Read anuak 1 Camiel 21 Bible Online

1 Camiel 21 - anuak bible

1 Camiel 21

¹'Ba Deebit apïï Nöp baŋ Ayemëlëk na näk Kwääy Lam Mana Dwøŋ. Kanyøgønø, Ayemëlëk aö baŋ Deebit ni dëëre miel ki lwär. Ni kö Ayemëlëki jï Deebit, na «?Aŋø ni ööï keerï en ni bäŋ dhaanhø mou cäädhi ka gø?»

²'Ba Deebit aköö jï Ayemëlëk na näk Kwääy Lam Mana Dwøŋ, ni «Da gïn mo aano kööm nyeya ki gø, ni kööe, ni ‹Kär dee ŋat mo ŋäya gïn ni jääŋŋa ïïni baŋe en, ni beeye gïna köömma ïïni ki gø.› 'Ba jiy moa cääthwa ki geni, da kany mo yaa caanø jïge ni wa røømwa yie ki geni.

³?'Ba ennø, a jïtö ki cam buutï? A kwaya ïïni naa mooyï ki dääpe abïïc, wala cam mana nut jaak.»

⁴'Ba aløk Kwääy Lam Mana Dwøŋ jï Deebit ni kööe, ni «Bäŋ dääpe moa näk dääpe jaak, 'ba beege muunni moa näk ocïp kur keerge na nyuuthe jï Wuuö Jwøk ni nut ii;[15] 'ba ni näk jiyï dëëtge ege mänö ki ciin baŋ mään, løny ki man cïba geni.»

⁵Køøre aløk Deebiti jï Kwääy Lam Mana Dwøŋ ni kööe jïgø, «Wui Dïlämi, ka adïëri møn, kany wø dee kany mo wa cøøa yie cooth, wa bëëdö ni waano mänö ki ciin baŋ mään ni dëëtwa ewa cïp kur keere ni waany, kaamar wääth man ni caathwa dïcäŋi en. ?Aŋø, a wääth man ni pöödha eni en, jiy doo cäŋa bëëtö ni dëëtge kärge cïp kur keere ni waany këët?»

⁶Kanyøgønø, Kwääy Lam Mana Dwøŋ aput cïpö jï Deebit røk muunni moøgø no ocïp kur keerge na nyuuthe yøø, ni beege muunni moa no onø daak karge na bëëtge yie nyïm Wuuö Jwøk nee karge kïthi ki muunni mo nyärö. Kiper bäŋ teeŋ dääpe møøk kaace, 'ba beege muunni moøgø keerge.

⁷'Ba ŋat tïïc aciel mar Cøøl ma wïth jø wø kwaac dïëk, mo nyeŋŋe cwøl ni Döweek ma nyï Ëdöm, nut kaagø dïcäŋögø, no otïïö nee bëëde nyïm Wuuö Jwøk.

⁸Køøre Deebit aköö jï Ayemëlëk, ni «?Ennø, bäŋ tøŋ wala opëëllö buutï? Kiper aani opëëllö mara wala jap leny 'moa kära käärö, kiper luum nyeya man beeye gïn mo di layø.»

⁹Køøre Kwääy Lam Mana Dwøŋ aköö, ni «Ka adïëri møn, opëëllö mar Göliat nyï Pilitin mana 'nägï Goor Ëla nut no ocïp piny ŋää ëëput [16] noo bääö ka abïï; 'ba ni näk ï manynya gø nee kälï, kälï. Kiper bäŋ opëëllö mør këët.» 'Ba Deebit aköö, ni «Bäŋgø mo kaala gøøni këët nø; wëëk aani.»

¹⁰Køøre Deebit acäŋ tïŋŋö dïcäŋögø ni reeŋe ni poot ŋwieya Cøøl, ni aae ni ci baŋ Akïc nyeny jø Gëth.

¹¹'Ba jø tïïc mo Akïc aköö jï Akïc, «?Aŋø, man paa Deebit nyeny jø Icriel? ?A duut mana wär jiyi ni jøw miel na køp, «ni ‹Cøøl anääö ki jø Pilitin ma kume, 'ba kume moa 'näk Deebiti thöötha geni døc,› ba wär kipere?»

¹²'Ba Deebit luup moøgø akïth cwïnye, ni lwäye døc ki Akïc nyeny jø Gëth.

¹³Ni ö Deebiti ni put ree tïïc kaamar bøøl nyïmge; 'ba kanya makge gø ena put tïïö ki jap bøøl, ni kew dëër odhuul dhi kiir, ni tïïc laaw nee øcge piny ki bäät jïëc tïïe.

¹⁴Køøre Akïc aköö jï jø tïïc moe, ni «?Neennu, käru joodø ni ena bøøl? ?Aŋø, kälu gø baŋa aperŋø?

¹⁵?Aŋø, a cana bøøre na kälu nyenøgø na bøøl enø baŋa? ?Aŋø, bøørøgø doo cäŋa käl paara møn?»