Read anuak 1 Camiel 23 Bible Online

1 Camiel 23 - anuak bible

1 Camiel 23

¹'Ba acaan jï Deebit, ni «Neenï, jø Pilitin ge këëdö ki jø Kïïla ni ge twiera caammi moa en yïth laare.»

²Køøre Deebit Wuuö Jwøk apëënynye ni kööe, ni «?Cøøa ni tuua jø Pilitin moøgø?» 'Ba Wuuö Jwøk aköö jï Deebit, ni «Ci tuk geni, ni piemï jø Kïïla.»

³'Ba jø leny mo Deebit aköö jï Deebit, ni «Neenï, këël ni bëëtwa dï ŋööm Juuda en, wa bëëdö ni wa lwäär. ?A ni näk mo waano ci Kïïla baŋ leny ki jø leny mo jø Pilitin, a teeŋ bëëtö mo nyïëdi nø no obëëtwa ki gø?»

⁴Køøre Deebit, Wuuö Jwøk acäŋ pëënynyö. 'Ba aløk Wuuö Jwøki jï Deebit ni kööe, ni «Ö maal, ni løøyï piny baŋ jø Kïïla, kiper aani jø leny mo jø Pilitin cïba cerï.»

⁵Kanyøgønø, Deebit ki jø leny moe gena put ci Kïïla ni këëtge ki jø leny mo jø Pilitin, ni 'näkge jø Pilitin mo thööth døc, ni twierge dhäk moge. Ni ö Deebiti ni put jø Kïïla piem.

⁶'Ba kar kaaca, kanya ö Abiethaarri wär Ayemëlëk na rïŋ baŋ Deebit Kïïla, eni rïŋŋi ni ëëput [17] kääre käärö.

⁷'Ba kanya caani jï Cøøl ni Deebit oci Kïïla, Cøøl aköö, ni «Ena cïp Wuuö Jwøki cera møn; kare aløny ni diiny ni bäŋ kany reeŋe ki yie këët, kiper ena døny yi kiir mo odhuule moe otïïö ni teek døc mo di dëëdö ki dïdëëte.»

⁸Køøre Cøøl jø leny bëët acwøle, nee ge løøcge piny Kïïla nee Deebit ki jø leny moe rumge dïër.

⁹'Ba aŋäc Deebiti ni Cøøl manynya gø nee tïïe ki gïn mo leth dëëre. Kanyøgønø, Deebit aköö jï Abiethaar na näk Kwääy Lam Mana Dwøŋ, ni «Käl ëëput kany.»

¹⁰Køøre Deebit alämö ni kööe, «Wui Wuuö Jwøk, Jwø Icriel, aani, a na dhaanhnhï, awïnynya møn ni Cøøl manynya man ö Kïïla nee pääny raanynye kipera.

¹¹?A ni näk mo Cøøl öö, jø Kïïla a cïpge cere møn? ?Kaawat mana wïnynya gø, a na dhaanhnhï, Cøøl ööa kany møn? Wui Wuuö Jwøk, Jwø Icriel, a kwaya ïïni, caan adïëri marï jïra.» Køøre Wuuö Jwøk aköö, ni «Cøøl öö møn.»

¹²Køøre Deebit acäŋ köö, «?A jø Kïïla, aani ki jø leny 'moa, wa cïpge cer Cøøl møn?» 'Ba Wuuö Jwøk aköö, ni «U cïpge cer Cøøl møn.»

¹³Køøre Deebit aput päny maal ki jø leny moe mo jïtö ki dïpe abïciel, ni tïŋge ki Kïïla, ni putge wääth ni ge kaanna rege, ni ge cøøa kany nø ki kany nø. 'Ba kanya caani jï Cøøl ni Deebit apäär wøk ki Kïïla, Cøøl ŋwïëy køør Deebit aput wec.

¹⁴Kanyøgønø, Deebit aput bëëtö kwör gwøk røk, ni eni bëëdö dï paap Dhip na en bäät kïte. Ni ö Cøølli ni put bëëtö ni manynya Deebit cooth; 'ba Jwøk Deebit käre cïp cer Cøøl.

¹⁵'Ba kanya bëët Deebiti ni eni ena kanya cwøl ni Örec na en dï paap Dhip, aŋääe ni Cøøl poot ööa kuna many jwïëye nee rwäänye.

¹⁶'Ba Jönathan o Cøøl aay ni ci baŋ Deebit Örec, ni køny gø nee jïte ki teek baŋ Jwøk,

¹⁷ni kööe, ni «Kärï lwäyö, kiper cer wära ma Cøøl ba pïï dëërï. Ï tïmö na nyeya bäät Icriel, ni tïma naa ena køørï. Këël wära ma Cøøl gïnögø ŋääe thuwø.»

¹⁸Kanyøgønø, geni karge riet gena put tudö ki luubö nyïm Wuuö Jwøk. Ni ö Deebiti ni put bëëtö Örec, 'ba Jönathan adøø paare.

¹⁹Køøre jø Jip aö baŋ Cøøl Giba, ni köge, ni «Deebit ree ee kan yi ŋöömwa kwör gwøk røk moa en Örec, na en bäät Kïn Akëla, jï løø tier-piny ki løø ŋöömma näk dïtëën.

²⁰Wui nyeya, ennø, ööï ni tïïyï mana manynyï ki cwïnyï; 'ba gïno tïïcwa beeye ki man cïpwa Deebit cerï, ï na nyeya en.»

²¹'Ba Cøøl aköö, ni «Uuno gwïëth Wuuö Jwøki kiper mana nø päth cwïnynyu kipera.

²²Ennø, cou ni jiiŋŋu rou døc, ni manynyu gø, ni jootu kwör wø cäädhe yïthge, ni pëënynyu ŋata joot gø kaace thuwø; kiper acaan jïra ni eni waŋe riek døc kiree.

²³'Ba ennø, manynyu ni ŋäyu kwör wø kaan ree yïthge bëët, ni duu baŋa ki luubö ma kare; køøre a aay ki uuni. 'Ba ni näk mo eni poot ena kaace, eni manynya manynyø, këël dï jø tuuŋge ma jø tuuŋ Juuda.»

²⁴Køøre jøøgø atïŋŋö ni døøge Dhip ni wiige Cøøl piny ni poot kär tïŋŋö. 'Ba kar kaagø, Deebit ki jø leny moe ge ena dï paap Maøn, na en dï goor Araaba jï løø tier-piny ki løø ŋöömma näk dïtëën.

²⁵'Ba kanya ö Cøølli ki jø leny moe na cige kun manyge Deebit, acaan jï Deebit; ni ö Deebiti ni løøc piny ni ci ri kïdi mana en piny, ni put bëëtö kaace dï paap Maøn. 'Ba kanya wïnynyi Cøølli, ena läp køør Deebit dï paap Maøn.

²⁶'Ba Cøøl aay ki deŋ kïdi løk maya, ni ö Deebiti ki jø leny moe ni aacge ki deŋ kïdi løk maya; 'ba Deebit rwäänhnhö døc kiper nee Cøøl jööme, kiper Cøøl ki jø leny moe geno løny ni ge ruma Deebit ki jø leny moe dïër nee makge.

²⁷'Ba ŋat mo jääŋŋi ki paac aö baŋ Cøøl, ni kööe, ni «Laar ö paac, kiper jø Pilitin paac anø tukge.»

²⁸Kanyøgønø, Cøøl køør Deebit aput wec, ni døø paac nee këëtge ki jø Pilitin. 'Ba nyeŋ kïnna ö Cøølli na wec køør Deebit ki caath deŋŋe, aput cwøl ni Kïn Bødhø.

²⁹Køøre Deebit aput aay kaace ni ci kuna bëëde kwör gwøk røk moa en deŋ Ayn-Gadi.