Read anuak 1 Camiel 22 Bible Online

1 Camiel 22 - anuak bible

1 Camiel 22

¹Kanyøgønø, Deebit aput tïŋŋö ki Gëth ni päär wøk ni put ci yi øt kïdi mana en ya Adulam; 'ba kanya ö nyïïmenni ki tuuŋge bëët moa en poge na wïnyge gø, gena put ci baŋe kunece.

²Ni ö jiyi bëët moa näk bëëtö marge teek, ki jiy bëët moa näk rege da pïït, ki jiy bëët moa näk cwïnyge oränynyö ki bëët paac, ni putge rege cooŋ buut Deebit; ni ö Deebiti ni put tïmö na kwääc lwaa leny marge. 'Ba jiy bëët moa cooŋ rege buute atïmö na jiy ma dïpe aŋween.

³'Ba Deebit atïŋŋö ki kaace ni ci Micpa na näk okäl jø Möapi; ni kööe jï nyeny jø Möap, ni «Nyeya, akwaya ïïni nee wära ki mera öge nee bëëtge buutï, këël mano ŋääa gïno tïïc Jwøki kipera.»

⁴Køøre Deebit wänni ki menni aput wii buut nyeny Möap; ni ö wänni ki menni ni putge bëëtö buut nyeny Möap kaagø ki yïth nïne bëët moa beet Deebiti ni ree ee kanø kanya näk kar gwøk røk.

⁵'Ba nyikuŋ Jwøk mana cwøl ni Gaat aköö jï Deebit, ni «Kärï bëëdö kar gwøk røk kany; ö maal ni ciï yi ŋööm jø tuuŋ Juuda.» Kanyøgønø, Deebit aput tïŋŋö ni ci yi Lur Ërët.

⁶Kanyøgønø, awïny Cøølli ki man näk mo Deebit ki jøøa en buute karge onø joot. 'Ba kar kaagø, Cøøl opï piny tier jaadha dwøŋ na en Giba bäät thuur, ni tøŋ mare ena cere ni jø tïïc moe cuŋŋö buute kaagø.

⁷Køøre Cøøl aköö jï jø tïïc moe na näk cuŋŋö buute kaagø, «Wui, jø tuuŋ Benjamen, wïnynyu nø. ?Aŋø, Deebit o Jeci, u bëët, u di mooø ki pwöth këël pwöth omøki? ?Aŋø, u di cuumö na kwääc lwaae mo ŋati man nø jïre da lwaa jiy ma kuma ki kwääc lwaae mo ŋati man nø jïre da lwaa jiy ma dïpa?

⁸Kiper u bëët, dhøgu anø tuutu bääta, ni bäŋe dhaanhø maa ee wäänynyö kanya ö wääda ni tude ki luubö ki o Jeci; bäŋ dhaanhø aciel dëëtu na bäre mo cwïnye omaar pädhö kipera, ni bäŋe dhaanhø thuwø maa ee maar wäänynyö ki gïna ö wääda na coon yi ŋat tïïc mara ma Deebit nee gëëme ki aani, kaawat man bëëde dïcäŋi en ni Deebit omøør piny nyeŋ jïëthe 'moa.»

⁹'Ba Döweek nyï Ëdöm, na näk cuŋŋö buut jø tïïc mo Cøøl kaagø, mare aløøe ni kööe, ni «Deebit o Jeci ajooda kanya pïïe Nöp baŋ Ayemëlëk wär Akitöp.

¹⁰Ni ö Ayemëlëki ni pëëny Wuuö Jwøk kiper Deebit, ni mooc gø ki gïn came, ni put opëëllö mar Göliat nyï Pilitin cïp jïgø.»

¹¹Køøre nyeya ma Cøøl aput jääk baŋ Kwääy Lam Mana Dwøŋ ma Ayemëlëk wär Akitöp, ki tuuŋge bëët moa bëëdö na dïlämme Nöp kaace; ni ö jøøgø bëët ni putge ö baŋ nyeya.

¹²Kanyøgønø, Cøøl aköö, «Nyie wär Akitöp, cek ïthï.» Ni kö Ayemëlëki, ni «Wui nyeya, caanï nø.»

¹³Køøre Cøøl aköö jï Ayemëlëk, «?Aŋø, ïïni ki o Jeci, u tuutu dhøgu bääta kiperŋø? ?Aŋø, Deebit aputï mooc ki muunni, ni cïpï opëëllö jïre, ni pëënynyï Jwøk kipere kiree, ni ö Deebiti ni put gëëmö ki aani, kaawat man bëëde dïcäŋi en ni bëëdö no omøør piny nyeŋ jïëthe 'moa?»

¹⁴Køøre Ayemëlëk mare aløøe jï nyeya ni kööe, «?Aŋø, ki røk jø tïïc moï bëët, dhaanhø mo oŋäädhö mo caala Deebit dagø? Kiper beeye eni na cø nyaarï, ï na nyeya, ni beeye ni wø bëëdö na wïth jø lwaa leny mo wø koor ïïni, ni beeye eni na dhaanhø mana näk owøørø paarï.

¹⁵?Aŋø, beeye täge eni dïcäŋi ennø ki man pëënynya Jwøk kiper Deebit? Wui nyeya, ka adïëri møn, acaara manøgø kara bäär ki gø. Ï na nyeya en, beerra man ba kïthï bääta ki luubö mo kära tïïö, a na dhaanhnhï en; këël tuuŋwa bëët thuwø kär dee luubö mo kïthï bäätge, kiper a na dhaanhnhï en, bäŋ gïn mo ŋääa na bäre bäre kiper luubö manøgø.»

¹⁶'Ba nyeya aköö, ni «Ka adïëri møn, ï na Ayemëlëk ki dëërï enø ki tuuŋu bëët, u di nääö kiree.»

¹⁷Ni kö nyeya jï jø wø koor eni moa näk cuŋŋö buute kaagø, ni «Ööu maal ni 'nägu dïlämme mo Wuuö Jwøk, kiper geni, geno dwätö ki Deebit; ni ŋäcge møn ni Deebit mare beeye päär wøk, ni kärge aani wäänynyö.» 'Ba jø tïïc mo nyeya akweer ki man 'näkge dïlämme mo Wuuö Jwøk.

¹⁸Køøre nyeya aköö jï Döweek, «Nyie Döweek, ö maal ni 'nägï dïlämme.» Kanyøgønø, Döweek nyï Ëdöm aput ö maal ni 'näk dïlämme; ni jiy moa nääe bëët dïcäŋögø beege jiy ma pïërabära ka abïïc, ni jøøgø bëët beege dïlämme mo wø røc abïïga cwøl ni ëëput na näk ocwääö ki waac lïïna.

¹⁹'Ba Cøøl jiy bëët moa bëëdö Nöp pääny mar dïlämme aput tïïc nee ge 'näk ko opëëllö, ni beege cwøw, ki mään, ko obwöre, ko obwöre moa näk poot dhøøth; këël dhäk, ka arëëni ki dïëk anääe thuwø.

²⁰'Ba Ayemëlëk wär Akitöp, wääde aciel mo nyeŋŋe Abiethaar abøth, ni put päär wøk ni aae ni reŋ baŋ Deebit.

²¹Kanyøgønø, Abiethaar gïna tïïc Cøølli, na 'näk dïlämme mo Wuuö Jwøk, acaane jï Deebit.

²²Køøre Deebit aköö jï Abiethaar, ni «Dïcäŋece kanya jooda Döweek nyï Ëdöm ni nut kaace, aputa ŋäc ni luubö manøgø caane caanø jï Cøøl. 'Ba ka adïëri møn, beeye aani na käl thøø manøgø bäät tuuŋ wäru bëët.

²³Ennø møn, ï bëëdö buuta kany. Kär dee lwär cwïnyï, kiper Cøøl ni many jwïëyï enø, eni manynya jwïëya thuwø; 'ba ï puta bëëtö ni jwïëyï ogwøø ki aani na aciel.»