhi øt kwaru?

²⁹?Aperŋø nø na päätu olämme ki muuce 'moa na caana ni doo cïba kar bëëtö mara, ki man caammu rou ni lørru ki kwöra met røk gïï wø cïp jiya ma jø Icriel? ?A ï na Ëli, aperŋø na wøørï wäätï ni kaala aani?›

³⁰«Kiper manøgønø, Wuuö Jwøk Jwø Icriel mare acaane ni kööe, ni ‹Ka adïëri møn, aana köö ni dhi øtø marï ki dhi øt kwaru doo bëëdö ni tïïö geni na dïlämme nyïma cooth;› 'ba ennø, Wuuö Jwøk mare acaane ni kööe, ni ‹Gïnögø ba tïïa këët, kiper jø wø wøør aani, ge wøøra wøørø; 'ba jø wø taak aani, ge tïmö ni geno taaø thuwø.

³¹Neenï, da nïne mo öö mo teek marï ki teek mar dhi øt kwaru raanynya raanynyø, këël mano tïme ni bäŋ dhaanhø mo tïmö na jaal røk nyïïkwaayï.

³²Ni ö ïïni ki nyïïkwaayï ni jwørru gïï mo leth moo tägi yi øda näk kar bëëtö mara, a na Wuuö Jwøk; 'ba a poot tïïö ki gïï mo beyø jï jø Icriel. 'Ba bäŋ dhaanhø mo tïmö na jaal røk nyïïkwaayï na bäre bäre.

³³'Ba nyikwaarï mano wiia ni kär thøw nee tïï dïlämi tïïe, nyeŋŋe ränynyö ki jwøk, ni bëëde ni cwïnye kïmmö; ni ö nyïïkwaayï bëët mo ööi køørï ni thøwge ni dëëtge poot teek.

³⁴« ‹'Ba gïno tägi dëët wäätï karge riet, ni beege Apni ki Piniac, beeye noo tïmö na nyuudhi jïrï; geni, ge thøw na aciel bëët yi cäŋ aciel.

³⁵'Ba a na Wuuö Jwøk, dïlämi mo di ŋäädhö thïïŋa thïïŋö kiper dëëra, ni beeye dïlämi mo tïïe bëët tïïe ka køør mana manynya ki mana caara; ni tïïa dhi øtø mare ni teek, ni bëëde ni tïïö cooth nyïm ŋat wø røønya.

³⁶'Ba ŋat moo bøth ki thøø ri dhi øtø marï öö ni këël cøŋŋe piny ni kuul wïïe piny nyïm ŋato thïïŋa na dïlämi, kiper nee jïte ki gwel mo thenh wala gïn came, ni kwääe nee eni jïte ki kar tïïc kwör tïïe mo wø tïï dïlämme yïthge kiper nee jïte ki gïn came.› »