Read anuak 1 Camiel 20 Bible Online

1 Camiel 20 - anuak bible

1 Camiel 20

¹Køøre Deebit apäny wøk ki Newöt na en Reema, ni ö baŋ Jönathan ni kööe, na «?Agïnaŋø na näk yaa tïïö? ?Da gïn mo yaa baaø? ?Agïnaŋø na raac na tïïa dëër wäru, ni bëëde ni manynya jwïëya nee rwäänye en?»

²'Ba Jönathan aköö jï Deebit, ni «Ba doo løny; ïïni, ï ba thøw. Neenï, wära bäŋ gïn mo dwøŋ wala gïn mo thiinh mo dee tïïö ni käre caanø jïra. ?Aŋø, wära tier luubö man keere dee kanø ki aani? Gïnögø ba tägi na bäre.»

³'Ba Deebit akööŋ, ni cäŋ köö, ni «Ki man näk miï mëër ki aani, oløny ni ŋäc wäru døc, ni ee nø caar ki cwïnye thuwø ni kööe, ni ‹Beerra man bëët Jönathanni ni luubö manøgø kuue, kiper kanymør cwïnye pädhö jaak.› 'Ba ka adïëri møn, a kööŋŋa ŋëët Wuuö Jwøk na kwøw, ki ŋëëtï; beeye kany mo thiinh keere no odööŋ ki man ö wäru ni 'näk aani.»

⁴Køøre Jönathan aköö jï Deebit, ni «Ennø, gïno pëënynyï aani ki gø jaak tïïa tïïö jïrï.»

⁵Kanyøgønø, Deebit aköö jï Jönathan, ni «Neenï, diøø beeye kany wø päär dwääyi, ni beeye kany wø pïwa piny nee wa cämwa ki nyeya na aciel. 'Ba ennø, akwaya ïïni naa aa nee raa kana yi pwöla këël mano tïme na dää nïne ki wäär.

⁶'Ba kanyo ö wäru noo pëëny aani, wär caanï jïre ni kööï, ni ‹Deebit aana kwaaye døc ki man reŋ Bethelem na näk pääny marge, kiper man beeye kar kany wø cïp tuuŋge ko olämi jï Wuuö Jwøk ki yi cwiir cooth nee cämge na aciel.›

⁷'Ba ni näk mo wäru köö, ni ‹Wøp,› aani, a na dhaanhnhï, puta ka ŋäc ni bëëtö mara tïmö ni beer; 'ba ni näk mo eni puta wëër døc, wär put ŋäc nø ni wäru acaara mare ee nø ŋøl ki man tïïe ki gïn mo leth dëëra.

⁸Kiper manøgønø, nyooth bäth ec marï jïra, a na dhaanhnhï, kiper ïïna nø tudö ki luubö ki aani ki nyeŋ Wuuö Jwøk. 'Ba ni näk mo da gïn mo yaa baaø, beerra man tïme naa 'näga ïïni ki dëërï kiree. ?Aŋø, aano kïthï gø baŋ wäru kiperŋø këët?»

⁹'Ba Jönathan aköö, ni «Beerra man tïm acaara manøgø ni tøør cwïnyï. ?Aŋø, dee na ŋääa ni wära da gïn mo raac mo ee caarø ki man tïïc gø dëërï, ba daa caanø jïrï?»

¹⁰Køøre Deebit aköö jï Jönathan, «?Ni näk mo da luubö mo raac mo caan wäru caanø dëërï kipera, aŋa noo ööi noo caan gø jïra?»

¹¹Kanyøgønø, Jönathan aköö jï Deebit, ni «Ööï, ø aa yi pwöla.» Ni ö geni karge riet ni putge ci yi pwöla.

¹²Køøre Jönathan aköö jï Deebit, ni «Ŋëët Wuuö Jwøk, Jwø Icriel, diøø wala køør diøø teeŋ kar kany ennø, kanyo manynya yi wära, ka adïëri møn, ni näk mo da gïn mo beer mo yaa wïnynyö kiperï, ï na Deebit en, a jääga baŋï ki dwøl nee wïnynyï.

¹³'Ba ni näk mo wära manynya man tïïe ki gïn mo leth dëërï møn, ni kära luubö manøgø caanø jïrï nee wïnynyï, ni ba wëëga ï wääth ki man aayï ki jööt dëël, beerra man ö Wuuö Jwøki ni raany aani, a na Jönathan en. Ni ö Wuuö Jwøki ni bëëde ni nut buutï kaawat mana bëëde ni nut buut wära.

¹⁴'Ba këël mano pooda naa poot kwøw, beerra man nyoothï bäth ec mar Wuuö Jwøk jïra, naa ba thøøa.

¹⁵Ni ö bäth eci marï thuwø ni ba cuuŋe na bäre bäre ki man nyoothï gø jï dhi øtø mara. 'Ba ï na Deebit en, këël kanyo ö Wuuö Jwøki noo dïïr wïth nyïïmän moï moa en bäät piny bëët, bäth ec marï doo bëëdö ni poot nyoothï nyoodhø jï dhi øtø mara.»

¹⁶Kanyøgønø, Jönathan aput tudö ki luubö ki Deebit, ni luubö manøgø tuude kiper dëëre, këël mana këët dhi øtø mar Deebit. 'Ba Jönathan acäŋ köö, ni «Ka adïëri møn, beerra man ö Wuuö Jwøki ni dïïr wïth nyïïmän mo Deebit bëët.»

¹⁷Ni ö Jönathanni ni cäŋ Deebit wëëk kööŋ ki køør mëër mare mana mëëre ki gøøni, kiper Jönathan mëër ki Deebit døc kaawat man wø mëër dhaanhe ki jwïëye.

¹⁸Køøre Jönathan acäŋ köö jï Deebit, ni «Diøø beeye kany wø päär dwääyi møn; 'ba kanyo näk ri cam, karï läämö, kiper køøm marï dööŋ ni ŋaam.

¹⁹'Ba ennø, ï aay ni bëëdï ki nïne adäk; 'ba noo tïme na dää nïne, wärï laar ci kanya kwøŋï riï kan yie dïkwøŋ, ni bëëdï ŋää Kïn Ëdhël kaace.

²⁰'Ba aani, athëëre adäk thööra jï kunögø, ni kee mara thöödhö ka alääwa.

²¹Køøre nø, nyilaaro cääthwa ki gø jääŋŋa jääŋŋö ni kööa, ni ‹Ciï ni manynyï athëëre moa thööra.› 'Ba kanyo kööa ki nyilaarøgø, ni ‹Neenï, athëëre adööŋ pööthi ni da aani en; duu baŋge,› kar kaagø nø, wärï put ö baŋa; kiper gïnögø nyootha gø ni bäŋ gïn mo raac mo di tïïö dëërï; 'ba ki nyeŋ Jwøa kwøw beeye gïn mo beer keere kiperï.

²²'Ba ni näk mo aano köö ki nyilaarøgø, ni ‹Neenï, athëëre ena nyïmï kunece,› køøre nø, wärï put aay, kiper Wuuö Jwøk ï ee nø wëëk wääth.

²³'Ba ki køør luup moa nø carø ennø, ka adïëri møn, Wuuö Jwøk beeye eni noo nut yïthakiyø ki ïïni na bäre bäre.»

²⁴Kanyøgønø, Deebit ree aput kan yi pwöla; 'ba dïcäŋa päär dwääyi, nyeya apï piny lak cam mana no ojiiŋŋø.

²⁵Ni ö nyeya ni pï piny bäät køøm mare na en ri øtø, kaawat man wø tïïe cooth. Køøre Abinër apï piny buut nyeya, ni ö Jönathanni ni pï piny ni dïët ki wänni. 'Ba køøm mar Deebit odööŋ ni ŋaam.

²⁶'Ba dïcäŋögø, Cøøl bäŋ gïn mo ee caanø, kiper ena cädö ki cwïnye ni kööe, ni «Kanymør da gïn mo määnö mo otïïc Deebiti; ni ka adïëri møn, løny ki man tïme ni dëëre käre cïp kur keere ni waany.»

²⁷'Ba na tïme na dïcäŋ maya, ni beeye riet nïne ki mana päär dwääyi, kanya pï jiyi piny lak cam, køøm mar Deebit poot ŋaam. Kanyøgønø, Cøøl aköö jï wääde ma Jönathan, na «?Aperŋø na tïme ni o Jeci kär ö baŋ cam, ki mana täge ya awääre këël dïcäŋi?»

²⁸'Ba aløk Jönathanni jï wänni ni kööe, ni «Deebit aana kwaaye døc ki man ci Bethelem,

²⁹kiper ena köö, na ‹A kwaya ïïni ki man wëëgï a wääth, kiper kar kany ennø, tuuŋwa ge cïpö ko olämi jï Wuuö Jwøk nee cämge na aciel, ni coka thuwø a ee köömmö døc ki man nuda kaace. 'Ba ennø, ni näk mo yiï met ki aani, a kwaya ïïni naa aa, nee tïme ni løny ki man jooda nyïïmera thuwø.› Manøgø beeye tier gïna tøør Deebiti lak cam marï, ï na nyeya en.»

³⁰Køøre Cøøl aput wëër døc ki Jönathan, ni kööe jïgø, ni «Ïïni, ï na o nyaana näk ŋat ageem ni luupe ba tiir, ?aŋø, rääö marï kuua, ki mana tïme niï miega Deebit o Jeci, ni beeye eni noo tïm wïïï ni laay ki køøre, ni ö meru thuwø ni tïm wïïe ni laay?

³¹Kiper këël kanyo bëëde ni Deebit o Jeci nut bäät piny kany, ï ränynyö, ni ö nyeci marï ni ba ruue. 'Ba ennø, jääk baŋe ni kälï gø baŋa, kiper nee eni 'näk.»

³²'Ba Jönathan mare aløøe jï wänni ma Cøøl ni kööe jïgø, «?Aŋø, eni nääi kiperŋø? ?Da gïn mo ee baaø?»

³³Kanyøgønø, Cøøl wääde ma Jönathan aput thöör ki tøŋ nee nääe; ni ö Jönathanni ni put gø ŋäc møn ni wänni manynya man 'näk Deebit kiree.

³⁴Køøre Jönathan aput ö maal ki kar cam no ogootø døc, ni put kweer ki cam dïcäŋögø, ni beeye riet nïne ki mana päär dwääyi, kiper cwïnye opädhö døc ka apääda mana ö wänni na päät Deebit ki gø.

³⁵'Ba na tïme na amöölla, Jönathan aci yi pwöla kiper luubö mana caange ki Deebit; ni kanya aae eni cäädhi ka nyilaal mo thiinh.

³⁶Ni kööe jï nyilaara cääthge ki gø, ni «Ennø, reŋï ni manynyï athëëre moo thööra kawaane ennø.» 'Ba kanya tïme ni nyilaarøgø reeŋø, atheerø aput thöör ni kaal nyilaarøgø.

³⁷'Ba kanya ö nyilaarøgø na pïïe kanya coonya atheerø yie mana thöör Jönathanni, Jönathan nyilaal arwaae ni kööe, «?Aŋø, paa atheerø ni nyïmï ice?»

³⁸Ni ö Jönathanni ni cäŋ nyilaal rwaayø ni kööe, ni «Läädï, kärï ruu.» Køøre nyilaarøgø atheerø aput kwany ni duu baŋ kwääye ma Jönathan.

³⁹'Ba nyilaarøgø bäŋ gïn mo ŋääe kiper tier gïnögø na bäre; beeye Jönathan ki Deebit keerge na ŋäc tier gïnögø.

⁴⁰Køøre Jönathan gïïa thöödhe ki ge aput wëëk nyilaarøgø ni kööe, ni «Ciï ni kïthï ge paac.»

⁴¹'Ba kanya nø aac nyilaarøgø, Deebit aput ö maal ki ŋää Kïn Ëdhël na näk ree ee kan yie, ni ö baŋ Jönathan, ni këël cøŋŋe piny ni kuul wïïe piny kwöre adäk. Køøre dhøkge anuumge ni ge määtha rege, ni putge jwøk; 'ba jwøk mana jwöŋ Deebiti ki gø akadhø døc.

⁴²Kanyøgønø, Jönathan aköö jï Deebit, ni «Ciï ki jööt dëël; øøni, kööŋ marø anø tïïø yïthakiyø keerø ki nyeŋ Wuuö Jwøk ni kööø, ni ‹Wuuö Jwøk beeye noo nut yïthakiyø ki ïïni, ki yïthakic nyïïkwaaya ki nyïïkwaayï na bäre bäre.› » Køøre Deebit aput tïŋŋö ni aae, ni ö Jönathanni ni put døø paac.